كوشپەندىلەر ويىندارى: امەريكالىق كوۆبويلار كوكپار ويناۋعا كەلە جاتىر
استانا. KAZINFORM - امەريكالىق كوۆبويلار كومانداسى قازاقستانعا V دۇنيەجۇزىلىك كوشپەندىلەر ويىندارىنا قاتىسادى.
ا ق ش قۇراماسىنىڭ كاپيتاندارى ۆاشينگتوننان جولعا شىعار الدىندا ورتالىق ازيا حالىقتارىنىڭ سپورتتىق ءداستۇرى جايلى اگەنتتىكتىڭ مەنشىكتى تىلشىسىمەن تىلدەسكەن ەدى.
كوكپار جانە كوكبورىدەن «USA Kokpar Team» امەريكالىق كومانداسىنىڭ كاپيتانى لەدد حوۋەلل (Ladd Howell) جىلقىعا بالا كۇنىنەن قۇمار ەكەنىن جانە ا ق ش-تاعى كاسىبي رودەو-كوۆبويىن جاقسى كورەتىنىن ايتتى.
كوكپار مەن كوكبورى تۋرالى العاش 2018 -جىلى دوستارى YouTube-تان ۆيدەو كورسەتكەن كەزدە بىلگەن.
«دوسىم ماعان ءبىر ۆيدەونى كورۋ كەرەكسىڭ دەدى. ونى 5 مينۋت قارادىم دا اۋزىم اشىلىپ قالدى. مەن كورگەن ەڭ كەرەمەت كورىنىس بولدى. ەكى ايدان سوڭ ۆايومينگتەگى دوستارىمنىڭ ءبىرى قىرعىزستاندا وتكەن Ⅲ دۇنيەجۇزىلىك كوشپەندىلەر ويىندارىنا قاتىسۋعا شاقىردى. ءسويتىپ العاش 2018 -جىلى وينادىم جانە ماعان ۇنادى. بۇل مادەنيەت پەن سپورت ءتۇرى ۇنايدى»، - دەپ ەسىنە الدى لەدد حوۋەلل.
ا ق ش ۇلتتىق قۇراماسى كاپيتانىنىڭ ايتۋىنشا، ولاردا مۇنداي ويىن ءتۇرى جوق، ءبىراق امەريكادا رودەو-كوۆبوي كەڭىنەن تارالعان. وندا بالالاردى كوۆبوي بولۋعا ەرتە جاستان باۋلىپ، جاتتىعۋعا جانە جىلقىلاردى كۇتىپ باپتاۋعا ۇيرەتەدى. بۇل جۇزدەگەن جىلدار بويى الەمنىڭ باسقا توڭىرەگىندە وينالاتىن كوكپار مەن كوكبورىگە ۇقساس.
«بۇل ءداستۇرلى ويىننىڭ قانشالىقتى كەرەمەت جانە ەرەكشە ەكەنىن ءتۇسىنۋ وتە ماڭىزدى. مادەنيەتىمىزدى بىرىكتىرۋگە تىرىسامىز، جىلقى كوپىر سەكىلدى، ءبارىمىزدى بىرىكتىرەدى. جىلقى - بارشاعا ورتاق حالىقارالىق ءتىل سەكىلدى، سوندىقتان ءبىز سپورت پەن مادەنيەتتى ۇناتامىز»، - دەيدى ول.
سونىمەن قاتار كاپيتان امەريكالىق كوماندانىڭ سپورتتىق سايىستارعا دايىندالۋدىڭ كەيبىر ساتتەرىنە توقتالدى. اتاپ ايتقاندا، «USA Kokpar Team» ويىندارعا ءوز جىلقىلارىن اكەلە المايدى، اتتاردى قازاقستاندىق تاراپ بەرەدى.
«ءبىز جىلقىلاردى كورۋدى اسىعا كۇتەمىز. ولارمەن جارىستان بىرەر كۇن بۇرىن جاتتىعۋ جاساپ، قايسىسى شابۋىلعا شىعادى جانە قايسىسى قورعانىستا بولاتىنىن انىقتايمىز»، - دەپ ءبولىستى ل. حوۋەلل.
ونىڭ ايتۋىنشا، كوماندا مۇشەلەرى ا ق ش- تىڭ ءارتۇرلى شتاتىنان، سوندىقتان دا ءبارى ءبىر جەرگە جينالىپ جاتتىعۋ وتكىزۋ قيىن. دەگەنمەن اركىم ءوز بەتىنشە جىلقىمەن دايىندالعان.
USA Kokpar Team-نىڭ ەكىنشى كاپيتانى سكوتت سيممەرمان (Scott Zimmerman) كوماندا ءساتتى ويىن كورسەتىپ، الداعى ويىندا جەڭىستەن ءۇمىتتى.
«ءبىز باتىس امەريكانىڭ كوۆبوي مادەنيەتىمەن بولىسە الاتىنىمىزعا، سونداي-اق ورتالىق ازيا ەلدەرىنىڭ مادەنيەتىن قابىلداي الاتىنىمىزعا سەنىمدى بولعىمىز كەلەدى. ءبىز قازاقستان تۋرالى جانە بىزگە بۇيىرعان وسى بىرەگەي مۇمكىندىك تۋرالى ايتقىمىز كەلەدى»، - دەدى سكوتت سيممەرمان.
سونداي-اق سكوتت سيممەرمان امەريكادا كوكپار مەن باسقا ويىنداردى ناسيحاتتاۋعا تىرىسىپ جۇرگەنىن ايتتى. ونىڭ پىكىرىنشە، بۇل مادەنيەت كوپشىلىككە اسىرەسە باتىس امەريكا مادەنيەتىندەگى كوۆبويلارعا ۇناۋى ءتيىس. سول ماقساتتا ياعني ورتالىق ازيا مادەنيەتى مەن ونىڭ ەتنيكالىق سپورت تۇرلەرىن جاقسى ءتۇسىنۋ ءۇشىن ولار كوشپەندىلەر ويىندارىنا قاتىسۋدى جالعاستىرۋدا. كوشپەندىلەر ويىندارى قيىن سپورت تۇرلەرى بولسا دا، امەريكالىقتار جارىستى اسىعا كۇتەدى.
«ءوزىم قالاعان سپورت تۇرىندە تەزىرەك باق سىناعىم، اتقا وتىرىپ شاپقىم كەلەدى»،- دەيدى س. سيممەرمان.
ەستەرىڭىزگە سالا كەتەيىك، V دۇنيەجۇزىلىك كوشپەندىلەر ويىندارى استانا قالاسىندا 8-13-قىركۇيەك ارالىعىندا وتەدى.
دۇنيەجۇزىلىك كوشپەندىلەر ويىندارىندا 89 مەملەكەتتىڭ سپورتشىلارى باق سىنايدى.
ايتا كەتسەك، دۇنيەجۇزىلىك كوشپەندىلەر ويىندارىندا تۇڭعىش رەت بارلىق قۇرلىقتىڭ وكىلى باق سىنايدى.
