كرەديت بويىنشا 10 مىڭنان استام ساربازعا كانيكۋل بەرىلدى - مينيسترلىك
استانا. KAZINFORM - قازىر اسكەر قاتارىنا كەلگەن ساربازدارعا نەسيەلەرىن وتەۋ كەيىنگە شەگەرىلىپ جاتىر. بۇل تۋرالى ق ر قورعانىس ءمينيسترىنىڭ ورىنباسارى دارحان احمەديەۆ ءمالىم ەتتى.
«قارۋلى كۇشتەردى سيفرلىق ترانسفورماتسيالاۋ اسكەري قىزمەت وتكەرۋدىڭ تارتىمدىلىعىن ارتتىرۋ ءىس-شارالارىن ىسكە اسىرۋعا مۇمكىندىك بەردى. ونىڭ ءبىرى مەرزىمدى اسكەري قىزمەتكە شاقىرىلعان ازاماتتارعا كرەديتى بويىنشا كانيكۋل بەرۋگە قاتىستى. ازاماتتاردى مەرزىمدى اسكەري قىزمەتكە شاقىرۋ تۋرالى بۇيرىق تىكەلەي جۇيەدە شىعارىلىپ، بىردەن مەملەكەتتىك كرەديتتىك بيۋروعا جانە ءبىرىنشى كرەديتتىك بيۋرو سەرۆيسىنە بەرىلەدى. وسى ۇيىمدار نەسيەسى بار ساربازداردى بىردەن انىقتاپ، دەرەكتەردى بانكتەر مەن شاعىن نەسيە ۇيىمدارىنا جولدايدى. بۇدان كەيىن قارىزدى كەيىن وتەۋ تۋرالى شەشىم شىعارىلادى»، - دەدى د. احمەديەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، بانك ساربازداردىڭ بەرەشەگىن قايتارۋ مەرزىمىن 14 ايعا دەيىن شەگەردى. بۇل تۇرعىدا ەندى مەرزىمدى اسكەري قىزمەتشى 12 اي قارۋلى كۇشتەر قاتارىندا بولعان كەزەڭدە، سونداي-اق ۇيگە ورالعان سوڭ 2 اي مەرزىمدە قارىزىن وتەۋدەن بوساتىلادى.
«وسى ەكى ايدىڭ ىشىندە اسكەردەن ورالعاندار جۇمىسقا ورنالاسىپ، قارىزىن وتەي باستايدى. جالپى سوماسى 4 ميلليارد تەڭگەگە 15 مىڭ قارىز بويىنشا مەرزىمدى اسكەري قىزمەتكە شاقىرىلعان 10 مىڭنان استام ادامعا كرەديت بويىنشا كانيكۋل بەرىلدى»، - دەدى ءمينيستردىڭ ورىنباسارى.
بۇعان دەيىن اقتاۋدا تەڭىز جاياۋ اسكەرلەرى بريگاداسىنىڭ جۇزگە جۋىق ساربازى كرەديتتىك كانيكۋل العانىن جازعان ەدىك.
