كەزىندە ءوزىم سۋدان قۇتقارعان بالا ەرجەتىپ، ۇيلەنۋ تويىنا شاقىردى - قۇتقارۋشى
وسكەمەن. KAZINFORM - شىعىس قازاقستان وبلىسى كۇرشىم اۋدانىندا قۇتقارۋشى بولىپ جۇمىس ىستەيتىن نۇرجان جولجاقسىنوۆ سۋعا باتىپ بارا جاتقان تالاي ادامدى امان الىپ قالعان. بيىل دا بۇقتىرمادا 13 جاستاعى جەتكىنشەكتى قۇتقارىپ قالعانى بار. 19-قازان - قۇتقارۋشىلار كۇنىنە وراي Kazinform ءتىلشىسى ونى اڭگىمەگە تارتىپ كورگەن بولاتىن.
- قۇتقارۋشى بولىپ جۇمىس ىستەپ كەلە جاتقانىڭىزعا قانشا ۋاقىت بولدى؟
- 1968-جىلى شىعىس قازاقستان وبلىسى كۇرشىم اۋدانىندا دۇنيەگە كەلدىم. شىنىمدى ايتسام، بالا كۇننەن وسى ماماندىقتى تاڭدايمىن دەپ ويلامادىم. جۇمىسقا ادام قاجەتتىگىن ەستىپ قالىپ، نەگە ىستەپ كورمەسكە دەدىم. ەڭ اۋەلى سۇڭگۋىرشى بولىپ جۇمىسقا تۇردىم. سول كەزدە 26 جاستا ەدىم. ودان بۇرىن اسكەري سالادا، قۇرىلىستا جۇمىس ىستەگەنىم بار.
باسىندا جۇمىس اۋىرلاۋ بولدى. وسىنداعى تاجىريبەلى ادامدار، اعا بۋىن وكىلدەرى اقىلدارىن ايتىپ، كوپ دۇنيەنى ۇيرەتتى. كۇن وتكەن سايىن اقىرىنداپ قالىپتاسىپ، توسەلىپ كەتتىك. سۇڭگۋىرشىنىڭ مىندەتى - سۋعا باتىپ كەتكەن ادامداردى ىزدەستىرۋ. تەك ادام ەمەس، كۇرشىمدەگى بۇقتىرما سۋ قويماسىنا قىس كەزىندە تەحنيكالار مۇز استىنا تۇسەدى. سول كەزدە ءبىزدى شاقىرتىپ جاتادى. ال قۇتقارۋشى بولىپ 2015-جىلى اۋىستىم. ءبىراق قىزمەت اتاۋى اۋىسقانىمەن ءبىزدىڭ نەگىزگى مىندەتىمىز وزگەرگەن جوق. جاعالاۋداعى حالىقتىڭ قاۋىپسىزدىگىن قامتاماسىز ەتىپ، سۋعا باتىپ بارا جاتقان ادامداردى قۇتقارامىز. قايعىلى جاعدايلاردىڭ الدىن الۋ ءۇشىن قاۋىپسىزدىك ەرەجەلەرىن تۇسىندىرەمىز. سوندا جالپى وسى سالادا جۇرگەنىمە 30 جىلعا جۋىق ۋاقىت بولىپتى.
- ەڭ العاش شاقىرتۋعا بارعان ءساتىڭىز ەسىڭىزدە مە؟
- ءيا. ءبىر ادام سۋعا باتىپ كەتىپتى. ول كەزدە جاسپىن عوي. اعالارمەن بىرگە جولعا شىقتىق. ءسال-ءپال ۋايىم بولدى. ۇيرەنۋدەن تايىنباي، ءار ايتقاندى ەكى ەتپەي ءجۇردىم. بەلگىلى بولعانداي، ەر ادام ەرتىس وزەنىنىڭ شومىلۋعا بولمايتىن ۋچاسكەسىندە سۋعا تۇسكەن. ارنايى كيىمىزدى كيىپ، جابدىقتاردى اسىنىپ، ىزدەستىرۋ جۇمىستارىنا كىرىستىك. 3 كۇننەن كەيىن مارقۇمنىڭ دەنەسىن تاپتىق.
- بيىل بۇقتىرما سۋ قويماسىنا باتىپ بارا جاتقان 4 بالانىڭ ءبىرىن قۇتقارىپ قالدىڭىز. سول وقيعا جايلى ايتىپ بەرسەڭىز…
- 10-ماۋسىم كۇنى 3 ادام كۇرشىمنەن سامار اۋدانىنا قاراي جۇمىس بابىمەن كەلە جاتقانبىز. ارعى بەتكە جەتە بەرگەندە حالىقتىڭ ۋ-شۋ بولىپ جاتقانىن كوردىك. سويتسەك، بالالار سۋعا باتىپ بارادى ەكەن. بىرەۋىن كورىپ قالدىم. لەزدە قۇتقارۋ كەۋدەشەسىن كيىپ، قۇتقارۋ شەڭبەرىن سۋعا لاقتىرىپ، سول جەرگە جۇزە جونەلدىم. ءسويتىپ، 13 جاستاعى جەتكىنشەكتى سۋدان الىپ شىقتىم. اسەت تۇرسىن جانە سايان ەرناز ەسىمدى ەكى ارىپتەسىم مەن سول ماڭدا جۇرگەن ازاماتتاردىڭ ءبىرى قالعان بالالاردى قۇتقارىپ قالدى. كەيىن انىقتالعانداي، بۇقتىرمانىڭ سۋ دەڭگەيى تومەندەگەندىكتەن جاعادان 500 مەتردەي جەردە ەسكى پارومنىڭ تەمىرى سۋ بەتىنەن كورىنىپ قالعان. اتا- انالارىنىڭ قاراۋىنسىز شومىلۋعا كەلگەن بالاقايلار تەمىرگە ءجۇزىپ جەتپەك بولىپتى. ءبىراق قاتتى جەل سوعىپ، جەتە الماي، سۋعا باتا باستاعان. ايتەۋىر ءدال وسى مەزەتتە ءبىز كەلىپ قالدىق.
