كوكشەتاۋدا 39 مىسىق اسىرايتىن ايەل كورشىلەرىنىڭ نارازىلىعىن تۋعىزدى
كوكشەتاۋداعى شاعىناۋداندارىنىڭ ءبىرىنىڭ تۇرعىندارى مىسىق اسىرايتىن كورشىسىنىڭ ارەكەتىنە شاعىمداندى.
داۋدىڭ باسى قايدان شىقتى؟
يۋبيلەينىي شاعىناۋدانىنداعى 41ا ۇيدە تۇراتىن تۇرعىندار رەداكسياعا حابارلاسىپ، جىلدار بويى مازا جوق ەكەنىن جەتكىزدى. تۇرعىنداردىڭ سوزىنشە، كوپقاباتتى ۇيدە تۇراتىن ايەل 39 مىسىق اسىرايدى. سالدارىنان قولقانى قاباتىن ءيىس تۇرعىن ءۇيدىڭ بۇكىل كىرەبەرىسىن الىپ كەتكەن. تۇرعىندار جاعىمسىز يىستەن ابدەن قاجىعانىن ايتادى.
ولار بىرنەشە جىلدان بەرى "مىسىقتاردىڭ پاتەرىنە اينالعان" ءۇيدىڭ يەسىمەن ايقاسقانىمەن، ەش ناتيجە بولماپتى. ءتىپتى ولار قۇزىرلى ورگاندار مەن پوليسياعا دا جۇگىنگەن، الايدا پايداسى بولماپتى.
"يۋبيلەينىي 41ا شاعىناۋدانى، 1-كىرەبەرىستىڭ 11-پاتەرى ۇزاق جىلدان بەرى جانۋارلاردىڭ "باسپاناسىنا" اينالدى. اياداي عانا ەكى بولمە بولعانىمەن، كورشى ايەل جاڭا مىسىقتارعا دا ورىن تابادى. يەسىنىڭ جاسى ەگدە تارتقاندىقتان، مىسىقتاردان پايدا بولعان لاس جەرلەردى تازالاي دا المايدى. سوندىقتان كىرەبەرىسكە، ءتىپتى پاتەرلەرىمىزدىڭ ىشىنە دەيىن قولقانى قاباتىن ساسىق ءيىس تارايدى. مىسىقتارمەن جاسالعان تاجىريبەدەن دەنساۋلىققا اسا زيان اممياك بولىنەدى ەكەن. قۇزىرلى ورگاندارعا جۇگىنگەنىمىزبەن، ازىرگە ەشقانداي ناتيجەسى بولماي وتىر"، - دەيدى قالا تۇرعىنى گالينا فايزۋللايەۆا.
قانداي شارا قولدانىلدى؟
قۇزىرلى ورگاندار باسپانا جەكەمەنشىك بولعاندىقتان، ۇيگە كىرۋگە ەشقانداي نەگىز بولماعانىن العا تارتتى. ال تۇرعىن ۇيگە بارىپ تەكسەرىس جۇرگىزگەن سانيتارلىق- ەپيدەميولوگيالىق قىزمەت ماماندارى زيان اممياكتىڭ قالىپتى مولشەردەن ءۇش ەسە كوبەيىپ كەتكەنىن راستادى. ماماندار بۇل تۇرعىنداردىڭ دەنساۋلىعىنا ايتارلىقتاي زيان ەكەنىن ايتادى.
"تۇرعىن ۇيگە ارنايى بارىپ، جابىق جايداعى اۋاداعى زيان زاتتارعا 12 ولشەۋ جۇرگىزىلدى. ونىڭ ىشىندە 3 ولشەۋ بويىنشا اممياك بەكىتىلگەن شەكتى مولشەردەن بىرنەشە ەسە كوپ ەكەنى انىقتالدى. دەگەنمەن ازاماتتىق- قۇقىقتىق داۋلار تەك سوت تارتىبىندە شەشىلەدى"، - دەيدى اقمولا وبلىسىنىڭ سانيتارلىق ەپيدەميولوگيالىق قىزمەت وكىلى.
