ۇلتتىق بانك جاڭا الاياقتىق سحەما تۋرالى ەسكەرتتى

استانا. KAZINFORM - قازاقستان ۇلتتىق بانكى قۇندى زاتتاردى ينكاسساتسيالاۋ قىزمەتىمەن بايلانىستى الاياقتىقتىڭ جاڭا سحەماسى جايلى ەسكەرتتى.

Национальный банк Казахстана Қазақстан Ұлттық банкі
Фото: Адлет Беремкулов/ Kazinform

قازاقستان ۇلتتىق بانكى قۇندى زاتتاردى ينكاسساتسيالاۋ قىزمەتىن ۇسىناتىن كومپانيالاردىڭ ءتۇرلى ينتەرنەت-رەسۋرستاردا جاريالاناتىن حابارلامالارىنا ساق بولۋ كەرەك ەكەنىن ەسكەرتەدى. سەبەبى ولاردىڭ اراسىندا ءتيىستى قۇب ليتسەنزياسى جوق كومپانيالار دا كەزىگىپ جاتادى.

«اتاپ ايتقاندا، وزگە ۇيىمعا بەرىلگەن قۇب ليتسەنزياسىنىڭ رەكۆيزيتتەرىن زاڭسىز پايدالانىپ جۇرگەندەر بار. سونداي دەرەكتىڭ ءبىرى ءوزىن «Brinks» ينكاسساتسيا قىزمەتى» ج ش س دەپ اتايتىن ۇيىم سايتىندا (ونى شەتەلدىك The Brink's Company ينكاسساتورلىق كومپانياسىمەن شاتاستىرۋعا بولمايدى) ورنالاستىرىلعان. سول ارقىلى بۇل كومپانيا ءوز قىزمەتىنىڭ زاڭدى ەكەنىن كورسەتۋگە تىرىسقان»، - دەلىنگەن حابارلامادا.

وسىنداي ۇيىمدارمەن شارت جاساسىپ، ولارعا قۇندى زاتتاردى ينكاسساتسياعا بەرۋ - تاۋەكەلى جوعارى ءىس.

قۇب ازاماتتار مەن زاڭدى تۇلعالاردى ساق بولۋعا جانە ينكاسساتسيا بويىنشا قىزمەتتەردى جۇزەگە اسىرۋعا ليتسەنزياسى بار ۇيىمداردىڭ قىزمەتىن پايدالانۋعا شاقىرادى.

بەلگىلى ءبىر ۇيىمدا ليتسەنزيانىڭ بار-جوعىن تەكسەرۋ ءۇشىن قۇب سايتىندا ورنالاستىرىلعان ءتيىستى ليتسەنزياسى بار ۇيىمداردىڭ رەسمي تىزىلىمىمەن تانىسۋ قاجەت.

سوڭعى جاڭالىقتار