كوسموسقا تاعى ءبىر قازاق عارىشكەرىن جىبەرۋدىڭ شارتتارى پىسىقتالىپ جاتىر
استانا. KAZINFORM - سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى Kazinform ساۋالىنا جولداعان جاۋابىندا قازاقستاندىق عارىشكەردى اشىق كوسموسقا جىبەرۋ باعىتىنداعى دايىندىق جۇمىستارى تۋرالى مالىمەت ۇسىندى.
«قازىرگى تاڭدا قازاقستاننىڭ عىلىمي زەرتتەۋلەر مەن ەكسپەريمەنتتەرىنىڭ التىنشى باعدارلاما جوباسى تالقىلاۋ جانە پىسىقتاۋ ساتىسىندا تۇر. بۇل باعدارلامانىڭ ءاربىر جوباسى وزەكتىلىك، جاڭاشىلدىق، ىسكە اسىرۋ مۇمكىندىگى (حالىقارالىق عارىش ستانسالارىندا قاجەتتى قوندىرعىلار بار-جوعى جونىندە) تۇرعىسىنان زەرتتەلەدى»، - دەلىنگەن جاۋاپتا.
ۆەدومستۆو ماماندارى عارىشكەر دايىنداۋ جوباسى جونىندە ەگجەي-تەگجەي اقپارات بەرە المايتىنىن اتاپ وتكەن.
«جوبالاردىڭ سانى مەن مازمۇنى تۋرالى ايتۋ ازىرگە ەرتە دەپ ەسەپتەيمىز. بۇگىنگى تاڭدا عارىش ۆەدومستۆولارىنا، ونىڭ ىشىندە «روسكوسموس» مەملەكەتتىك كورپوراتسيالارىنا ساۋال جولدادىق. سوڭعىسى عارىشكەردى اتتاندىرۋدىڭ نەگىزگى شارتتارىن اتادى. ول شارتتاردى قاراپ جاتىرمىز. ءبىراق عارىشكەردى عارىشقا جىبەرۋ جونىندە ناقتى شەشىم ءالى قابىلدانعان جوق»، - دەپ جازىلعان رەسمي مالىمەتتە.
