كوزگە تەرىسكەن شىعۋ نەنىڭ بەلگىسى؟

استانا. KAZINFORM - بۇل تۋرالى تەراپيەۆت-دارىگەر ايگەرىم ماحمۋتوۆا مەن وكۋليست بايان شلەكەيەۆادان سۇرادىق.

تەرىسكەن نەدەن شىعادى؟

تەرىسكەن كوزگە كوبىنەسە يممۋنيتەت تومەندەگەندە، كۇيزەلىس كەزىندە، ديەتا ۇستاعاندا نەمەسە قول گيگيەناسىن ساقتاماعاندا شىعادى. سونداي-اق ج ر ۆ ي كەزىندە دە شىعۋى مۇمكىن. ياعني سۋىق تيگەننەن كەيىن يممۋنيتەت السىرەۋى سالدارىنان، - دەدى تەراپيەۆت-دارىگەر ايگەرىم ماحمۋتوۆا.

وكۋليست بايان شلەكەيەۆا يممۋنيتەتتىڭ تومەندەۋى نەلىكتەن كوزگە تەرىسكەن شىعۋىنا اكەلەتىنىن ءتۇسىندىردى.

ادامنىڭ اعزاسىندا يممۋندىق جەتىسپەۋشىلىك نەمەسە اعزانىڭ السىرەۋى بولعان جاعدايدا ونىڭ قورعانۋ جۇيەسى السىرەپ، سوعان بايلانىستى سىرتتان تۇسەتىن نەمەسە اعزادا از مولشەردە بولۋى مۇمكىن باكتەريالار باس كوتەرەدى. سوندىقتان تەرىسكەننىڭ شىعۋىنا ىقپال ەتەتىن بىردەن-ءبىر سەبەپشى فاكتور - يمۋنيتەتتىڭ تومەندەۋى، - دەدى ول.

سونداي-اق مامان ەندوكريندىك جۇيەدە وزگەرىستەر بولعاندا، مىسالى، قانت ديابەتى بار ادامداردا جانە اسقازان، ىشەك جولدارىندا بۇزىلۋلار بار ناۋقاستاردا تەرىسكەننىڭ شىعۋى ءجيى بولاتىنىن جەتكىزدى.

تەرىسكەندى قالاي ەمدەيدى؟

كوزىنە تەرىسكەن شىققان ادام وفتالمولوگقا جولداما الۋ ءۇشىن ادەتتە الدىمەن تەراپيەۆتكە بارادى. ايگەرىم ماحمۋتوۆا تەراپيەۆت رەتىندە ونداي ناۋقاستاردى كوز دارىگەرىنە جىبەرەتىنىن ايتتى.

كوز دارىگەرىنە جولداما بەرۋدى ءجون كورەمىن. سەبەبى تەرىسكەندى ەمدەمەگەن جاعدايدا ول ىرىڭدەپ كەتۋى مۇمكىن. ودان كەيىن ءىرىڭ قالتاعا اينالادى. ول كەزدە تەرىنىڭ استىنا جينالعان ءىرىڭدى ماسسانى حيرۋرگيالىق جولمەن شىعارىپ، وتا جاساۋ كەرەك بولادى. ال وتادان كەيىن تىرتىق قالۋى مۇمكىن. سوندىقتان ادام كوزىنە تەرىسكەن شىققان جاعدايدا دەرەۋ وفتالمولوگقا قارالعانى دۇرىس، - دەدى ول.

الايدا تەرىسكەن شىققاندا ادامداردىڭ كوپشىلىگى دارىگەرگە بارماي، وعان ىستىق اعاش قاسىق باسىپ، كوزگە تۇكىرىپ، قولىن شىعارىپ ەمدەۋگە تىرىسادى. وسىعان قاتىستى وكۋليست بايان شلەكەيەۆانىڭ پىكىرىن بىلدىك.

تەرىسكەن شىققاندا جاسالاتىن حالىق ەمدەرىن قولدامايمىن. سەبەبى ول مەديتسينالىق جاعىنان دالەلدەنبەگەن. دەگەنمەن تەرىسكەن ەندى شىعىپ كەلە جاتقان كەزدە كوزگە جىلى كومپرەس جاساۋعا بولادى. ول ىستىق قاسىق باسۋ دەگەن سول. ول تەرىسكەننىڭ ەندى شىعىپ كەلە جاتقان كەزىندە ونىڭ تەزىرەك جارىلۋىنا، اشىلۋىنا سەپتىگىن تيگىزەدى. سوندىقتان قۇرعاق جىلۋ، ياعني ىستىق قاسىق باسۋعا بولادى. باسقا حالىق ەمدەرىنە كوزقاراسىم تەرىس. وعان قاراعاندا بىلىكتى كوز دارىگەرىنە قارالىپ، ەم العان تيىمدىرەك، - دەدى وكۋليست.

ءبىراق تەراپيەۆت ايگەرىم ماحمۋتوۆا ىستىق اعاش قاسىقتى باسۋ تەك باستاپقى كەزەڭدە بولماسا، ءىرىڭ قالتا تۇزىلگەندە كەرىسىنشە كەسىر تيگىزەتىنىن ايتتى.

مىسالى ءىرىڭقالتانىڭ ۇستىنە جىلۋ باسساق، ول جارىلىپ كەتۋى مۇمكىن. سالدارىنان ءىرىڭنىڭ كوزدىڭ باسقا تىندەرىنە كەتىپ قالۋ قاۋپى بار. ويتكەنى ءوزى قابىنىپ تۇرعان جەردى ودان ارى قابىندىرامىز، - دەدى دارىگەر.

وكۋليست بايان شلەكەيەۆا كەيبىر كەزدە تەرىسكەن ەشقانداي ەمسىز دە جازىلاتىنىن ايتتى.

كەيبىر ادامداردا تەرىسكەن 1-2 اپتادا ءوزى كورىنىپ، اشىلىپ، ىشىندەگى ءىرىڭى شىعىپ، ءوزى ەمسىز دە جازىلۋى مۇمكىن. دەگەنمەن كوپ جاعدايلاردا تەرىسكەن قاتتى ءىسىپ، اۋىرىپ، سولقىلداپ ادامنىڭ مازاسىن كەتىرەدى. سونداي كەزدە كوز دارىگەرلەرى انتيباكتەريالدى تامشىلار نەمەسە كوزگە جاعاتىن انتيباكتەريالدى جاقپامايلار تاعايىندايمىز. ولار كوزدەگى باكتەريالاردى ءولتىرىپ، قابىنۋ پروتسەسىن ەمدەپ، كوزدەگى تەرىسكەننىڭ تەزىرەك جازىلۋىنا سەپتىگىن تيگىزەدى، - دەدى مامان.

BAQ. KZ