كوشپەندىلەر ويىنى: بەرىك ءۋالي قۇسبەگىلەردىڭ دايىندىعىن تەكسەردى
استانا. قازاقپارات - 5-دۇنيەجۇزىلىك كوشپەندىلەر ويىندارى قارساڭىندا رەسپۋبليكالىق قۇسبەگىلىك فەدەراتسياسىنىڭ پرەزيدەنتى بەرىك ءۋالي ۇلتتىق قۇراما سپورتشىلارىنىڭ قاتىسۋىمەن جينالىس وتكىزدى.
باسقوسۋدا جاھاندىق دودادا ەلىمىزدىڭ نامىسىن قورعايتىن قۇسبەگىلەردىڭ دايىندىعى پىسىقتالدى.
ەلوردادا وتكەن جيىنعا قۇسبەگىلىك فەدەراتسياسىنىڭ پرەزيدەنتى بەرىك ءۋالي، ۆيتسە- پرەزيدەنتتەر - جانجىگىت ومارحان مەن باعدات مۇپتەكە قىزى، سونداي-اق اتقارۋشى ديرەكتور بازاربەك كۋنتۋعان جانە قۇسبەگى سپورتشىلار قاتىستى.
كۇن تارتىبىندەگى باستى ماسەلە - 8-13-قىركۇيەك ارالىعىندا استانادا وتەتىن 5- دۇنيەجۇزىلىك كوشپەندىلەر ويىندارىندا قۇسبەگىلىك سايىسى بويىنشا باق سىنايتىن ۇلتتىق قۇرامانىڭ دايىندىعى. بايراقتى باسەكەدە قازاقستاننىڭ نامىسىن قۇسبەگىلىكتەن توعىز سپورتشى قورعايدى. ولار، بۇركىت قۇسى بويىنشا - سەرىكبەك كۋنتۋگان، ەرزات بايكاداموۆ، ارمان كۋشكاروۆ، قارشىعا قۇسى بويىنشا - داۋرەن ارشاباي، باعدات كەۋەنوۆ، قۇدايبەرگەن راۋيل ۇلى جانە يتەلگى قۇسى بويىنشا - ەرلان كەنجەتايەۆ، باقداۋلەت باباجان، يبراگيم بازاربايەۆ.
جوعارىدا اتى اتالعان توعىز ازامات ەل ىشىندەگى چەمپيوناتتارىمىزدا - جۇزدەن جۇيرىك شىققان ۇزدىكتەر. جىل باسىنان بەرى ۇلتتىق قۇراما ساپىنداعى قۇسبەگىلەر ءۇشىن الماتى قالاسى مەن اقمولا وبلىسىندا ەكى وقۋ- جاتتىعۋ جيىنى وتكەن بولاتىن. ءۇشىنشى وقۋ-جاتتىعۋ جيىنى استانا قالاسىندا 27-تامىزدان 7-قىركۇيەككە دەيىن جالعاسادى. قازاقستاندىق سپورتشىلاردىڭ كوشپەندىلەر ويىندارىنا دايىندىعى فەدەراتسيا پرەزيدەنتىنىڭ جەكە باقىلاۋىندا.
«ەلىمىزدىڭ تورىندە تورتكۇل دۇنيە كوز تىككەن ۇلكەن شارا وتكەلى جاتىر. وسى ءدۇبىرلى دودادا ەل تۋىن سەنىپ تاپسىرعان سپورتشىلارىمىزعا فەدەراتسيا اتىنان ساتتىلىك تىلەيمىن. شاپقان اتتىڭ تۇياعى، ۇشقان قۇستىڭ قاناتى تالاتىن ۇلان- عايىر دالانىڭ يەسىن، قىران باپتاپ، قۇس سالعان بەگزادا ونەردىڭ كيەسىن تانىتاتىن ساتتە ايانىپ قالمايىق. مەملەكەت باسشىمىزدان باستاپ بۇكىل ەل بىزگە سەنىم ارتىپ وتىر»، - دەدى «قۇسبەگىلىك» فەدەراتسياسىنىڭ پرەزيدەنتى.
سونىمەن قاتار، بەرىك ۋاليدىڭ توراعالىعىمەن وتكەن جيىندا مەدالدىك مىندەتتەمەلەر مەن قوسىمشا سىياقى مولشەرى جاريالاندى.
بەلگىلى بولعانداي، V دۇنيەجۇزىلىك كوشپەندىلەر ويىندارى ديرەكسياسىنىڭ اتىنان جەكە سپورت تۇرلەرىندە جەڭىمپازدار - ءبىرىنشى ورىن ءۇشىن 500 مىڭ تەڭگە، ەكىنشى ورىن يەلەنگەندەر - 300 مىڭ تەڭگە، قولا جۇلدەگەر - 200 مىڭ تەڭگەدەن الادى.
بۇدان بولەك، ءدۇبىرلى دودادا قۇسبەگىلىكتەن قازاقستان قورجىنىنا مەدال سالعان ۇلتتىق قۇراما مۇشەلەرىنە فەدەراتسيا پرەزيدەنتىنىڭ اتىنان ارنايى سىياقى بەرىلەتىنى ايتىلدى. ياعني، ءبىرىنشى ورىن ءۇشىن - 1000000 تەڭگە، 2-ورىنعا - 500000 تەڭگە، 3-ورىنعا - 300000 تەڭگە بايگە تىگىلىپ وتىر.
ەستەرىڭىزگە سالا كەتسەك، «قۇسبەگىلىك» سپورت تۇرىنەن جارىس قىركۇيەكتىڭ 12-13-كۇندەرى استانانىڭ ەتنواۋىل اۋماعىندا وتەدى.
