كوكشەتاۋدا ەنەرگەتيكالىق سۋسىندى كوپ ىشكەن جاس ءوسپىرىمنىڭ اسقازانى كۇيىپ قالدى
استانا. KAZINFORM - كوكشەتاۋدا ەنەرگەتيك 16 جاستاعى جاس ءوسپىرىمنىڭ اسقازانىن كۇيدىرىپ جىبەرگەن. ول ءىشىنىڭ قاتتى اۋرىپ تۇرعانىنا شاعىمدانىپ اۋرۋحاناعا تۇسەدى.
وعان جەدەل تۇردە وتا جاسالدى، - دەپ حابارلايدى Massaget.kz ءتىلشىسى.
كوكشەتاۋدا كوپبەيىندى وبلىستىق بالالار اۋرۋحاناسىنىڭ دارىگەرلەرى مەكتەپ وقۋشىسىنا شۇعىل جانە كۇردەلى وتا جاسادى. سەبەبى - ەنەرگەتيكالىق سۋسىنداردى جيى ءىشۋ ىشكى اعزالاردىڭ اۋىر زاقىمدانۋىنا الىپ كەلگەن. دارىگەرلەر لاپاروسكوپيالىق وپەراتسيا جاساپ، جارانى تىككەن، قۇرساق قۋىسىن ىرىڭنەن تازالاپ، درەناج ورناتقان.
ەندى جاس ءوسپىرىم ۇزاق ۋاقىت ساۋىقتىرۋ كەزەڭىنەن ءوتۋى كەرەك.
«بالادا اسقازاننىڭ تەسىلگەن جاراسى جانە جايىلعان ءىرىڭدى پەريتونيت انىقتالدى. مۇنداي اۋىر دياگنوزدىڭ سەبەبى - ەنەرگەتيكتەرگە اۋەستىك. جاس ءوسپىرىمدى كۇردەلى وڭالتۋ كەزەڭى كۇتەدى، ەندى دەنساۋلىعى بۇرىنعىداي بولمايدى. اسقازاندا تىرتىق پەن جارا ىزدەرى قالادى»، - دەدى حيرۋرگيا ءبولىمىنىڭ مەڭگەرۋشىسى ەرنار قوجابەكوۆ.
دارىگەرلەردىڭ ايتۋىنشا، ەنەرگەتيكتەردى شامادان تىس تۇتىنۋ جارا، گاستريت، جۇرەك اۋرۋلارى جانە باسقا دا اۋىر اسقىنۋلارعا اكەلۋى مۇمكىن.
