كوكشەتاۋداعى ادام ولىمىنە سەبەپ بولعان جول اپاتىنا قاتىستى ەكى قىلمىستىق ءىس قوزعالدى
كوكشەتاۋ. KAZINFORM - بەلگىلى بولعانداي، ەر ادام كولىكتى جۇرگىزۋشى كۋالىگى جوق جۇبايىنا بەرگەن. سالدارىنان وبلىس ورتالىعىنداعى اۋلالاردىڭ بىرىندە ايەل ادام جاياۋ جۇرگىنشىنى قاعىپ، ول وقيعا ورنىندا كوز جۇمدى، دەپ حابارلادى Kazinform اگەنتتىگىنىڭ وڭىردەگى مەنشىكتى ءتىلشىسى.
اقمولا وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ مالىمەتىنشە، كوكشەتاۋدا 52 جاستاعى ايەلدىڭ ولىمىنە اكەلگەن جول-كولىك وقيعاسىنا بايلانىستى ەكى قىلمىستىق ءىس قوزعالعان.
- كولىك جۇرگىزگەن ايەلگە قاتىستى ادام ولىمىنە اكەلگەن جول قوزعالىسى ەرەجەلەرى مەن كولىك قۇرالدارىن پايدالانۋ تالاپتارىن بۇزۋ فاكتىسى بويىنشا سوتقا دەيىنگى تەرگەۋ جۇرگىزىلۋدە. تەرگەۋ بارىسىندا ايەلدىڭ كولىك جۇرگىزۋ قۇقىعى بولماعانى جانە ءتيىستى وقۋدان وتپەگەنى انىقتالدى، - دەپ حابارلادى ۆەدومستۆو.
سونىمەن قاتار كولىك يەسى - ونىڭ جۇبايىنا قاتىستى دا جۇرگىزۋشى كۋالىگى جوق ادامدى كولىك باسقارۋعا جىبەرگەنى ءۇشىن قىلمىستىق ءىس قوزعالدى. بۇل باپ بويىنشا باس بوستاندىعىنان ايىرۋ جازاسى قاراستىرىلعان.
- قازىرگى ۋاقىتتا جول-كولىك وقيعاسىن جان-جاقتى جانە وبەكتيۆتى تەرگەۋگە باعىتتالعان قاجەتتى تەرگەۋ ارەكەتتەرى جۇرگىزىلۋدە، - دەپ تولىقتىردى ۆەدومستۆو.
11-مامىر كۇنى كوكشەتاۋ قالاسىنىڭ مامانداندىرىلعان تەرگەۋ سوتى كۇدىكتىگە قاتىستى «ءۇيقاماق» تۇرىندەگى بۇلتارتپاۋ شاراسىن سانكسيالادى. قىلمىستىق ىستەردىڭ تەرگەلۋى پوليتسيا دەپارتامەنتى باسشىلىعىنىڭ باقىلاۋىندا.
ەسكە سالايىق، بۇعان دەيىن كوكشەتاۋ قالاسىنىڭ سارىارقا شاعىن اۋدانىنداعى اۋلالاردىڭ بىرىندە ادام ولىمىمەن اياقتالعان جول-كولىك وقيعاسى بولعان ەدى.
