پلاگيات، پارا، قۇپيالىق: عالىمدارعا قويىلاتىن ادەپ ۇلگىلەرى جاريالاندى
استانا. KAZINFORM - عىلىم جانە جوعارى ءبىلىم مينيسترلىگى عىلىمي ادەپ ۇلگىلەرى تۋرالى بۇيرىق جوباسىن كوپشىلىك تالقىلاۋىنا شىعاردى.
قازاقستان اۋماعىندا جۇمىس ىستەيتىن عالىمدارعا قويىلاتىن ادەپ ۇلگىلەرىنىڭ قاعيداتى «عىلىم جانە تەحنولوگيالىق ساياسات تۋرالى» زاڭنىڭ تالاپتارىنان تۋىنداپ وتىر. ۇسىنىلىپ وتىرعان عىلىمي ادەپ ۇلگىلەرى 11 پرينتسيپتەن تۇرادى. ونىڭ ىشىندە ءاربىر عالىم عىلىمي زەرتتەۋ قورىتىندىسى بويىنشا ۇسىنىپ وتىرعان مالىمدەمەسىنىڭ گيپوتەزا ەكەنىن، ءىشىنارا نەمەسە تولىق دالەلدەنگەن ەرەجە ەكەنىن اشىپ كورسەتۋ كەرەكتىگى ايتىلعان.
«بۇرىن ورىندالعان زەرتتەۋلەر مەن جاريالانعان ناتيجەلەردى جاڭا زەرتتەۋلەر رەتىندە ۇسىنۋعا جول بەرىلمەيدى»، - دەپ جازىلعان.
ال زەرتتەۋ نىسانى رەتىندە ادامدار مەن جانۋارلار تارتىلسا، بيوەتيكا جونىندەگى كوميسسيانىڭ ماقۇلداۋىن الۋ قاجەت. قۇجاتتا وزگە عالىمدار مەن زەرتتەۋشىلەردى كەمسىتىپ، قۋدالاۋ دا عىلىمي ادەپكە جات ەكەنى ايتىلعان.
«ۇلتتىق عىلىمي، ديسسەرتاتسيالىق كەڭەستەر مەن كوميسسيا مۇشەلەرىنىڭ، ساراپشىلار مەن رەتسەنزەنتتەردىڭ وبەكتيۆتىلىگىنە اسەر ەتۋى مۇمكىن ارەكەتتەرگە جول بەرىلمەيدى»، - دەپ جازىلعان بۇيرىق جوباسىندا.
سونداي- اق، عىلىمي ادەپ قاعيداتى زەرتتەۋ بارىسىندا الىنعان قۇپيا اقپاراتتى تاراتۋعا جول بەرمەيتىنى اتاپ كورسەتىلگەن.
