كەسىرتكەلەر مەن جارقاناتتار بەرليندەگى تۇرعىن ءۇي قۇرىلىسىنا كەدەرگى كەلتىرىپ جاتىر
استانا. KAZINFORM - بەرليندە تۇرعىن ءۇي تاپشىلىعى مەن جانۋارلار تۇرلەرىن ساقتاۋ ماسەلەسى اراسىندا ەرەكشە قايشىلىق تۋىندادى. Bild گازەتىنىڭ حابارلاۋىنشا، كىشكەنتاي عانا كەسىرتكە ەل استاناسىنداعى العاشقى ءزاۋلىم تۇرعىن ءۇي عيماراتىنىڭ قۇرىلىسىن باياۋلاتۋى مۇمكىن، دەپ حابارلايدى Euronews.
بيىكتىگى 167 مەتر بولاتىن، مىڭنان استام پاتەرى بار مۇنارانى Warschauer Brücke كوشەسىندە سالۋ جوسپارلانعان. الايدا قۇرىلىس الاڭىنىڭ ءدال جانىندا قاتاڭ قورعالاتىن تىرشىلىك يەسى - قۇم كەسىرتكەسى مەكەندەيدى. ساراپشىلاردىڭ ەسەبىنشە، بولاشاق عيمارات ونىڭ مەكەن ەتۋ اۋماعىنىڭ ەداۋىر بولىگىن كولەڭكەدە قالدىرادى. اڭگىمە بولاشاقتا كۇن ساۋلەسى از تۇسەتىن 1300 شارشى مەتردەن استام اۋماق تۋرالى بولىپ وتىر.
بۇل اسىرەسە جىلۋدى سۇيەتىن جانۋارلار ءۇشىن ۇلكەن ماسەلە بولۋى مۇمكىن. سوندىقتان جوبانى جۇزەگە اسىرۋ ءۇشىن اۋقىمدى قورعانىس شارالارىن قابىلداۋ جوسپارلانعان.
Bild گازەتىنىڭ مالىمەتىنە س. يەنسەك، جانۋارلاردى قۇرىلىس الاڭىنان اۋلاق ۇستاۋ ءۇشىن جەرگە 20 سانتيمەتر تەرەڭدىككە كومىلگەن پۆح ۇلدىرىنەن قورشاۋ ورناتىلادى. سونىمەن قاتار قۇم مەن قۋراعان اعاشتاردان ارنايى بالاما مەكەن ەتۋ ايماقتارى جاسالادى.
مۇندا باسقا جانۋارلار دا ماڭىزدى ءرول اتقارادى: تاڭەرتەڭ ەرتە جانە كەشكى ۋاقىتتا قۇرىلىس جۇمىستارى ۋاقىتشا توقتاتىلۋى ءتيىس، ال ءىڭىر تۇسكەن كەزدە كرانداردىڭ قوزعالۋىنا مۇلدە تىيىم سالىنادى. سەبەبى ءدال وسى ۋاقىتتا جارقاناتتار قورەك ىزدەپ ۇشىپ جۇرەدى جانە تەحنيكامەن سوقتىعىسپاۋى كەرەك.
ءتىپتى قۇندىزداردىڭ دا اسەرى بار: ولاردىڭ قۇرىلىس الاڭىنا كىرىپ كەتۋىنە جول بەرمەۋ ءۇشىن اۋماقتى تۇراقتى تۇردە كۇزەتۋ قاجەت، ويتكەنى ولار نەبارى بىرنەشە ءجۇز مەتر قاشىقتىقتا تىرشىلىك ەتەدى.
تۇرلەردى قورعاۋ قاجەتتىلىگىنە قاراماستان، كەيبىر ساياساتكەرلەر تۇرعىن ءۇي قۇرىلىسىنا كوبىرەك كوڭىل بولۋگە شاقىرىپ جاتىر. جالعا الۋ اقىسىنىڭ ءوسۋى مەن باسپانا تاپشىلىعى جاعدايىندا قۇرىلىستى جەدەلدەتۋگە قىزىعۋشىلىق ارتىپ كەلەدى.
ح د س/ح س س پارلامەنتتىك فراكسياسىنىڭ قۇرىلىس ساياساتى جونىندەگى وكىلى يان-ماركو لۋچاك Bild باسىلىمىنا بەرگەن جاۋابىندا بەرليندە «مىڭداعان پاتەر» جەتىسپەيتىنىن اتاپ ءوتتى.
- سونىڭ سالدارىنان جالداۋ اقىسى ءوسىپ، پاتەر الۋعا دەگەن كەزەك بارعان سايىن ۇزارىپ بارادى. بىزگە قولجەتىمدى تۇرعىن ءۇيدى كوبىرەك سالۋ قاجەت جانە بۇل ابسوليۋتتى باسىمدىققا اينالۋى ءتيىس. ميلليونداعان جىلدىق ءساتتى ەۆوليۋتسيادان كەيىن قۇم كەسىرتكەسى ەشقانداي رەسمي رۇقساتسىز-اق كۇننىڭ جىلى جەرىن ءوزى تاباتىنى انىق، - دەدى لۋچاك.
