«ۇلكەن جەتىلىك» ەلدەرىنىڭ سىرتقى ىستەر مينيسترلەرى يزرايل مەن پالەستيناعا قاتىستى مالىمدەمە جاسادى
«ۇلكەن جەتىلىك» ەلدەرىنىڭ سىرتقى ىستەر مينيسترلەرى يزرايل مەن گازاداعى جاعدايعا بايلانىستى ورتاق مالىمدەمە جاسادى، دەپ حابارلايدى Kazinform مەنشىكتى ءتىلشىسى.
ا ق ش مەملەكەتتىك دەپارتامەنتى جاريالاعان مالىمدەمەدە كانادا، فرانسيا، گەرمانيا، يتاليا، جاپونيا، بىرىككەن كورولدىك پەن امەريكا قۇراما شتاتتارىنىڭ سىرتقى ىستەر مينيسترلەرى تۇتقىنداردى بوساتىپ، گازا تۇرعىندارىنا كوبىرەك گۋمانيتارلىق كومەك جەتكىزە الۋ ءۇشىن سوعىسقا ءۇزىلىس جاساۋدى قۇپتايتىنى ايتىلعان.
سونداي-اق G7 بارلىق تۇتقىندى دەرەۋ جانە ءسوزسىز بوساتۋعا، جانجال اۋماعىنان شەت ەل ازاماتتارىن شىعارۋدى جەڭىلدەتۋگە شاقىردى.
سونىمەن قاتار «ۇلكەن جەتىلىك» يزرايل ءوزىن جانە ءوز حالقىن بيىلعى 7-قازانداعى جاعداي قايتالانباس ءۇشىن حالىقارالىق قۇقىققا سايكەس قورعاي الاتىنىن اتاپ ءوتتى.
«G7 سىرتقى ىستەر مينيسترلەرى ەكى مەملەكەتتىڭ دە بولۋى ءۇشىن پالەستينا مەملەكەتىن قۇرۋ قاجەت دەپ سانايدى. بۇل يزرايلدىكتەرمەن قاتار پالەستينالىقتارعا دا ءادىل، مىقتى جانە قاۋىپسىز قوعامدا ءومىر سۇرۋگە مۇمكىندىك بەرەدى»، - دەلىنگەن مالىمدەمەدە.
قۇراما شتاتتار مەن وڭىردەگى ەلدەردىڭ، اسىرەسە كاتار مەن مىسىردىڭ وق جاۋدىرۋدى توقتاتۋدى قامتاماسىز ەتۋدەگى ۇلەسى، سونداي-اق گۋمانيتارلىق كومەك جەتكىزۋدى ۇيلەستىرۋدە ب ۇ ۇ قولداۋى اتاپ ءوتىلدى.
G7 تەڭىزدەگى قاۋىپسىزدىكتىڭ ماڭىزدى ەكەنىن ايتىپ، بارلىق تاراپتى حالىقارالىق تەڭىز جولدارىمەن جانە كوممەرتسيلىق كەمەلەرمەن قورقىتپاۋعا، سونداي-اق حۋسيتتەردى شابۋىلدى توقتاتىپ، بيىل 19-قاراشادا حالىقارالىق سۋلاردا زاڭسىز باسىپ الىنعان «Galaxy Leader» كەمەسىنىڭ ەكيپاجىن دەرەۋ بوساتۋعا شاقىردى.
