ەلەنا رىباكينا اۋسترالياداعى تاعى ءبىر ءىرى جارىستى ءساتتى باستادى

  قازاقستاننىڭ ءبىرىنشى، الەمنىڭ 3-راكەتكاسى ەلەنا رىباكينا ادەلايدە (اۋستراليا) WTA 500 ءتۋرنيرىن ءساتتى باستادى، دەپ حابارلايدى Kazinform.

جارىستىڭ 1-راكەتكاسى بولىپ تىركەلگەن قازاقستاندىق تەننيسشى ەكىنشى اينالىمدا دۇنيەجۇزىلىك رەيتينگىدە 61-ورىندا تۇرعان ءتۇبى مولدوۆالىق، يسپانيا وكىلى كريستينا بۋچامەن كورتقا شىقتى.

ءبىرىنشى پارتيا ورتاسىندا ە. رىباكينا برەيك جاساي ءبىلدى - 6:3.

ەلەنا ەكىنشى سەتتى برەيكپەن باستادى - 2:0. دەگەنمەن كريستينا تارازى باسىن تەڭەستىرە الدى - 3:3. ەسەپ 5:5 بولعان مەزەتتە رىباكينا تاعى ءبىر برەيككە قول جەتكىزدى. اقىرى ەكىنشى ماتچبولىن ەيسپەن تۇيىندەدى - 7:5.

ساعات جارىمعا سوزىلعان باسەكەدە ەلەنا 11 برەيك جاساپ، 5 برەيك- پوينتتىڭ ۇشەۋىن ءوز ەسەبىنە جازدى. ك. بۋچا 1 ەيس، 1 برەيكپەن (8 برەيك- پوينت) كوزگە ءتۇستى.

وسىلايشا، دودانى ەكىنشى اينالىمنان باستاعان قازاقستاندىق تەننيسشى شيرەك فينالعا جولداما الدى.

ەلەنا رىباكينا جارتىلاي فينالعا شىعۋ ءۇشىن رەسەيلىكتەر، الەمنىڭ 16-راكەتكاسى ۆەرونيكا كۋدەرمەتوۆا نەمەسە رەيتينگىدە 21-ساتىداعى ەكاتەرينا الەكساندروۆانىڭ قاي جەڭگەنىمەن تالاسادى.

ەسكە سالا كەتەيىك، بۇدان بۇرىن بەيبىت جۇقايەۆتىڭ اۋستراليا اشىق چەمپيوناتىن جەڭىسپەن باستاعانىن جازعان بولاتىنبىز.

سونداي-اق الەكساندر نەدوۆەسوۆ اۋسترالياداعى ءتۋرنيردىڭ شيرەك فينالىنا شىقتى.

الەكساندر بۋبليك 21 ەيس جاساپ، ادەلايدە تۋرنيرىنىڭ شيرەك فينالىنا ءوتتى.