ۇلتتىق قۇراما كوشباسشىسى جانسەل دەنيز جولدامادان قۇر قالدى

استانا. KAZINFORM - تايان قالاسىندا ءوتىپ جاتقان ليتسەنزيالىق تۋرنيردە قازاقستاندىق تاەكۆوندوشى جانسەل دەنيز جارتىلاي فينالدا قارسىلاسىنا جول بەرىپ، جولداماسىز قالدى.

جانسەل دەنيز شيرەك فينالدا موڭعوليالىق تاەكۆوندوشىنى جارىس جولىنان تايدىرعانىمەن، وكىنىشكە قاراي جولداما ساراپقا سالىناتىن جارتىلاي فينالدا تاجىكستاندىق مۋنيرا ابدۋسولومادان جەڭىلىپ قالدى.

67+ كەلى سالماقتا ەل نامىسىن قورعاپ جۇرگەن 33 جاستاعى جانسەل دەنيز وسىعان دەيىن ەكى وليمپيادا ويىندارىندا (ريو 2016 ج مەن توكيو 2021 ج) ەل نامىسىن قورعاعان اسا تاجىريبەلى سپورتشىلاردىڭ ءبىرى بولاتىن. الايدا، بيىل پاريجگە بارۋدىڭ ءساتى تۇسپەدى. جولداماعا ءبىر قادام جەتپەي قالدى.

وسىعان دەيىن تاعى ءبىر وتانداسىمىز ماريا سيەۆوستيانوۆا (57 ك گ) العاشقى جەكپە-جەگىندە كامبودجالىق سپورتشى دجۋليا مامنان جەڭىلىپ، جارىس جولىنان شىعىپ قالعان ەدى.

وسىلايشا تايانعا پاريج وليمپياداسىنىڭ جولداماسىنا تالاسۋعا اتتانعان 4 سپورتشىمىزدىڭ ەكەۋى ءتورتجىلدىقتىڭ باستى دوداسىنا قاتىسۋعا مۇمكىندىك السا، ەكەۋى جولدامادان قاعىلدى.

ەستەرىڭىزگە سالا كەتەيىك، وسىعان دەيىن حابارلاعانىمىزداي، تاەكۆوندودان قازاقستان قۇراماسى قىتايدا ەكى ليتسەنزيا جەڭىپ الدى. ونىڭ ءبىرىن بۇگىن ساميرحون اباباكيروۆ (58 كەلىگە دەيىن) يەلەنسە، ەكىنشىسىن جولداماعا كەشە باتىرحان تولەۋعالي (80 كەلىگە دەيىن) قول جەتكىزدى.

قىتايداعى جارىستا پاريج وليمپياداسىنىڭ جولداماسىنا ءار سالماقتا فينالعا شىققان ەكى سپورتشى يە بولدى. بارلىعى تۋرنيردە 33 مەملەكەتتەن كەلگەن تاڭداۋلى 96 تاەكۆوندوشى كۇش سىناستى. بۇل سارىقۇرلىق وكىلدەرىنە ليتسەنزيا بەرىلەتىن سوڭعى تۋرنير ەكەنىن ايتا كەتەيىك.

اۆتور كۇنسۇلتان وتارباي