مەكتەپتە «ياساۋي تانۋ» ءپانى وقىتىلادى
استانا. KAZINFORM - مەكتەپتەردە «ياساۋي تانۋ» ءپانى ەنگىزىلمەك. قازىردىڭ وزىندە تۇركىستانداعى 36 ءبىلىم وشاعىندا عۇلامانىڭ حيكمەتتەرى مەن ونەگەلى ءومىرى وقىتىلا باستادى. بۇل تۋرالى Jibek Joly تەلەارناسى حابارلادى.
ۇكىمەت ۇلى ويشىلدىڭ ەڭبەكتەرىن ناسيحاتتاپ، تۇركىستاندى رۋحاني ءتۋريزمنىڭ ورتالىعىنا اينالدىرۋدى كوزدەيتىن ارنايى جوسپاردى بەكىتتى.
قۇجات اياسىندا 37 ءىس-شارا جۇزەگە اسپاق. بۇدان بولەك، كەسەنەدە عىلىمي-رەستاۆراتسيالاۋ جۇمىستارى جۇرگىزىلىپ، جاڭا تۋريستىك مارشرۋتتار ازىرلەنەدى.
سونداي-اق يۋنەسكو دەڭگەيىندە ياساۋي جىلىن جاريالاۋ ماسەلەسى پىسىقتالماق.
عالىمدار بۇل قادامداردى ۇلى تۇلعانىڭ مۇراسىن الەمدىك دەڭگەيدە تانىتۋ مەن جاس ۇرپاقتىڭ رۋحاني تاربيەسىن نىعايتۋدىڭ ماڭىزدى تەتىگى دەپ باعالايدى.
- مەكتەپ قابىرعاسى دەگەن زايىرلى مەكەمە. بۇل جەردە ەشبىر دىنگە باسىمدىق بەرىلمەيدى، ەشبىر كوزقاراس سىنالمايدى. قوجا احمەت ءياساۋيدىڭ ءىلىمى وبەكتيۆتى تۇردە تۇسىندىرىلەدى. دەگەنمەن قازاقي سالت-ءداستۇر، ار وجدان بوستاندىعى، ۇيات، نامىس دەگەن ماسەلەلەر نەگىزگە الىنادى، - دەدى ياساۋي تانۋ عىلىمي ورتالىعىنىڭ قىزمەتكەرى باۋىرجان بوتاقارايەۆ.
