لاڭكەستەر يزرايل پرەمەر-ءمينيسترىنىڭ ۇيىنە درونمەن سوققى بەرمەكشى بولدى

استانا. KAZINFORM - يزرايلدىڭ كەساريا قالاسىندا ليۆاننان ۇشىرىلعان درون ءبىر عيماراتقا سوققى بەردى. پرەمەر-مينيستر بينيامين نەتانياحۋ كەڭسەسىنىڭ مالىمەتىنشە، شابۋىلدىڭ نىساناسى ونىڭ ءۇيى بولعان، دەپ جازادى BILD.

يزرايل ۇكىمەتىنىڭ باسشىسى مەن ونىڭ ايەلى بۇل ۋاقىتتا عيماراتتا بولماعان. ازىرگە زارداپ شەككەندەر تۋرالى اقپارات تۇسكەن جوق.

تساحال «سوڭعى ءبىر ساعات ىشىندە يزرايل اۋماعىنا ليۆاننان كىرگەن ءۇش درون انىقتالعانىن مالىمدەدى. تاعى ءبىر درون كەساريا ايماعىنداعى عيماراتقا سوعىلدى. زارداپ شەككەندەر تىركەلگەن جوق. وقيعا كەزىندە گليلوت اسكەري بازاسىندا سيرەنالار ىسكە قوسىلدى. تاعى ەكى درون ۇستالدى.

تەل-اۆيۆتە دە اۋە شابۋىلى تۋرالى دابىل قاعىلدى. درونداردىڭ ءبىرى يزرايلدىڭ سىرتقى بارلاۋ قىزمەتى موسساد پەن باسقا دا بارلاۋ اگەنتتىكتەرىنىڭ شتاب-پاتەرى ورنالاسقان گليلوت ايماعىنا بارا جاتقان.

ارميانىڭ مالىمەتىنشە، يزرايلدىڭ سولتۇستىگىندەگى ءبىرقاتار ەلدى مەكەندەردە دە سيرەنالار ويناعان.

بۇعان دەيىن يزرايل حاماس جەتەكشىسى ياحيا سينۆاردىڭ گازا سەكتورىندا ولتىرىلگەنىن راستادى. يزرايل پرەمەر-ءمينيسترى بينيامين نەتانياحۋ يزرايلدىڭ نەگىزگى تەلەارنالارىندا سويلەگەن سوزىندە حاماس بۇدان بىلاي گازا سەكتورىندا بيلىك جۇرگىزبەيتىنىن اتاپ ءوتتى.

وسىعان دەيىن گازاعا ءۇش ايدان كەيىن العاش رەت اۋەدەن گۋمانيتارلىق كومەك تاستالعانىن جازدىق.