ۇلتتىق ەكونوميكا مينيسترلىگى تاكسي قىزمەتىنە قاتىستى ەرەجەگە وزگەرىس ەنگىزدى

ەندى تاسىمالداۋشى تاكسي قىزمەتىن باستاماس بۇرىن جەرگىلىكتى اتقارۋشى ورگانعا حابارلاما جىبەرۋگە مىندەتتى. سونىمەن قاتار، جاڭارتىلعان نىساندا كولىك قۇرالى اۋىستىرىلعاندا جانە جاڭادان كولىك قوسىلعاندا، ياعني اۆتوپاركتى جاڭارتۋ كەزىندە وزگەرىس ەنگىزۋ مۇمكىندىگى قاراستىرىلعان.

بۇرىنعى ءتارتىپ بويىنشا، تاسىمالداۋشى بەلگىلى ءبىر كولىك قۇرالىنا بايلانبايتىن. بۇل جول- كولىك وقيعاسى كەزىندە جولاۋشىلارعا نەمەسە ءۇشىنشى تۇلعاعا زيان كەلتىرىلگەن جاعدايدا جاۋاپتى ادامدى انىقتاۋدى قيىنداتاتىن.

وسىعان بايلانىستى حابارلاما نىسانى كولىك قۇرالىنىڭ ماركاسىن، مەملەكەتتىك تىركەۋ ءنومىرىن جانە شىعارىلعان جىلىن كورسەتەتىن مالىمەتپەن تولىقتىرىلدى.

- بۇل شارا جولاۋشىلاردى تاسىمالداۋ قاۋىپسىزدىگىنە جاۋاپتى تاكسي تاسىمالداۋشىسىن جەدەل سايكەستەندىرۋگە، سونداي-اق نارىققا زاڭسىز قاتىسۋشىلاردىڭ ۇلەسىن قىسقارتۋعا مۇمكىندىك بەرەدى، - دەلىنگەن حابارلامادا.

ايتا كەتەيىك، اتالعان وزگەرىستەر «مەملەكەتتىك ورگانداردىڭ حابارلامالار نىساندارىن جانە حابارلامالاردى قابىلداۋ قاعيدالارىن بەكىتۋ تۋرالى، سونداي- اق حابارلامالاردى قابىلداۋدى جۇزەگە اسىراتىن مەملەكەتتىك ورگانداردى ايقىنداۋ تۋرالى» قازاقستان رەسپۋبليكاسى ۇلتتىق ەكونوميكا ءمينيسترىنىڭ 2015 -جىلعى 6-قاڭتارداعى №4-بۇيرىعىنا وزگەرىستەر ەنگىزۋ تۋرالى» بۇيرىققا ەنگىزىلدى.

وسىعان دەيىن سەناتور بيبىگۇل جەكسەنباي تاكسيدە جۇمىس ىستەيتىندەردىڭ قۇقىعىن قورعاۋدى كۇشەيتۋ كەرەكتىگىن ايتقان بولاتىن.