كورشىسىنىڭ جەرتولەسىندە 26 جىل تۇتقىندا وتىرعان الجيرلىك ازامات ءتىرى تابىلدى

استانا. KAZINFORM - الجيردەگى ازاماتتىق سوعىس كەزىندە 1998 -جىلى جوعالىپ كەتكەن الجير ازاماتى 26 جىلدان كەيىن كورشىسىنىڭ جەرتولەسىنەن ءتىرى تابىلدى. كورشى ۇيلەردىڭ اراسى بىرنەشە مينۋتتىق جول، دەپ حابارلايدى Aljazeera.

ەلدەگى ادىلەت مينيسترلىگى وكىلدەرى سەيسەنبىدە ومار بين ومران نەمەسە ومار ب. دەپ اتالاتىن ەر ادامنىڭ 19 جاسىندا جوعالىپ كەتكەنىن حابارلادى. ءبىراق ول الجيردىڭ سولتۇستىگىندەگى دجەلفاداعى ەسكى ۇيىنەن نەبارى 200 مەتر جەردەگى كورشىسىنىڭ تۇتقىنىندا بولعانى انىقتالدى جانە وسى اپتانىڭ باسىندا 45 جاسىندا، ۇيمە ءشوپتىڭ ارتىنا جاسىرىنعان قوي قورادان ءتىرى تابىلدى.

مينيسترلىك «سۇمدىق» قىلمىسقا قاتىستى تەرگەۋ جالعاسىپ جاتقانىن جانە جابىرلەنۋشىگە مەديتسينالىق جانە پسيحولوگيالىق كومەك كورسەتىلىپ جاتقانىن حابارلادى. پوليتسيا قاشىپ كەتۋگە ارەكەتتەنگەن 61 جاستاعى ەسىك كۇزەتشىسىن (شۆەيتسار) «ادام ۇرلادى» دەگەن كۇدىكپەن قولعا العان. ۇرلىقتىڭ بەتى اعايىندىلار اراسىنداعى مۇراگەرلىك داۋ كەزىندە اشىلعان. كۇدىكتىنىڭ اعاسى الەۋمەتتىك جەلىدە قىلمىستى اشكەرەلەيتىن اقپاراتتى جاريالاعان.

«12-مامىردا جەرگىلىكتى ۋاقىت بويىنشا 20:00-دە جابىرلەنۋشى، 45 جاستاعى ومار بەن ومران كورشىسى 61 جاستاعى ب. ا.-نىڭ جەرتولەسىنەن تابىلدى»، - دەدى سوت وكىلى.

جابىرلەنۋشىنىڭ اناسى 2013 -جىلى قايتىس بولعان، ال وتباسى ونىڭ «ءتىرى بولۋىنان» ءۇمىت ۇزگەن. ومران قۇتقارۋشىلارعا كەيدە وتباسىن الىستان كورەتىنىن، ءبىراق ەش حابارلاسا الماعانىن مالىمدەگەن. ايتۋىنشا تۇتقىنداۋشى ونى «سيقىرلاپ» قويعان.

بين ومراننىڭ وقيعاسى ەلدەگى كوپتەگەن قۇپيانىڭ بەتىن اشقانداي بولدى. 1990 -جىلدارى ۇكىمەتتى يسلامشىل سودىرلارعا قارسى قويعان سوعىس كەزىندە 200 مىڭعا جۋىق ادام قازا تاپقان. بۇل كەزەڭدى كەيدە الجيردىڭ «قارا ونجىلدىعى» دەپ تە اتايدى.

SOS Disparus الجير قاۋىمداستىعى سوعىس كەزىندە تەك 1992-1998 -جىلدار ارالىعىندا شامامەن 8000 الجيرلىك جوعالىپ كەتكەن دەپ ەسەپتەيدى.

اۆتور
جاراسقان نۇرىبايەۆ