كوكشەتاۋدا كولىك ايەلدى قاعىپ ءولتىردى - وقيعا ۆيدەوعا ءتۇسىپ قالعان
استانا. KAZINFORM - كوكشەتاۋ قالاسىنىڭ سارىارقا شاعىن اۋدانىنداعى اۋلالاردىڭ بىرىندە ادام ولىمىمەن اياقتالعان جول-كولىك وقيعاسى بولدى، دەپ حابارلايدى Kazinform اگەنتتىگىنىڭ ءتىلشىسى.
الەۋمەتتىك جەلىلەردە 9-مامىر كۇنى كوكشەتاۋدىڭ ءبىر شاعىن اۋدانىندا بولعان جول-كولىك وقيعاسى تۇسىرىلگەن ۆيدەو تارادى. كادردان كولىك اۋلاعا كىرىپ كەلە جاتىپ، جاياۋ كەلە جاتقان ايەلدى قاعىپ، ۇستىنەن باسىپ وتكەنىن كورۋگە بولادى. ودان كەيىن كولىكتەن ايەل جۇرگىزۋشى مەن جولاۋشىلار جۇگىرىپ شىققان.
اقمولا وبلىسى پوليتسيا دەپارتامەنتىنىڭ باسپا ءسوز قىزمەتى حابارلاعانداي، جول-كولىك وقيعاسى بويىنشا قىلمىستىق ءىس قوزعالدى.
- وقيعانىڭ ءمان-جايىن انىقتاۋ ءۇشىن قاجەتتى تەرگەۋ ارەكەتتەرى جۇرگىزىلىپ جاتىر، - دەپ مالىمدەدى ۆەدومستۆو.
وقيعادان كەيىن سارىارقا شاعىن اۋدانىنىڭ تۇرعىندارى اۋلاعا كىرەبەرىسكە جاساندى جول كەدەرگىسىن (لەجاچي پوليتسەيسكي) ورناتۋدى نەمەسە جالعىز كىرەبەرىس تۇسقا شلاگباۋم قويۋدى، نە بولماسا ەكىنشى كىرەبەرىس اشۋدى سۇراپ بەينەۇندەۋ جاسادى.
پوليتسيا وكىلدەرى ءوز جاۋابىندا قازاقستان رەسپۋبليكاسى جول قوزعالىسى ەرەجەلەرىنىڭ 17-بولىمىنە سايكەس، تۇرعىن ايماقتا جاياۋ جۇرگىنشىلەردىڭ تروتۋارمەن دە، جولدىڭ ءجۇرىس بولىگىمەن دە جۇرۋىنە رۇقسات ەتىلەتىنىن ءتۇسىندىردى. تۇرعىن ايماقتا جاياۋ جۇرگىنشىلەر باسىمدىققا يە، الايدا ولار كولىك قوزعالىسىنا نەگىزسىز كەدەرگى كەلتىرمەۋى ءتيىس.
سونداي-اق پوليتسيا اۋلا اۋماقتارىندا كولىكتىڭ ترانزيتتىك (وتپەلى) قوزعالىسىنا تىيىم سالىناتىنىن جانە تۇرعىنداردىڭ ءومىرى مەن دەنساۋلىعىنا قاۋىپ توندىرەتىن كەز كەلگەن ارەكەتتەرگە جول بەرىلمەيتىنىن ەسكە سالدى.
- جاساندى جول كەدەرگىلەرىن، قوسىمشا جول بەلگىلەرىن جانە قوزعالىستى ۇيىمداستىرۋدىڭ باسقا دا ەلەمەنتتەرىن ورناتۋ ماسەلەلەرى زاڭنامادا بەلگىلەنگەن تارتىپپەن جەرگىلىكتى اتقارۋشى ورگاندارمەن بىرلەسىپ جانە قالانىڭ باس جوسپارىن ەسكەرە وتىرىپ شەشىلەدى، - دەپ تولىقتىردى پوليتسيا.
