كونستيتۋتسيا كۇنى: جەتىسايدا 100 دەن استام وتباسى باسپانالى بولدى
تۇركىستان. KAZINFORM -كونستيتۋتسيا كۇنىنە ارنالعان مەرەكەلىك شارادا تۇرعىن ءۇي كەزەگىندە تۇرعان از قامتاماسىز ەتىلگەن جانە كوپبالالى وتباسىلارعا، مۇمكىندىگى شەكتەۋلى جاندارعا پاتەر كىلتتەرى تابىستالدى.
سالتاناتتى شاراعا تۇركىستان وبلىسى اكىمىنىڭ ورىنباسارى بەيسەنباي تاجىبايەۆ، تۇركىستان وبلىستىق ءماسليحاتىنىڭ ءتوراعاسى نۇرالى ءابىشوۆ، وبلىستىق ءماسليحات دەپۋتاتى تالعات قارجاۋوۆ، جەتىساي اۋدانىنىڭ اكىمى سەرىك مامىتوۆ پەن كاسىپكەر- مەتسەنات باحاريدين ابلازيموۆ قاتىسىپ، كوپشىلىكتى كونستيتۋتسيا كۇنىمەن قۇتتىقتادى.
«بۇگىن تاماشا ءساتتىڭ كۋاسى بولىپ وتىرمىز. قازاق جەتىمى مەن جەسىرىن جىلاتپاعان تەكتى حالىق ەكەنى بەلگىلى. تاۋەلسىز ەلدىڭ بۇگىنگى ازاماتتارىنىڭ ىشىندە قانعا سىڭگەن قاسيەتتى، اتا ءداستۇردى جالعاستىرىپ، دارىپتەپ كەلە جاتقاندارى دا بارشىلىق. كوپتىڭ كومەگىمەن مەرەكە قارساڭىندا باسپاناعا شىن مۇقتاج وتباسىلار قۋانىشقا كەنەلىپ وتىر. قونىس قۇتتى بولسىن!»- دەدى بەيسەنباي تاجىبايەۆ.
«جاننات سارايى» دەپ اتالاتىن قوس قاباتتى 16 پاتەرلى تۇرعىن ءۇيدىڭ قۇرىلىسى 2022 -جىلى باستالعان بولاتىن. بيىل قۇرىلىس جۇمىستارى تولىق اياقتالىپ، ەل يگىلىگىنە پايدالانۋعا بەرىلدى. 16 پاتەردىڭ 12- ەكى بولمەلى بولسا، 4 ى ءۇش بولمەلى. قۇنى 350 ميلليون تەڭگەنى قۇرايدى.
سونداي-اق، وتكەن جىلى رەسپۋبليكالىق بيۋدجەت پەن ۇلتتىق قوردان قارالعان قارجىعا حالىقتىڭ الەۋمەتتىك وسال توپتارى ءۇشىن الەۋمەتتىك 90 تۇرعىن ءۇي ساتىپ الىنعان. بۇل جۇمىستار بيىلعى جىلىدا ءوز جالعاسىن تاپپاق.
سالتاناتتى شارا بارىسىندا «باسپاناعا جول» قوعامدىق قايىرىمدىلىق قورى اتىنان تاعى ءبىر كوپبالالى وتباسى باسپانالى بولدى. قور مۇشەلەرى باسپانانىڭ ءىشىن قاجەتتى جيھازدارمەن، ازىق-تۇلىكپەن جانە كۇندەلىكتى تۇتىنۋ زاتتارىمەن، وتباسى مۇشەلەرىن كيىم-كەشەكپەن تولىقتاي قامتاماسىز ەتكەن.
