LRT ستانسالارىندا دۇكەن مەن ءدامحانا بولمايدى
استانا. KAZINFORM - استاناداعى LRT ستانسالارىندا دۇكەندەر مەن ءدامحانالار اشىلمايدى. بۇل تۋرالى «City Transportation Systems» ج ش س باسقارما ءتوراعاسى اسىلبەك دۇيسەبايەۆ ءبىرىڭعاي ديسپەتچەرلىك ورتالىقتى تانىستىرۋ كەزىندە ايتتى.
ونىڭ سوزىنشە، ءورت قاۋىپسىزدىگى تالاپتارىنا بايلانىستى LRT اۋماعىندا ساۋدا جانە قوعامدىق تاماقتانۋ ورىندارى بولمايدى.
دەگەنمەن ستانسالاردا جولاۋشىلارعا ارنالعان ارنايى ساۋدا اۆتوماتتارى ورناتىلادى. ولار ارقىلى كوفە، سۋ مەن تىسكەباسار ساتىپ الۋعا بولادى.
CTS مالىمەتىنشە، LRT ىسكە قوسىلعان العاشقى كەزەڭدە تاۋلىگىنە 25 مىڭنان 45 مىڭعا دەيىن جولاۋشى تاسىمالدانادى دەپ جوسپارلانىپ وتىر.
سونىمەن قاتار جولاقىسىن Face ID جۇيەسى، سمارتفون، سمارت ساعات جانە بانك قوسىمشالارى ارقىلى تولەۋگە بولادى.
ايتا كەتەيىك، 12-مامىر كۇنى LRT ۆاگوندارى جۋرناليستەرگە تانىستىرىلدى. ال جولاۋشىلار ءۇشىن جەلىنى 16-17-مامىردا اشۋ جوسپارلانىپ وتىر.
