ەلەكتروندىق ەڭبەك بيرجاسى: ەلىمىزگە 60 مىڭ مامان قاجەت
استانا. KAZINFORM - ەلەكتروندىق ەڭبەك بيرجاسىندا 60 مىڭعا جۋىق بوس جۇمىس ورنى بار. بۇل تۋرالى Jibek Joly ارناسىنىڭ «بۇگىن LIVe» باعدارلاماسىنا سۇحبات بەرگەن ق ر ەڭبەك جانە حالىقتى الەۋمەتتىك قولداۋ مينيسترلىگىنىڭ مامانى مالىمدەدى.
- ق ر ەڭبەك جانە حالىقتى الەۋمەتتىك قولداۋ مينيسترلىگى 2018 -جىلدىڭ قاڭتار ايىنان باستاپ ەلەكتروندىق ەڭبەك بيرجاسىن ازىرلەپ، پايدالانۋعا بەردى. بۇل پورتالدىڭ ماقساتى - ازاماتتاردى جۇمىسقا ورنالاستىرۋ جانە جۇمىس بەرۋشىلەرگە قولداۋ كورسەتۋ. ەلەكتروندىق ەڭبەك بيرجاسى - ەلىمىزدەگى ەڭ باستى تسيفرلىق الاڭ. بىزگە جىل سايىن 800 مىڭنان استام جۇمىس ورىندارى مەن تۇيىندەمەلەر ورنالاستىرىلادى. جانە جىل سايىن 400 مىڭ ادام وسى پورتال ارقىلى جۇمىس تابادى. وسى پورتال جۇمىسىن باستاعالى بەرى 3 ميلليون ادامدى جۇمىسقا ورنالاستىردى. ونىڭ ىشىندە 2 ميلليون ادام تۇراقتى جۇمىسقا ورنالاستى. قالعان 1 ميلليونى ۋاقىتشا جۇمىسقا تۇردى. ءدال قازىرگى تاڭدا بۇل پلاتفورمادا 59 مىڭداي بوس جۇمىس ورىندارى بار، - دەيدى حالىقتى جۇمىسپەن قامتۋ دەپارتامەنتىنىڭ باس ساراپشىسى جانار مۇسابەكوۆا.
دەسە دە، مۇنداي بوس جۇمىس ورىندارىنا كەز كەلگەن ادام ورنالاسا المايدى. قازاقستان رەسپۋبليكاسىنىڭ ازاماتتارىن ەل اۋماعىندا جۇمىسقا ورنالاستىرۋ تالاپتارى ەڭبەك كودەكسىمەن رەتتەلەدى. ستۋديادا قوناق بولعان بالالاردىڭ قۇقىعىن قورعاۋ كوميتەتىنىڭ باس ساراپشىسى ءدال وسى شارتتاردى ءتۇسىندىردى.
- بۇل كودەكسكە سايكەس، ەڭبەك شارتى 16 جاستان باستاپ جاسالادى. تاعى ايتىپ كەتەتىن جاعداي: ەگەر كامەلەتكە تولماعان، ءبىراق جالپى ورتا ءبىلىمدى اياقتاعان بالا بولسا - 15 جاستان باستاپ؛ ەگەر دەنساۋلىعىنا ەشقانداي زيان كەلتىرمەيتىن جۇمىس بولسا - 14 جاستان باستاپ ەڭبەك شارتى جاسالادى. سونىمەن قاتار، سيرك، تەاتر، كينو ۇيىمدارىندا 14 جاسقا دەيىنگى بالالار دا جۇمىس ىستەي الادى. ءبىراق ول بالانىڭ زاڭدى وكىلى مىندەتتى تۇردە ەڭبەك شارتىمەن تانىسىپ، قول قويىپ، بالاسىنىڭ جۇمىس بارىسىن باقىلاۋعا مىندەتتى، - دەيدى البينا زالمۇقانوۆا.
مامان كامەلەت جاسقا تولماعان بالالاردىڭ زاڭعا سايكەس ەڭبەك ەتۋ تالاپتارىنا توقتالدى.
- ءبىزدىڭ ەلىمىزدىڭ زاڭناماسىنا سايكەس، 14- 16 جاس ارالىعىنداعى بالالارعا اپتاسىنا 24 ساعاتتان اسپايتىن كولەمدە جۇمىس ىستەۋگە رۇقسات ەتىلەدى. جانە دەنساۋلىعىنا زيان، ومىرىنە قاۋىپ توندىرەتىن اۋىر جۇمىستارعا بالالاردى تارتۋعا قاتاڭ تىيىم سالىنادى. بالانىڭ ءومىرى مەن قاۋىپسىزدىگىنە ەڭ ءبىرىنشى جاۋاپتى - ونىڭ اتا- اناسى. اتا- انالار بالالارىنىڭ قانشا ساعات، قانداي جۇمىس ىستەپ جاتقانىن باقىلاۋعا الۋ كەرەك، - دەيدى قر ەڭبەك جانە حالىقتى الەۋمەتتىك قولداۋ مينيسترلىگىنىڭ قىزمەتكەرى.
ايتا كەتەيىك، بۇعان دەيىن «بۇگىن LIVe» باعدارلاماسىندا زاڭگەر كاسىپكەرلەردىڭ جۇمىسشىلاردى تەگىن تاجىريبەدەن وتكىزۋى زاڭسىز دەگەن پىكىر بىلدىرگەن ەدى.
