كوشپەندىلەر ويىنى: وۆاري قانداي ويىن، قازاقستاننان ەل نامىسىن كىمدەر قورعايدى

استانا. قازاقپارات - 5- دۇنيەجۇزىلىك كوشپەندىلەر ويىندارىنىڭ باعدارلاماسىنا ەنگەن سپورت ءتۇرىنىڭ ءبىرى - باتىس افريكا حالىقتارىنىڭ زياتكەرلىك ويىنى وۆاري.

بۇگىن وسى ويىن تۇرىنەن سايىستار باستالادى. وسىعان وراي وۆاري ويىنى تۋرالى وقىرماندارىمىزعا قىسقاشا تانىستىرا كەتكەندى ءجون ساناپ وتىرمىز.

وۆاري ويىنى قازاقستاندا قاتتى دامىماسا دا، حالىقارالىق جارىستاردا سپورتشىلارىمىز جاقسى ونەر كورسەتىپ ءجۇر. 2006 -جىلعى لوندون زياتكەرلىك ويىندار وليمپياداسىندا، كانن فەستيۆالىندە جۇلدە الدى. قازاقستان قۇراماسى 2018 -جىلى قىرعىزستاندا وتكەن 3- دۇنيەجۇزىلىك كوشپەندىلەر ويىندارىندا وۆاريدەن جارقىن جەڭىسكە جەتتى. وۆاريدەن ۇلتتىق قۇرامانىڭ ۇزدىك سپورتشىلارى ەل نامىسىن قورعاپ، ەكى التىن مەدال جەڭىپ الدى. اسەل داليەۆا مەن ديانا كەنينا كوماندالىق ەسەپتە التىن مەدال السا، ايەلدەر اراسىندا جەكەلەي ەسەپتە اسەل داليەۆا التىن جۇلدەگە يە بولعان ەدى.

ونى ەكى ادام وينايدى. ويىن تاقتاسىندا ەكى قاتاردا ورنالاسقان التى بىردەي شۇڭقىرشا بولادى، ولار بىرگە 12 كىشكەنتاي شۇڭقىرشالاردى قۇرايدى، سونىمەن قاتار، ويىنشىلاردا تاستاردى جينايتىن ۇلكەن جيناقتاۋشى ساقتاۋ شۇڭقىرشالارى بولادى. وۆاري ويىنى 48 شارمەن وينالادى.

تاقتانىڭ ءوز جاعىنداعى التى كىشكەنتاي شۇڭقىرشا ويىنشىنىڭ الاڭى، ال قاراما-قارسى التى شۇڭقىرشا سايكەسىنشە قارسىلاستىڭ الاڭى بولادى. وي̆ىنشىلار ءوز قويماسىندا مۇمكىندىگىنشە كوپ شار جيناۋعا تىرىسادى. كىم كوپ شار جيناسا، سول ويىنشى جەڭىسكە جەتەدى.

وۆاري ويىنىنىندا كوماندا قۇرامى 2 ەر، 2 ايەل، 1 باپكەردەن قۇرالادى.

جارىستار شۆەيتساريالىق جۇيە بويىنشا جەكە جانە كوماندالىق ەسەپتە وتكىزىلەدى. تۋردىڭ سانى - 7. قورىتىندى ەرلەر مەن ايەلدەر اراسىندا بولەك جيىنتىقتالادى. ءار ويىنشىعا ءبىر وي̆ىنعا 20 مينۋت ۋاقىت بەرىلەدى.

جارىستى دۇنيەجۇزىلىك «توعىزقۇمالاق» فەدەراتسياسى «وۆاري» حالىقارالىق فەدەراتسياسىمەن بىرلەسىپ وتكىزەدى.

وۆاريدەن ەل نامىسىن 5- دۇنيەجۇزىلىك كوشپەندىلەر ويىندارىندا توعىزقۇمالاقتان ق ر ەڭبەگى سىڭگەن سپورت شەبەرى سەرىك اقتايەۆ، حالىقارالىق دارەجەدەگى سپورت شەبەرى ەرنۇر مەرەشەۆ، توعىزقۇمالاقتان ق ر ەڭبەگى سىڭگەن سپورت شەبەرى اسەل داليەۆا جانە توعىزقۇمالاقتان حالىقارالىق دارەجەدەگى سپورت شەبەرى اڭساعان قوجاناسىپ قورعايدى.

اۆتور
كۇنسۇلتان وتارباي