كومپيۋتەرلىك ويىن ازىرلەگەن 16 جاستاعى وقۋشى ءبىر ايدا 1 ميلليارد دوللار تاپتى

Roblox پلاتفورماسىندا ءۇش كۇندە جاسالعان قاراپايىم باقشا سيمۋلياتورى بۇكىل الەمدى تاڭعالدىردى. Grow a Garden ويىنى ءبىر اي ىشىندە 1 ميلليارد دوللار تابىس اكەلىپ، تاريحتاعى ەڭ تابىستى ويىنداردىڭ بىرىنە اينالدى. ال ونى نەبارى 16 جاستاعى مەكتەپ وقۋشىسى ازىرلەگەن، دەپ حابارلايدى  fortune.com.

ماۋسىم ايىنىڭ اياعىندا ويىنعا ءبىر مەزەتتە 21,6 ميلليون ادام كىرىپ، بۇرىنعى رەكورد يەسى Fortnite-تەن دە اسىپ ءتۇستى. ەڭ قىزىعى، ويىندا اتىس جوق، جارىس جوق. تەك باقشا وتىرعىزاسىز، ءونىم وسىرەسىز، ساۋدا جاسايسىز، جانۋار اسىرايسىز نەمەسە كورشىنىڭ ءسابىزىن ۇرلايسىز. بارلىعى تىنىش، ەركىن، قىسىمسىز ورتادا وتەدى. ارتقى فوندا موتسارتتىڭ اۋەندەرى ويناپ تۇرادى.

Grow a Garden ويىنى ۆيرتۋالدى كۇرەك، تۇقىم جانە ءسابىز ساتۋ ارقىلى ميللياردتاعان تابىس جيناعان. بۇل تابىس Roblox كومپانياسىنىڭ دا تابىستىلىعىنا اسەر ەتتى. ساراپشىلار بۇل جوبانىڭ كومپانيانىڭ اكسيا قۇنىن ارتتىرىپ، توقساندىق تابىس كورسەتكىشتەرىن بولجامنان اسىرىپ تۇسەتىنىن ايتۋدا.

جوبانى جاڭا زەلاندياداعى Splitting Point Studios ساتىپ الدى. الايدا جاس اۆتور جوبانىڭ 50 پايىز قۇقىعىن وزىندە قالدىردى. ياعني ول تابىستىڭ جارتىسىن ءارى قاراي دا يەلەنە بەرەدى.

ويىندى باستاۋ ءۇشىن تەك Roblox اككاۋنتى كەرەك. جۇيە سىزگە بوس تەلىم، ءسال اقشا جانە ءبىر تۇقىم بەرەدى. ۋاقىت وتە كەلە ءونىم ساتىپ، كوبىرەك تابىس تابۋعا، جاڭا تۇقىمدار مەن جانۋارلار الۋعا مۇمكىندىك بار. اقشا سالماي-اق ويناۋعا بولادى، ءبىراق وندايدا دامۋ باياۋ جۇرەدى. سيرەك تۇقىمدار دۇكەنگە ءار بەس مينۋت سايىن جاڭارىپ تۇسەدى، بۇل ويىنشىلاردى ءجيى ورالۋعا يتەرمەلەيدى.