كىسى قولىنان ولگەن سايلىبايەۆانىڭ ەنەسىنىڭ قايدا جۇرگەنى انىقتالدى - گەرمانيا پروكۋراتۋراسى

استانا. KAZINFORM - تەرگەۋ امالدارى بارىسىندا قايتىس بولعان ايگۇل سايلىبايەۆانىڭ ەنەسى شەتەلدە جۇرگەنى انىقتالدى. وسى ورايدا Kazinform اگەنتتىگىنىڭ مەنشىكتى ءتىلشىسى ءومىرى قيىلعان جەرلەسىمىزدىڭ ىسىنە قاتىستى اقپارات الۋ ءۇشىن گەرمانيا پروكۋراتۋراسىنا ساۋال جولدادى.

«تەرگەۋ امالدارى جالعاسىپ جاتىر جانە قوسىمشا ايعاقتارعا تالداۋ جاساۋ قاجەت. بۇل رەتتە، قازىر تەرگەۋ اياقتالمايدى. سونىمەن قاتار، قاماۋعا الىنعان كۇدىكتىلەر جوق. مارقۇمنىڭ (ا. سايلىبايەۆانىڭ) ەنەسى قازىر شەتەلدە بولۋى مۇمكىن دەگەن مالىمەت بار. كۇيەۋى مەن بالاسىنىڭ قايدا جۇرگەنىن انىقتاۋ تەرگەۋ امالدارىندا قاراستىرىلماعان، سوندىقتان ءبىز بۇل ماسەلە بويىنشا ەشقانداي اقپارات بەرە المايمىز»، - دەپ اتاپ وتىلگەن پروكۋراتۋرا وكىلى يەنس نويباۋەردىڭ Kazinform اگەنتتىگىنە بەرگەن جاۋابىندا.

ەسكە سالا كەتەيىك، ازاپتاپ ولتىرىلگەن ەكس-سۋديا ايگۇل سايلىبايەۆانىڭ ءمايىتى گەرمانيادان تابىلعان بولاتىن.

بۇرىنعى سۋديانىڭ جوعالعانىن ونىڭ ءىنىسى قانات سايلىبايەۆ حابارلاعان ەدى.

ارتىنشا نەمىس پوليتسياسى ق ر ازاماتى ايگۇل سايلىبايەۆانىڭ ولىمىنە قاتىستى تۇسىنىك بەردى.

بۇعان دەيىن 40 جاستاعى ا. سايلىبايەۆا استانانىڭ سارىارقا اۋدانىندا سۋديا بولىپ قىزمەت اتقارسا، سوڭعى ۋاقىتتا گەرمانيانىڭ باتىسىنداعى بەنسحايم قالاسىندا كۇيەۋى، قىزى جانە ەنەسىمەن بىرگە تۇرعان.

4-ماۋسىم كۇنى تاڭەرتەڭ قىزىن بالاباقشاعا اپارعان. سودان بەرى ونى ەشكىم كورمەگەن. ونىڭ دەنەسى قالا شەتىندەگى ەرلاچە كارەرىنەن تابىلدى.

نەمىستىڭ BILD باسىلىمىنىڭ حابارلاۋىنشا، ايەلدىڭ ءمايىتى پوليەتيلەن قاپقا سالىنعان، ءولىم الدىندا ازاپ كورگەن. ايگۇل سايلىبايەۆانىڭ قولىنان، موينىنان جانە بەتىنەن پىشاق جاراقاتى تابىلدى.

ا. سايلىبايەۆامەن ءبىر مەزگىلدە رەسەيدەن كەلگەن 49 جاستاعى قايىن ەنەسى ناتاليا دونتسوۆا جوعالىپ كەتتى. 4-ماۋسىمدا ول نەمەرەسىن بالاباقشادان ۇيىنە الىپ كەلگەن. سودان بەرى ونى ەشكىم كورمەگەن.

گەرمانيادا كوز جۇمعان ەكس-سۋديا ايگۇل سايلىبايەۆا الماتىدا ارۋلاپ جەرلەندى.

بيىل قىركۇيەك ايىنىڭ ورتاسىندا كىسى قولىنان ولگەن ايگۇل سايلىبايەۆانىڭ ەنەسى تابىلماي جاتقانى حابارلانعان ەدى.