كوشپەندىلەر ويىنى: مانگالا قانداي ويىن، قازاقستاننان ەل نامىسىن كىمدەر قورعايدى

استانا. قازاقپارات - 5- دۇنيەجۇزىلىك كوشپەندىلەر ويىندارىنىڭ باعدارلاماسىنا ەنگەن سپورت ءتۇرىنىڭ ءبىرى - تۇرىك حالقىنىڭ زياتكەرلىك ويىنى مانگالا.

مانگالانى ەكى ادام وينايدى. ويىن تاقتاسىندا ەكى قاتاردا ورنالاسقان التى بىردەي شۇڭقىر بولادى، ولار بىرگە 12 كىشكەنتاي شۇڭقىردى قۇرايدى. سونىمەن قاتار، ويىنشىلاردىڭ تاستاردى جينايتىن ۇلكەن جيناقتاۋشى ساقتاۋ شۇڭقىرى بولادى. «مانگالا» ويىنى 48 تاسپەن وينالادى.

ويىن جەرەبە تاستاۋدان باستالادى. ويىنشىلار بارلىق 48 تاستى، ءتورت-تورتتەن 12 شۇڭقىردىڭ ءارقايسىسىنا تاراتىپ، جيناقتاۋ شۇڭقىرىن بوس قالدىرادى. تاقتانىڭ ءوز جاعىنداعى التى كىشكەنتاي شۇڭقىر ويىنشىنىڭ الاڭى، ال قاراما-قارسى التى شۇڭقىر سايكەسىنشە قارسىلاستىڭ الاڭى. ويىنشىلار ءوز قويماسىندا مۇمكىندىگىنشە كوپ تاس جيناۋعا تىرىسادى. كىم كوپ تاس جيناسا، سول ويىنشى جەڭىسكە جەتەدى.

كوماندا قۇرامى 2 ەر، 2 ايەل، 1 باپكەردەن تۇرادى.

جارىستار شۆەيتساريالىق جۇيە بويىنشا جەكە جانە كوماندالىق ەسەپ بويىنشا وتكىزىلەدى. كەزەڭدەر سانى - 7. قورىتىندىلار ەرلەر مەن ايەلدەر اراسىندا بولەك جيىنتىقتالادى. ءار ويىنشىعا ءبىر ويىنعا 20 مينۋت ۋاقىت بەرىلەدى.

جارىستار دۇنيەجۇزىلىك «توعىزقۇمالاق» فەدەراتسياسى «مانگالا» حالىقارالىق فەدەراتسياسىمەن بىرلەسىپ وتكىزىلەدى.

5- دۇنيەجۇزىلىك كوشپەندىلەر ويىندارىندا مانگالادان ەل نامىسىن ەرلەر اراسىندا ازامات قايداروۆ، بيعالي زكريايەۆ قورعاسا، ايەلدەر اراسىندا قۇندىز ەسىركەپ پەن ايكەرىم قۋانىشبەكوۆا قورعايدى.

اۆتور كۇنسۇلتان وتارباي