كورەيادا تولاسسىز جاۋىننان 14 ادام قازا تاۋىپ، 12 ءسى ءىز-ءتۇزسىز جوعالدى
استانا. KAZINFORM - وڭتۇستىك كورەيادا بەس كۇن بويى جاۋعان نوسەر جاڭبىر سالدارىنان 14 ادام قازا تاۋىپ، تاعى 12 ادام ءىز-ءتۇزسىز جوعالعان، دەپ جازادى شينحۋا.
بۇل تۋرالى جەكسەنبى كۇنى ەلدىڭ ىشكى ىستەر جانە قاۋىپسىزدىك مينيسترلىگى حابارلادى.
مينيسترلىكتىڭ مالىمەتىنشە، جەكسەنبى كۇنى جەرگىلىكتى ۋاقىتپەن ساعات 11:00 دەگى جاعداي بويىنشا 14 ادامنىڭ قازا تاپقانى راستالىپ، 12 ادام جوعالعاندار قاتارىندا سانالىپ وتىر.
سارسەنبىدە باستالعان تولاسسىز جاۋىن- شاشىن سالدارىنان ەل بويىنشا 13209 ادام ءۇي-جايىن تاستاپ كەتۋگە ءماجبۇر بولعان. ونىڭ ىشىندە 3836 ادام ۋاقىتشا ەۆاكۋاتسيالىق بەكەتتەردە ورنالاستىرىلعان.
سونداي-اق 1920 مەملەكەتتىك جانە 2234 جەكە نىسانعا زاقىم كەلگەنى تىركەلدى. ولاردىڭ قاتارىندا سۋ استىندا قالعان جولدار، كوشكىندەر، وزەن قۇرىلىمدارىنىڭ قۇلاۋى، سۋ باسقان عيماراتتار مەن ەگىستىك القاپتار بار.
بۇدان بۇرىن حابارلانعانداي، 18-شىلدەدە وڭتۇستىك كورەيادا ءۇش كۇن قاتارىنان جاۋعان نوسەر جاۋىن سالدارىنان 4 ادام مەرت بولدى. تاعى 1 ادام ءىز-ءتۇزسىز جوعالىپ، 5 مىڭ ادام ەۆاكۋاتسيالانعانى حابارلانعان ەدى.