- وسىعان دەيىن ءوزىڭىز ادام جانىن اجالدان اراشالاپ قالعان باسقا وقيعالار بولدى ما؟
- 2001-جىلى ەكى اعايىندى بالا سۋعا باتىپ بارا جاتتى. ءبىرى 8، ەكىنشىسى 10 جاستا. بىردەن كومەككە ۇمتىلدىم. بىرەۋىن الىپ شىعىپ، ارىپتەسىمە بەردىم. ەكىنشىسىنە بارا جاتسام، مۇلدە كورىنبەيدى. سۋدىڭ استىنا كەتىپ قالىپتى. ىزدەپ ءجۇرمىن. ءبىر ۋاقىتتا تاياق تاستام جەردە اعىپ باتا جاتقانىن بايقاپ قالدىم. ءجۇزىپ بارىپ، ونى دا جاعاعا جەتكىزدىم. كوزى جۇمۋلى، سۋ جۇتىپ قويعان. العاشقى مەديتسينالىق كومەك كورسەتكەننەن كەيىن ەسىن جيدى.
ول ەكى بالا كۇرشىم اۋىلىندا تۇرادى. اكە-شەشەسى ەرتە قايتىس بولىپ، جاستايىنان جەتىم قالىپ، اكەلەرىنىڭ تۋعان اپايىنىڭ قولىندا وسكەن ەكەن. سول كۇنى بالىق اۋلاپ وتىرعان. كەنەت بىرەۋىنىڭ اياق كيىمى سۋعا اعىپ كەتىپتى. سونى الىپ شىعامىز دەپ سۋعا تۇسكەن. 8 جاستاعى بالا بۇل وقيعانى ۇمىتپاپتى. ارادا تالاي جىل وتكەندە ات جالىن تارتىپ مىنەر جىگىت بولىپ وسكەن ول مەنى ۇيلەنۋ تويىنا شاقىردى. وكىنىشكە قاراي بەلگىلى ءبىر سەبەپتەرمەن تويعا بارا الماي قالدىم. بالكىم، ەل الدىندا راحمەتىن ايتقىسى كەلگەن شىعار. ىزگى نيەتىنە راحمەت! ەڭ باستىسى امان، ساۋ-سالامات جۇرگەي.
جالپى سۋعا باتىپ جاتقان ادامدى قۇتقارىپ قالعان باسقا دا وقيعالار بولدى. سونىڭ ىشىندەگى ەڭ اسەرلىسى وسى.
- وتباسىڭىز جايلى ايتىپ وتسەڭىز…
- ايەلىم، 3 بالام بار. ەكى ۇل، ءبىر قىز. ۇلكەن ۇلىم شاڭىراق كوتەرىپ، ەكى نەمەرە سۇيگىزدى. جۇبايىم ورىس ءتىلى ءپانىنىڭ ءمۇعالىمى بولىپ جۇمىس ىستەيدى. بالالارىم باسقا سالادا. نەمەرەلەرىمنىڭ ءبىرى اتام سياقتى قۇتقارۋشى بولامىن دەسە ەش قارسىلىعىم جوق. قاي سالانى تاڭداسا دا تەك باقىتتى بولسىن دەيمىن.
- جۇمىسقا جاڭادان تۇرعان جاس قۇتقارۋشىلارعا قانداي كەڭەس بەرىپ جاتاسىز؟
- تياناقتى بولۋعا شاقىرىپ، جۇمىستىڭ جاۋاپكەرشىلىگىن تۇسىندىرەمىن. بىزگە ەڭ قاجەتتى قابىلەتتەردىڭ ءبىرى - شىدامدىلىق. قانداي جاعداي بولماسىن توزىمدىلىك تانىتۋىمىز كەرەك. ودان كەيىن ءار ءتۇرلى ادام كەزدەسەدى. ءبىرى قولداپ جاتسا، ەكىنشىسى كومەكتەسۋگە كەلگەن بىزگە ايقايلاپ، كەدەرگى كەلتىرەدى. سونداي كەزدە سابىر ساقتاي ءبىلۋىمىز قاجەت. قۇتقارۋشىلار اراسىندا ۇنەمى بىرلىك بولۋى ءتيىس. سەبەبى «بىرلەسە كوتەرگەن جۇك جەڭىل» دەپ بەكەر ايتىلماعان.
