ۇلتتىق جوبالار مەن ەكونوميكالىق دامۋ: استانادا كۋرسيۆ ينفراقۇرىلىمدىق فورۋمى وتەدى

استانا. قازاقپارات - 2025 - جىلدىڭ 23-قىركۇيەگىندە استانادا قازاقستاننىڭ ەكونوميكالىق دامۋىنا ۇلتتىق جوبالاردىڭ اسەرىن تالقىلايتىن اۋقىمدى شارا وتەدى.

ۇلتتىق جوبالاردى قازاقستان ەكونوميكاسىنىڭ باستى قوزعاۋشى كۇشى دەپ اتاۋعا تولىق نەگىز بار. مەملەكەت لوگيستيكاعا، كولىك ينفراقۇرىلىمىنا، الەۋمەتتىك باستامالارعا ميللياردتاعان قارجى قۇيىپ وتىر. بۇل باعىتتا ونداعان جوبا جۇزەگە اسىرىلدى، جيناقتالعان تاجىريبە دە از ەمەس. ارينە، تابىستارمەن بىرگە شەشۋدى قاجەت ەتەتىن تۇيتكىلدەر دە بار. سوندىقتان قاي ناتيجەگە قول جەتكىزگەنىمىزدى باعامداپ، ءالى دە جەتىلدىرۋ ءۇشىن قانداي وزگەرىستەر قاجەت ەكەنىن ءتۇسىنىپ، بۇگىنگى جەتىستىكتەردى ۇزاق مەرزىمدى دامۋ تىرەگىنە اينالدىرۋ جولدارىن ايقىنداۋ اسا ماڭىزدى. ول ءۇشىن جان-جاقتى تالداۋ مەن اشىق پىكىر الماسۋ قاجەت.

- ەل ەكونوميكاسىنىڭ اۋقىمىنا قاراساق، سالىنعان ءاربىر جاڭا جول، قايتا جوندەلگەن ۆوكزال نە مەكتەپ - جاي عانا قۇرىلىس نىسانى ەمەس، ىشكى نارىقتى كەڭەيتۋدىڭ ماڭىزدى قۇرالى. مىسالى، كولىك بايلانىسى جاقسارسا، الماتىدان پەتروپاۆلعا تاۋاردى جەتكىزۋ بىرنەشە ساعاتتىق شارۋاعا اينالادى، ال شىمكەنتتىڭ فەرمەرى استانانىڭ ءىرى نارىعىنا تىكەلەي شىعا الادى. بۇل بيزنەستىڭ ترانزاكتسيالىق شىعىندارىن ازايتىپ، لوگيستيكانى « تۇساۋدان» بوساتىپ، كەرىسىنشە باسەكەگە قابىلەتتىلىكتىڭ شەشۋشى فاكتورىنا اينالدىرادى. وسىنداي مىسالدى مەملەكەت جۇزەگە اسىرىپ جاتقان كەز كەلگەن ءىرى جوباعا قاتىستى ايتۋعا بولادى. ويتكەنى مۇنداي باستامالار - شىعىن ەمەس، ۇزاقمەرزىمدى ەكونوميكالىق ءوسىم مەن ادامي كاپيتالدى دامىتۋعا سالىنعان ينۆەستيتسيا. دەگەنمەن ۇلتتىق جوبالاردىڭ تىم اۋقىمدى بولۋى بەلگىلى ءبىر قيىندىقتاردى دا تۋىنداتاتىنى جاسىرىن ەمەس. كەيدە ولاردىڭ سالدارىنان تۇتاس وڭىرلەر نەمەسە جەكەلەگەن سالالاردىڭ اراسىندا الشاقتىق پايدا بولۋى مۇمكىن. وسىنداي جاعدايدا باسقارۋدىڭ ساپاسى شەشۋشى ءرول اتقارادى. ءتۇپتىڭ تۇبىندە ءاربىر ينفراقۇرىلىمدىق باستاما ەل دامۋىنا سينەرگيا قوسىپ، وزگەرىستەردىڭ ءبىرىڭعاي جۇيەسىنە ەنۋى قاجەت. تەك وسىنداي كوزقاراس قانا اۋقىمدى جوبالاردى جاھاندىق نارىقتاعى شىنايى باسەكەگە قابىلەتتىلىكتىڭ قۇرالىنا اينالدىرا الادى، - دەپ اتاپ ءوتتى Kursiv Media باس ديرەكتورى اناستاسيا نوۆيكوۆا.

