كولساي كولدەرى ۇلتتىق پاركىندە قىزىل كىتاپقا ەنگەن قار بارىسى فوتوتۇزاققا ءتۇسىپ قالدى

استانا. KAZINFORM - «كولساي كولدەرى» مەملەكەتتىك ۇلتتىق تابيعي پاركىنىڭ اۋماعىندا قازاقستاننىڭ قىزىل كىتابىنا ەنگەن قار بارىسى (Panthera uncia) تىركەلدى. بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءمالىم ەتتى.

- بۇل ەرەكشە كادرلار ۇزاق مەرزىمگە ورناتىلعان فوتوتۇزاقتىڭ كومەگىمەن الىندى. بەينەماتەريالداردان بارىستىڭ ءوز اۋماعىن جۇيەلى تۇردە شولىپ جۇرەتىنى بايقالادى. باقىلاۋ ناتيجەلەرى بويىنشا، ول بۇل اۋماقتا شامامەن ءتورت اي بويى تىرشىلىك ەتكەن. الىنعان دەرەكتەر وسى سيرەك جىرتقىشتىڭ مەكەندەۋ ورتاسى مەن مىنەز- قۇلقىن زەرتتەۋ ءۇشىن اسا قۇندى عىلىمي ماتەريال بولىپ تابىلادى، - دەپ جازدى كوميتەتتەن.

ەسكە سالا كەتەيىك، بۇعان دەيىن جوڭعار الاتاۋى مەملەكەتتىك ۇلتتىق تابيعي پاركىنىڭ اۋماعىندا سيرەك كەزدەسەتىن ءارى جاسىرىن ءومىر سالتىن ۇستاناتىن جىرتقىش - قار بارىسى (يربيس) فوتوتۇزاققا ءتۇسىپ قالعان ەدى.

سونداي-اق كاتون-قاراعاي ۇلتتىق تابيعي پاركىنىڭ ارشاتى ورمانشىلىعىندا قار بارىسى فوتوتۇزاققا تۇسكەن بولاتىن.