ۇلتتىق ۇلان قاتارىندا قانداي ۇلت وكىلدەرى قىزمەت ەتەدى

استانا. KAZINFORM - قۇقىقتىق ءتارتىپ اسكەرى قاتارىندا جاۋىنگەرلىك قىزمەت اتقاراتىن وزگە ۇلت وكىلدەرى ءجيى كەزدەسەدى. كوش باسىن ورىس، وزبەك جانە تاتار ۇلتىنىڭ وكىلدەرى باستاپ تۇرسا، ءتىزىمدى ەستون، گرەك، كامچادال سەكىلدى ەتنوس وكىلدەرى تۇيىندەيدى.

Ұлттық ұлан қатарында 30-дан астам ұлт өкілі қызмет етеді
Фото: ҚР ІІМ Ұлттық ұланының баспасөз қызметі

بىلتىرعى جەلتوقسان ايىنىڭ وزىندە پاۆلودار قالاسىندا ورنالاسقان 5512 اسكەري بولىمىنە كەلىپ قوسىلعان ساربازداردىڭ اراسىندا كارىس، يران، ازەربايجان، ۇيعىر جانە كۇرد حالقىنىڭ وكىلدەرى بولدى. ولاردىڭ ءبارى - قازاقستان ازاماتتارى. سوندىقتان وزگە ۇلت وكىلى بولسا دا ەلىمىزدە تۇرعان سوڭ قولدارىنا قارۋ الىپ، وتان قورعاۋعا كەلىپ وتىر.

مىسالى، اتالعان اسكەري ءبولىمنىڭ 5 وقۋ ۆزۆودى 1 بولىمشەسىنىڭ سارباز اتقىشى قاتارداعى الەكسەي حان قىزىلوردا قالاسىندا ومىرگە كەلگەن. مەكتەپ بىتىرگەننەن كەيىن ول قىتاي حالىق رەسپبۋليكاسىنىڭ Nanchang ۋنيۆەرسيتەتىندە كومپيۋتەرلىك باعدارلاماشى ماماندىعى بويىنشا ءبىلىم العان. الەمنىڭ بىرنەشە ەلىن ارالاعان ول وڭتۇستىك كورەيادا ءبىر جىلعا جۋىق جۇمىس ىستەپ، استانا قالاسىنا ورالعان كەزدە اسكەرگە شاقىرىلعان.

Алексей Хан
Фото: ҚР ІІМ Ұлттық ұланының баспасөз қызметі

- 2024-جىلدىڭ جەلتوقسان ايىندا ۇلتتىق ۇلان ساپىنا الىندىم. ازىرگە جاۋىنگەرلىك وقۋ كۋرسىنان ءوتىپ جاتىرمىز. مۇندا ءبىزدى اسكەري تارتىپكە باۋلىپ، ساپتىق جۇرىسكە ۇيرەتتى. جاقىن كۇندەرى اسكەري انت قابىلدايمىز، - دەدى الەكسەي ۆلاديسلاۆوۆيچ.

اسكەرگە قوسىلعانىنا كوپ بولماسا دا جاس جاۋىنگەر قىزمەتتىڭ قىر-سىرىن ۇيرەنۋگە بارىن سالىپ ءجۇر. ازعانتاي ۋاقىتتىڭ ىشىندە قارۋلاستارىمەن ەتەنە ارالاسىپ، ءبىر ءۇيدىڭ بالالارىنداي بولىپ العان. اسكەري بولىمدەگى جاۋىنگەرلىك باۋىرمالدىقتىڭ ەرەكشە ەكەنىن ونىڭ قارۋلاسى راحيم شيراليەۆ تە راستاپ وتىر. 18 جاستاعى يراندىق راحيم جامالوۆيچ شىمكەنت قالاسىنىڭ تۋماسى. الايدا ول وسكەمەن قالاسىندا ەر جەتكەن. ول دا اسكەر قاتارىنا جاقىندا قوسىلعان.

Рахим
Фото: ҚР ІІМ Ұлттық ұланының баспасөз қызметі

- شىعىس قازاقستان وبلىسىنىڭ ورتالىعىندا وتباسىمىزبەن قۇرىلىسپەن شۇعىلدانامىز. مەكتەپتەن كەيىن كوللەدجدە قۇرىلىسشى ماماندىعىن الىپ شىققانمىن. ال قازىر وتان الدىنداعى بورىشىمدى وتەپ ءجۇرمىن. كومانديرلەرىمىز بىزدەرگە قامقورلىق تانىتىپ، اسكەري سالاعا ۇيرەتۋدە. ءوز باسىم، ۇلتتىق ۇلان اسكەرىنە كەلگەنىم ءۇشىن قۋانىشتىمىن، - دەدى قاتارداعى راحيم شيراليەۆ.

ايتا كەتەيىك، قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ 2024-جىلعى 22-ساۋىردەگى ەسەبى بويىنشا قازاقستاندا 90 نان استام ەتنوس وكىلدەرى مەكەندەيدى. ال بۇگىندە ولاردىڭ 30 عا جۋىعى ۇلتتىق ۇلان اسكەرى قاتارىندا قىزمەت اتقارىپ ءجۇر.

سوڭعى جاڭالىقتار