كيم چەن ىننىڭ اپكەسى سولتۇستىك كورەيانىڭ يادرولىق مارتەبەسىن ءماجبۇرلى تاڭداۋ دەپ اتادى

استانا. KAZINFORM - سولتۇستىك كورەيا كوشباسشىسىنىڭ اپكەسى كيم ە چجون وڭتۇستىك كورەيا، ا ق ش جانە جاپونيانىڭ پحەنياندى دەنۋكلەراريزاتسيالاۋ بويىنشا جاقىندا جاساعان مالىمدەمەسىن سىنادى، دەپ حابارلايدى Yonhap اقپارات اگەنتتىگى.

سولتۇستىك كورەيا كوشباسشىسى كيم چەن ىننىڭ اپكەسى، كورەيا جۇمىسشى پارتياسى ورتالىق كوميتەتى ءبولىم مەڭگەرۋشىسىنىڭ ورىنباسارى كيم ە چجون بۇل مالىمدەمەنى سارسەنبى كۇنى وسى ەلدەردىڭ وتكەن اپتادا ءۇشجاقتى كەزدەسۋىنىڭ قورىتىندىسىنا جاۋاپ رەتىندە جاسادى.

وڭتۇستىك كورەيانىڭ سىرتقى ىستەر ءمينيسترى چو تحە ەل، ا ق ش مەملەكەتتىك حاتشىسى ماركو رۋبيو جانە جاپونيانىڭ سىرتقى ىستەر ءمينيسترى تاكەسي يۆايا وتكەن بەيسەنبىدە وتكەن ناتو وتىرىسى اياسىندا سولتۇستىك كورەيانىڭ يادرولىق قارۋسىزدانۋىن قولدايتىنىن راستادى.

كيمنىڭ پىكىرىنشە، بىرلەسكەن مالىمدەمە ءۇش ەلدىڭ سولتۇستىك كورەيانىڭ يادرولىق قارۋسىزداندىرىلۋىنا قاتىستى الاڭداۋشىلىعىن تانىتىپ وتىر. ويتكەنى ولار ونىڭ «ورىندالماس ارمان» ەكەنىن تۇسىنەدى.

- ەگەر ولار شىنىمەن دە «دەنۋكلەاريزاتسياعا» سەنە وتىرىپ، ونى قاتتى تالاپ ەتسە، ولاردى اقىماق دەپ اتاعان ءجون، - دەدى ول كورەيانىڭ ورتالىق تەلەگراف اگەنتتىگى تاراتقان مالىمدەمەدە.

ول سونداي-اق سولتۇستىك كورەيانىڭ «يادرولىق مەملەكەت» مارتەبەسى «دۇشپاندىق سىرتقى قاۋىپ پەن قازىرگى جانە بولاشاق جاھاندىق قاۋىپسىزدىك ارحيتەكتۋراسىنداعى وزگەرىستەردى ءدال كورسەتەتىن ءماجبۇرلى تاڭداۋدىڭ قورىتىندىسى» ەكەنىن اتاپ ءوتتى.

ءوز كەزەگىندە كيم قارۋسىزدانۋ ماسەلەسىن تالقىلاۋ نەمەسە «يادرولىق قارۋسىزداندىرۋدىڭ ەسكىرگەن تۇجىرىمداماسىن» قايتارۋ ارەكەتتەرى سولتۇستىك كورەيانىڭ ەگەمەندىگىن جوققا شىعارۋ جانە ەلدى «كونستيتۋتسياسى مەن الەۋمەتتىك جۇيەسىنەن باس تارتۋعا» ماجبۇرلەۋ ارەكەتىمەن پارا-پار ەكەنىن ايتتى.