كەزەكتە تۇرعان الماتىلىقتار پاتەر كىلتىن الدى
الماتى. KAZINFORM - الماتىدا كەزەكتە تۇرعان تاعى 164 وتباسى قونىس تويىن تويلايدى. الماتى قالاسى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارى عالىمجان ابدىشۇكىر ۇلىنىڭ ايتۋىنشا، جالدامالى پاتەرلەر قالانىڭ كوممۋنالدىق تۇرعىن ءۇي قورىنان بولىنگەن.
«ءۇي كەزەگىندە تۇرعان 164 ادام حالىقتىڭ الەۋمەتتىك وسال توبىنا جاتادى. بۇل جەتىم بالالار، I جانە II توپتاعى مۇگەدەكتەر، مۇگەدەك بالالاردى تاربيەلەپ وتىرعان وتباسىلار، زەينەتكەرلەر، تولىق ەمەس وتباسىلار. ولار اي سايىن پاتەردىڭ جالداۋ اقىسىن تولەيدى. ءبىر بولمەلى پاتەردى جالعا الۋ قۇنى شامامەن 10 مىڭ تەڭگە، ەكى بولمەلى پاتەرگە شامامەن 15000 تەڭگە. كوممۋنالدىق قىزمەتكە اي سايىن اقى تولەۋ قاجەت. باعدارلامانىڭ شارتى بويىنشا ازاماتتارعا پاتەردى جالعا بەرۋگە نەمەسە قايتا جوسپارلاۋعا تىيىم سالىنادى»، - دەدى ول.
پاتەر كىلتىن العان ەكى بالانىڭ اناسى الماتىلىق داريعا ماقاجانوۆا ءومىر بويى 10 شارشى مەتر جاتاقحانادا اپكەسىمەن بىرگە تۇرىپ كەلگەن.
«مەنىڭ ەكى بالام بار. قىزىم ارۋجان مۇگەدەك. 2012 -جىلى مەن ح ق و-عا بارىپ، كەزەككە تۇردىم. قازىر اپكەممەن جانە بالالارىممەن ءبىر بولمەدە تۇرامىن. وتە تار، كەيدە ارامىزدا تۇسىنىسپەستىك تە تۋاتىن. پاتەر كىلتى تابىستالاتىنىن ەستىگەندە، جىلادىم، سەنبەدىم. بىزگە ەكى بولمەلى پاتەر بەرىلدى»، - دەدى ول.
ون جىلدان استام ۋاقىت بويى تۇرعىن ۇيگە كەزەگىندە تۇرعان ءاليا بەجانوۆا دا باسپانالى بولدى.
«ەكى بالاممەن بىرگە تالاي جىل كەزەككە تۇردىم. ءبىز قازىر قالا سىرتىندا 120 مىڭ تەڭگەگە پاتەر جالداپ تۇرامىز. بىزگە قوڭىراۋ شالىپ، پاتەر تۋرالى ايتقان كەزدە سەنبەدىك. باسىندا الاياقتار دەپ ويلادىق. كوپتەن كۇتكەن پاتەرىمىز ءۇشىن الماتى قالاسىنىڭ اكىمدىگىنە راحمەت ايتامىز. ءالى كۇنگە دەيىن قۋانىشتان جىلاپ ءجۇرمىن»، - دەدى ول.
ەستەرىڭىزگە سالا كەتەيىك، بىرەر كۇن بۇرىن ءحاوت ساناتىنداعى كەزەكتە تۇرعان 124 ادامعا پاتەر كىلتى تاپسىرىلعان ەدى.
124 پاتەردىڭ 49 ى - ءبىر بولمەلى، 75 ى - ەكى بولمەلى.
اۆتور
الما مۇقانوۆا