فورۋم اياسىندا ءۇش سەسسيا وتەدى. ءارقايسىسىندا قاتىسۋشىلار مەملەكەتتىك ينفراقۇرىلىمدىق جوبالاردىڭ ناتيجەلەرىن كوپشىلىككە ۇسىنىپ، كولىك پەن ەنەرگەتيكا سالاسىنداعى ءىرى باستامالاردىڭ اۋقىمى مەن ولاردىڭ ۇلتتىق ەكونوميكاعا تيگىزەر ىقپالىن تالقىلايدى.

« ينفراقۇرىلىمدىق جوبالار ق ر ەكونوميكالىق دامۋىنىڭ قازىرگى مودەلىنىڭ «توعىسۋ نۇكتەسى» رەتىندە» اتتى پلەنارلىق سەسسيادا ساراپشىلار ينفراقۇرىلىمدىق جوبالاردىڭ ەل ەكونوميكاسىن دامىتۋداعى رولىنە توقتالادى. سونىمەن قاتار الەۋمەتتىك ينفراقۇرىلىمنىڭ ۇلتتىق ادامي كاپيتالدى ارتتىرۋ مىندەتتەرىنە سايكەستىگى، ال كولىك- لوگيستيكا كەشەنىنە سالىنعان ينۆەستيتسيالاردىڭ ەل ىشىندەگى بايلانىستى كۇشەيتىپ، ەكسپورت الەۋەتىن كەڭەيتۋگە قوسقان ۇلەسى تالدانادى.

« جايلى مەكتەپ» ۇلتتىق پيلوتتىق جوباسى - مەملەكەتتىك ينستيتۋتتاردىڭ بەرىكتىگىن سىنايتىن تاجىريبە الاڭى» دەپ اتالاتىن ءبىرىنشى پانەلدىك سەسسيادا جوبانىڭ قۇرىلىس سالاسىنا تيگىزگەن اسەرى ءسوز بولادى. قاتىسۋشىلار ۇلتتىق جوبا اياسىنان تىس جاتقان قۇرىلىس نارىعىنىڭ بولاشاعىن دا قوزعايدى.

« ەكونوميكالىق دامۋ ينفراقۇرىلىمى: تانىس باعدارلار، جاڭا مۇمكىندىكتەر» اتتى ەكىنشى پانەلدىك سەسسيا لوگيستيكا مەن ينفراقۇرىلىم ماسەلەلەرىنە ارنالادى. وندا كولىك جانە ەنەرگەتيكا ينفراقۇرىلىمىنىڭ قۇرىلىسى كەزىندە وتاندىق وندىرۋشىلەردىڭ مۇددەسى قانشالىق ەسكەرىلگەن جانە سالىنعان نىسانداردىڭ قانشالىقتى ءتيىمدى پايدالانىلىپ جاتقانى تالقىلانباق.

ءىس-شارا 23-قىركۇيەك ساعات 12:00-دەن 18:30-عا دەيىن Rixos President Astana قوناق ۇيىندە وتەدى. قاتىسۋ تەگىن. تىركەلۋ ءۇشىن سىلتەمەگە ءوتۋ قاجەت.

بۇدان بۇرىن استانادا 15 ەلدىڭ كونستيتۋتسيالىق سوتى قاتىسقان حالىقارالىق فورۋم ۇيىمداستىرىلعانىن جازعان ەدىك.