كولىك پروكۋراتۋراسى قازاقستانداعى اۋە قاتىناسىنىڭ قاۋىپسىزدىگىنە الاڭداپ وتىر

استانا. KAZINFORM - باس كولىك پروكۋراتۋراسى قازاقستانداعى اۋە ساپارلارىنىڭ قاۋىپسىزدىگىنە تالداۋ جۇرگىزىپ جاتقانىن ءمالىم ەتتى.

- باس كولىك پروكۋراتۋراسى قازاقستانداعى ۇشۋلاردىڭ (اۋە ساپارلارىنىڭ) قاۋىپسىزدىگىنە تالداۋ جۇرگىزىپ جاتىر. وسى جۇمىس اياسىندا كولىك مينيسترلىگىنە ءتيىستى ساۋال جىبەرىلدى. الايدا ول ساۋالداردىڭ ءبىر بولىگىنە تولىق ءارى ءتيىستى دەڭگەيدە جاۋاپ تۇسكەن جوق. ول جاۋاپ احۋالدى وبەكتيۆتى باعالاۋ ءۇشىن كەرەك بولاتىن، - دەپ جازادى قۇزىرلى ورگاننىڭ باسپا ءسوز قىزمەتى.

رەسمي مالىمەت بويىنشا باس كولىك پروكۋراتۋراسى 30-شىلدەدە مينيسترلىككە قايتا ساۋال جولداعان.

- بۇل جەردە ساۋال اقپاراتتىق- ءتۇسىندىرۋ سيپاتتا ەكەنىن، لاۋازىمدى تۇلعالاردىڭ جاۋاپكەرشىلى تۋرالى ماسەلەلەردى قامتىماعانىن ايتۋ كەرەك.

قىزمەتتەگى قاجەتتىلىك اياسىندا ءتيىستى باعىتتارعا جەتەكشىلىك ەتەتىن باسقارۋشى قىزمەتكەرلەردىڭ لاۋازىمدىق نۇسقاۋلىقتارى سۇراتىلدى. ءمينيستردىڭ لاۋازىمدىق مىندەتتەرىمەن بايلانىستى اقپارات سۇراتقان جوقپىز، - دەپ جازىلعان رەسمي مالىمەتتە.

ايتا كەتەيىك، كەشە كولىك ءمينيسترى نۇرلان ساۋرانبايەۆ ۇكىمەت ۇيىندەگى باسپا ءسوز ءماسليحاتىندا «قازاەروناۆيگاتسيا» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى باسشىسى كەڭەسشىسىنىڭ ۇستىنەن تەكسەرۋ ءجۇرىپ جاتقانىن ءمالىم ەتتى.

اۆتور

ەسىمجان ناقتىباي