كىمدەر ءتىسىن تەگىن ەمدەتە الادى؟

استانا. قازاقپارات - ەلىمىزدە ءتىس ەمدەۋ قىزمەتى اقىلى، م ءا م س قىزمەتىنە كىرمەيدى. دەسەك تە جەكەلەگەن سانات وكىلدەرى ءتىسىن تەگىن ەمدەتۋگە مۇمكىندىك بار. ولار كىمدەر ەكەنىن بىلەسىز بە؟

جوسپارلى ستوماتولوگيالىق كومەكتى 18 جاسقا دەيىنگى بالالار مەن جۇكتى ايەلدەر تەگىن الۋىنا بولادى. جوسپارلى كومەككە جاقتىڭ جانە ءتىستىڭ رەنتگەنوگرافياسى، پلومبا سالۋ، اۋىرسىنۋدى باسۋ ارقىلى قاراپايىم جانە كۇردەلى ءتىستى جۇلۋ كىرەدى.

ال شۇعىل ستوماتولوگيالىق كومەك مىنا ساناتتاعىلارعا تەگىن كورسەتىلەدى:

18 جاسقا دەيىنگى بالالار؛

جۇكتى ايەلدەر؛

ۇ و س قاتىسۋشىلارىنا جانە ولارعا تەڭەستىرىلگەندەرگە؛

I، II، III، IV توپتاعى مۇگەدەكتەرگە؛

«التىن القا» جانە «كۇمىس القا» القالارىمەن ماراپاتتالعان كوپبالالى انالارعا؛

اتاۋلى الەۋمەتتىك كومەك الۋشىلارعا؛

جاسى بويىنشا زەينەتكەرلەرگە؛

جۇقپالى اۋرۋلارمەن اۋىراتىن ناۋقاستار.

شۇعىل ستوماتولوگيالىق كومەكتى ەرەكشە قاجەتتىلىكتەرى بار بالاعا كۇتىم جاساپ، جۇمىس ىستەمەيتىندەر نەمەسە بالا كەزىنەن I توپتاعى مۇگەدەكتەر دە تەگىن الا الادى.

ازاماتتاردىڭ جەڭىلدەتىلگەن ساناتى مەملەكەتتىك ەمحانادا نەمەسە ليتسەنزياسى بار جانە مىندەتتى مەديتسينالىق ساقتاندىرۋ قورىنىڭ قاتىسۋشىسى بولىپ تابىلاتىن كەز كەلگەن ستوماتولوگيالىق كلينيكادا كومەك الا الادى. 2021 -جىلدان باستاپ مۇنداي ستوماتولوگيا ەمحانادان جولداماسىز قابىلدايدى.

از قامتىلعان وتباسىلاردان شىققان 6 جاستان 12 جاسقا دەيىنگى بالالارعا ءتىس-جاق اۋىتقۋلارى (تىستەۋ اقاۋلارى جانە جاق ميكروگناتياسى)، تۋا بىتكەن جاق-بەت پاتولوگياسى (جوعارعى ەرىن مەن تاڭدايدىڭ جىرىقتارى) بار بالالارعا تەگىن ورتودونتيالىق كومەك كورسەتىلەدى.

م ءا م س بويىنشا پاتسيەنت جوسپارلى نەمەسە شۇعىل ستوماتولوگيالىق قىزمەت الۋ ءۇشىن ەمحاناعا دا، جەكە كلينيكاعا دا جۇگىنە الادى. كلينيكا تىزىلىمدە بولۋى كەرەك. تىركەۋشىگە قوڭىراۋ شالۋ، دارىگەر قابىلداۋىنا جازىلۋ جانە قاي كلينيكاعا تىركەلگەنىڭىزدى حابارلاۋ قاجەت. ءسىزدى بازادان تەكسەرەدى جانە شىنىمەن تىركەۋدە بولساڭىز، وندا قىزمەتتەر تەگىن كورسەتىلەدى. م ءا م س شەڭبەرىندە ستوماتولوگياعا بارۋعا ليميت جوق.