كونگودا تۇرمەدەن قاشپاق بولعان 130-عا جۋىق ادام مەرت بولدى

استانا. KAZINFORM - كونگو دەموكراتيالىق رەسپۋبليكاسىندا تۇرمەدەن قاشپاق بولعان 129 ادام قازا تاپتى. ولاردىڭ ىشىندە ەل استاناسى كينشاساداعى ماكالا تۇرمەسىنىڭ 24 تۇتقىنى ەسكەرتۋدەن كەيىن وققا ۇشتى، تاعى ونداعان ادام تاپتالىپ نەمەسە تۇنشىعىپ قازا بولعان، دەپ حابارلايدى DW اقپارات اگەنتتىگى.

ەلدىڭ ىشكى ىستەر ءمينيسترى جاكمەن شاباني X الەۋمەتتىك جەلىسىندە حابارلاعانداي، وقيعا 2-قىركۇيەككە قاراعان ءتۇنى تۇرمەدە بۇلىك شىققان كەزدە بولعان. قۇربان بولعانداردان بولەك، كەم دەگەندە 59 ادام جاراقات الدى، تۇرمەدەگى ايەلدەردى زورلاۋدىڭ بىرنەشە وقيعاسى دا تىركەلدى.

بۇلىك كەزىندە تۇتقىنداردىڭ قاشىپ ۇلگەرۋ-ۇلگەرمەۋى بەلگىسىز. جەرگىلىكتى تۇرعىنداردىڭ ايتۋىنشا، قاۋىپسىزدىك كۇشتەرى قازا بولعانداردى تۇرمەدەن كولىكتەرمەن الىپ شىققانعا دەيىن بىرنەشە ساعات بويى اتىس ەستىلدى، دەپ حابارلايدى AFP.

ءى ءى م باسشىسى تۇزەۋ مەكەمەسىنە ايتارلىقتاي ماتەريالدىق شىعىن كەلگەنىن مالىمدەدى - تۇرمەنىڭ اكىمشىلىك عيماراتتارى، تۇرمە اۋرۋحاناسى جانە ازىق-تۇلىك قويماسى تولىعىمەن ورتەنىپ كەتكەن.

ماكالا تۇرمەسى - كونگو دەموكراتيالىق رەسپۋبليكاسىنداعى ەڭ ۇلكەن تۇرمە. ول 1500 تۇتقىنعا ەسەپتەلگەن، ءبىراق رەسمي ستاتيستيكا بويىنشا وندا بۇدان 10 ەسە كوپ - 14 مىڭنان 15 مىڭعا تۇتقىن بار.

اۆتور
زارينا تۋعانبايەۆا