كونسلاگەردە بولعان اتىراۋلىق كەيۋاناعا 1 ميلليون تەڭگە بەرىلەدى

اتىراۋ. KAZINFORM - اتىراۋدا ەكىنشى دۇنيەجۇزىلىك سوعىس كەزىندە كونتسلاگەر تۇتقىنىندا بولعان كەيۋانا تۇرادى. جەڭىس كۇنى قارساڭىندا وعان 1 ميلليون تەڭگە بەرىلەدى.

اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ ايتۋىنشا، جەڭىس كۇنى قارساڭىندا 2060 ادامعا ءبىرجولعى الەۋمەتتىك كومەك بەرۋ ءۇشىن 218,5 ميلليون تەڭگە بولىنگەن.

«قازىر اتىراۋ وبلىسىندا ەكىنشى دۇنيەجۇزىلىك سوعىس كەزىندە فاشيستەر مەن ولاردىڭ وداقتاستارى قۇرعان كونسلاگەر تۇتقىنىندا بولعان 1 ادام تۇرادى. ول - 93 جاستاعى ەكاتەرينا ابساتىروۆا. وعان جەڭىس كۇنىنە قارساڭىندا 1 ميلليون تەڭگە كولەمىندە الەۋمەتتىك كومەك بەرىلەدى. جەڭىسكە ۇلەس قوسىپ، ءتۇرلى ماراپاتقا يە بولعان 21 تىل ارداگەردىڭ ءارقايسىسىنا بەرىلەتىن الەۋمەتتىك كومەكتىڭ مولشەرى - 100 مىڭ تەڭگە. تىلدا ەڭبەك ەتكەنىمەن، ەشقانداي ماراپات الماعان 903 ارداگەرگە 50 مىڭ تەڭگەدەن ءبىرجولعى اقشالاي كومەك كورسەتىلەدى»، - دەيدى ازامات مامبەتوۆ.

ونىڭ دەرەگىنە سۇيەنسەك، 1986-1987 -جىلدارى چەرنوبىل اتوم ەلەكتر ستانساسىنداعى اپاتتى جويۋعا قاتىسقان 170 ارداگەرىنە 150 مىڭ تەڭگەنىڭ الەۋمەتتىك كومەگى تولەنەدى. سونداي-اق، باسقا مەملەكەتتەردىڭ اۋماعىنداعى ۇرىس قيمىلدارىنا قاتىسقان 965 ارداگەرگە دە وسىنداي كولەمدە قارجىلاي كومەك بەرۋ كوزدەلىپ وتىر.

ەسكە سالا كەتەلىك، بۇدان بۇرىن الماتىلىق ارداگەرلەرگە 2 ميلليون تەڭگەدەن بەرىلەتىنى حابارلانعان ەدى.

اۆتور
جولداسبەك شوپەعۇل