ۇلەسكەرلەردى قورعاۋ: سالىنىپ جاتقان تۇرعىن ءۇيدى تەك قولما-قول اقشاسىز ساتىپ الۋعا بولادى
استانا. KAZINFORM - بۇگىن سەناتتىڭ جالپى وتىرىسىندا «كەيبىر زاڭنامالىق اكتىلەرگە تۇرعىن ءۇي قۇرىلىسىنا ۇلەستىك قاتىسۋ، اۆتوموبيل جولدارى جانە مۇگەدەكتىگى بار ادامداردى تاسىمالداۋ جونىندەگى قىزمەتتەردى كورسەتۋ ماسەلەلەرى بويىنشا وزگەرىستەر ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.
زاڭ ۇلەستىك قۇرىلىس سالاسىن مەملەكەتتىك رەتتەۋدى كۇشەيتۋگە، زاڭسىز قۇرىلىس ۇلەسىن قىسقارتۋعا، مۇگەدەك ادامداردىڭ ءومىر ءسۇرۋ ساپاسىن جاقسارتۋعا، اۆتوجول سالاسىنىڭ كادرلىق الەۋەتىن ارتتىرۋعا باعىتتالعان.
- ونەركاسىپ جانە قۇرىلىس مينيسترلىگىنىڭ اقپاراتتى بويىنشا ەلىمىزدە تۇرعىن-ءۇي ۇلەستىك قۇرىلىسىن سالۋ باعىتىندا 99 ءۇي رۇقساتسىز سالىنعان جانە 42 پروبلەمالىق ءۇي بار. وسى فاكتورلار كەيبىر قۇرىلىس سالۋشىلار ازاماتتىق قاتىناستارعا سىلتەمە جاساي وتىرىپ، جەكە تۇلعالارمەن ءارتۇرلى كەلىسىمشارتتار جاسايتىندىعىنا بايلانىستى. بۇل ءوز كەزەگىندە ازاماتتاردىڭ قۇقىقتارى مەن مۇددەلەرىن قورعاۋدىڭ ءتيىستى دەڭگەيىن قامتاماسىز ەتپەۋ جانە نىسانداردى تاپسىرۋ مەرزىمدەرىن كەشىكتىرۋ، ساپاسىز قۇرىلىس پەن ۇلەسكەرلەر ءۇشىن شىعىندار سياقتى جاعىمسىز سالدارعا اكەلىپ وتىر. وسىعان بايلانىستى تۇرعىن ءۇي قۇرىلىسى قىزمەتىنىڭ اشىقتىعىن، مامىلەلەردىڭ قاۋىپسىزدىگىن، ۇلەسكەرلەردىڭ اقشاسىن ماقساتتى پايدالانۋدى قامتاماسىز ەتۋگە، الەۋمەتتىك شيەلەنىستى جانە بيۋدجەتكە تۇسەتىن جۇكتەمەنى تومەندەتۋگە باعىتتالعان شارالاردى قابىلداۋ ماقساتىندا وسى زاڭمەن ءتيىستى نەگىزگى نوۆەللالار كوزدەلگەن، - دەدى سەناتور سۇيىندىك الداشيەۆ.
وسى ورايدا تۇرعىن ءۇي قۇرىلىسىنا ۇلەستىك قاتىسۋ بولىگىندە سالىنىپ جاتقان ۇيلەردە تۇرعىن جانە تۇرعىن ەمەس ءۇي- جايلاردى ساتىپ الۋعا بايلانىستى الدىن الا شارتتار جاساسۋعا تىيىم سالۋ، ۇلەسكەرلەردىڭ قارجىلارىن تارتۋعا رۇقساتسىز جارناماعا تىيىم سالۋ، سالىنىپ جاتقان تۇرعىن ءۇي نارىعىندا ۇلەسكەرلەردىڭ اقشاسىن تارتۋدىڭ زاڭدىلىعى بولىگىندە جەرگىلىكتى اتقارۋشى ورگانداردىڭ (ج ا و) باقىلاۋ جۇرگىزۋى ەسكەرىلگەن.
مۇنىمەن قوسا، سالىنىپ جاتقان كوپ قاباتتى تۇرعىن ۇيدە جىلجىمايتىن مۇلىك ساتىپ الۋعا يپوتەكاعا تىيىم سالۋدى، سونداي-اق سالىنىپ جاتقان تۇرعىن ءۇيدى تەك قولما-قول اقشاسىز نىساندا ساتىپ الۋ- ساتۋ بويىنشا مامىلەلەر جۇرگىزۋدى، تۇرعىن ءۇي قۇرىلىسىنىڭ ۇزارتۋ مەرزىمىن 9 ايدان 5 ايعا دەيىن قىسقارتۋدى كوزدەيدى.
- حالىقتىڭ مۇددەلەرىن قورعاۋ ماقساتىندا ازاماتتارعا تۇرعىن ءۇيدى قاۋىپسىز ساتىپ الۋ تۋرالى كەڭەس بەرۋ، بەلگىلى ءبىر قۇرىلىس سالۋشىلاردا جاو رۇقساتىنىڭ نەمەسە ءبىرىڭعاي وپەراتوردىڭ كەپىلدىگىنىڭ بولۋى تۋرالى اقپارات بەرۋ ءۇشىن ۇلەسكەرلەردى قولداۋ ورتالىعى قۇرىلادى. سونىمەن قاتار، از قاباتتى قۇرىلىستى دامىتۋ ماقساتىندا «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭىنىڭ رەتتەۋ سالاسىنا «جەكە تۇرعىن ۇيلەر كەشەنى» ۇعىمى ەنگىزىلەدى، - دەدى دەپۋتات.
بۇدان بولەك، بۇل زاڭدا جالپىعا ورتاق پايدالانىلاتىن اۆتوموبيل جولدارىنىڭ ساپاسىن ارتتىرۋ باعىتىندا تومەندەگىدەي وزگەرىستەر ەسكەرىلگەن: - مەردىگەرلەر مەن جوبالاۋشىلاردى قوسا العاندا، سالانىڭ بارلىق قاتىسۋشىلارى ءۇشىن اشىقتىقتى قامتاماسىز ەتۋ ءۇشىن جول- قۇرىلىس ماتەريالدارى مەن تەحنولوگيالارى بويىنشا ءبىرىڭعاي اقپاراتتىق جۇيەنى ەنگىزۋ؛ - تەحنيكالىق جانە اۆتورلىق قاداعالاۋدى جۇزەگە اسىراتىن ادامدار «سىبايلاس جەمقورلىققا قارسى ءىس- قيمىل تۋرالى» زاڭىنىڭ سۋبەكتىلەرىنە تەڭەستىرىلەدى.
- مۇگەدەكتىگى بار ادامداردى ينۆاتاكسيدە تاسىمالداۋ بولىگىندە ءتيىستى نورمالار ەنگىزىلدى. وڭىرلەردە مۇگەدەكتىگى بار ادامداردىڭ كوپ سانىن قامتۋعا مۇمكىندىك بەرەتىن الەۋمەتتىك قىزمەتتەر پورتالى ارقىلى ينۆاتاكسي قىزمەتتەرىن كورسەتۋ مۇمكىندىگىن كەڭەيتۋ قاراستىرىلدى (قازىرگى ۋاقىتتا ينۆاتاكسي قىزمەتتەرىن مەملەكەتتىك ساتىپ الۋ ارقىلى جەتكىزۋشىلەر كورسەتەدى)، - دەدى سۇيىندىك الداشيەۆ.
