كيم چەن ىن يادرولىق ارسەنال مەن بارلاۋ سپۋتنيكتەرى فلوتىن دامىتۋعا بۇيرىق بەردى

كورەيا ەڭبەك پارتياسىنىڭ باس حاتشىسى ورتالىق كوميتەت پلەنۋمىندا قازىرگى زامانعى سوعىس ەرەكشەلىكتەرىنە سايكەس ۇشقىشسىز باسقارىلاتىن اپپاراتتاردىڭ بارلىق ءتۇرىن جانە قۋاتتى راديوەلەكتروندىق سوعىس جۇيەلەرىن جاساۋ مەن ءوندىرۋدىڭ ماڭىزىن اتاپ ءوتتى. Kazinform اگەنتتىگى بۇل تۋرالى Euronews-كە سىلتەمە جاساپ حابارلايدى.

سولتۇستىك كورەيا كەلەسى جىلى تاعى ءۇش بارلاۋ سپۋتنيگىن ۇشىرۋدى جوسپارلاپ وتىر.

بۇل تۋرالى سولتۇستىك كورەيانىڭ كوشباسشىسى كيم چەن ىن كورەيانىڭ جۇمىسشىلار پارتياسى و ك وتىرىسىندا مالىمدەدى. ول ا ق ش، جاپونيا جانە وڭتۇستىك كورەيانىڭ ءۇشجاقتى ىنتىماقتاستىعىن سىناپ، ونىڭ «كورەيا تۇبەگىندەگى جاعدايدى قاۋىپتى جاعدايعا اپارىپ سوعاتىنىنا» سەنىم ءبىلدىردى.

21-قاراشادا سولتۇستىك كورەيا «مالليگёن-1» العاشقى بارلاۋ سپۋتنيگىن ۇشىردى. 2-جەلتوقساندا ك ح د ر بارلاۋ سپۋتنيگىن پايدالانۋ باسقارماسى جۇمىسقا كىرىستى. كورەيانىڭ ورتالىق تەلەگراف اگەنتتىگى حابارلاعانداي، «مالليگەن-1» ءوز ميسسياسىن 1-جەلتوقساندا تولىقتاي ورىنداي باستايدى. سىناق وپەراتسياسى اياسىندا سپۋتنيك اق ءۇيدىڭ، پەنتاگوننىڭ، سونداي-اق ا ق ش، كورەيا رەسپۋبليكاسى جانە جاپونياداعى ءبىرقاتار اسكەري نىسانداردىڭ سۋرەتتەرىن جىبەردى.

سونداي-اق كيم چەن ىن سولتۇستىك كورەيانىڭ يادرولىق ارسەنالىن كوبەيتۋگە بۇيرىق بەردى. ونىڭ اتاپ وتۋىنشە، 2024 -جىلى يادرولىق قارۋدى ءوندىرۋ جوسپارىن جۇزەگە اسىرۋ ءۇشىن «قاجىرلى كۇرەس باستالاتىنىن» جانە جاپپاي قىرىپ-جويۋ قارۋىنىڭ وسى ءتۇرىن ءوندىرۋدى دايەكتى تۇردە ارتتىرۋعا مۇمكىندىك بەرەتىن «سەنىمدى نەگىز قۇرىلادى».