كۇن سايىن جۇزدەگەن ءسوز جوعالادى: ادامدار سويلەسۋدى ۇمىتىپ قالماي ما؟

بۇل ءۇردىس العاشىندا بايقالمايدى، ءبىراق ۋاقىت وتە كەلە كۇندەلىكتى قارىم-قاتىناسقا اسەر ەتە باستايدى.

Perspectives on Psychological Science جۋرنالىندا جاريالانعان دەرەكتەرگە سۇيەنسەك، 2000-جىلداردىڭ ورتاسىندا ءبىر ادام ورتا ەسەپپەن كۇنىنە شامامەن 16 مىڭ ءسوز ايتقان. بۇعان جاقىندارىمەن اڭگىمە، كوشەدەگى قىسقا ديالوگتار، دۇكەندەگى سويلەسۋلەردىڭ بارلىعى قوسىلعان. الايدا كەيىنگى جىلدارى بۇل كورسەتكىش بىرتىندەپ تومەندەگەن. 2019-جىلعا قاراي ءبىر تاۋلىكتەگى ءسوز سانى 12,7 مىڭعا دەيىن ازايعان.

العاش قاراعاندا ايىرماشىلىق ۇلكەن ەمەس سياقتى. جىل سايىن شامامەن 300 دەن ءسال اساتىن سوزگە عانا كەميدى. ءبىراق جىلدار وتە بۇل ايتارلىقتاي وزگەرىسكە اينالادى. ياعني ادامدار ونداعان مىڭ ءسوزدى ايتپايدى، تيىسىنشە كوپتەگەن قاراپايىم ءارى ماڭىزدى اڭگىمەلەر دە جوعالىپ بارادى.

زەرتتەۋشىلەر مۇنىڭ باستى سەبەپتەرىنىڭ ءبىرى رەتىندە تەحنولوگيانىڭ دامۋىن اتايدى. بۇرىن سويلەسۋدى قاجەت ەتەتىن ارەكەتتەر قازىر ءسوزسىز-اق جۇزەگە اسادى. ماسەلەن، تاماققا تاپسىرىس بەرۋ، ساتىپ الۋ، ءتىپتى سۇراقتارعا جاۋاپ تابۋ - بارلىعى قوسىمشالار مەن ينتەرنەت ارقىلى ورىندالادى.

الەۋمەتتىك جەلىلەر دە بۇل ءۇردىستى كۇشەيتىپ وتىر. قارىم-قاتىناس مۇلدە جويىلعان جوق، ءبىراق ونىڭ فورماتى وزگەردى. كوپ جاعدايدا ادامدار قىسقا ماتىندەرمەن، حابارلامالارمەن شەكتەلەدى. ال مۇنداي بايلانىس ءتۇرى ءتىرى سويلەسۋدىڭ ورنىن تولىق باسا المايدى.

زەرتتەۋ ناتيجەسى بۇل وزگەرىستىڭ ەڭ الدىمەن جاستار اراسىندا ايقىن بايقالاتىنىن كورسەتتى. 25 جاسقا دەيىنگى ادامداردىڭ سويلەسۋ ۋاقىتى ۇلكەن بۋىنمەن سالىستىرعاندا الدەقايدا ازايىپ كەتكەن.

دەگەنمەن بۇل ءۇردىس بارلىق ەلدە بىردەي ەمەس. زەرتتەۋ نەگىزىنەن باتىس ەلدەرىنىڭ دەرەكتەرىنە سۇيەنگەن. ال ۇجىمدىق قارىم-قاتىناسقا ءمان بەرەتىن قوعامداردا بەتپە-بەت سويلەسۋ مادەنيەتى ءالى دە ساقتالىپ وتىر.

مامانداردىڭ ايتۋىنشا، اڭگىمە - تەك اقپارات الماسۋ قۇرالى ەمەس. وندا داۋىس ىرعاعى، ەموتسيا، رەاكسيا بار. ءدال وسى ەلەمەنتتەر ادامدار اراسىنداعى بايلانىستى نىعايتادى. ال ءماتىن ارقىلى مۇنىڭ ءبارىن جەتكىزۋ قيىن.

سويلەسۋدىڭ ازايۋى قانداي سالدارعا اكەلەتىنى ءالى ناقتى زەرتتەلگەن جوق. دەگەنمەن عالىمدار بۇل ءۇردىس جالعىزدىق سەزىمىن كۇشەيتۋى مۇمكىن ەكەنىن ايتادى. ءتىپتى كۇن سايىن بىرنەشە ءجۇز سوزگە عانا كوبەيگەن كوزبە-كوز اڭگىمە ادامنىڭ كوڭىل كۇيىنە وڭ اسەر ەتۋى ىقتيمال.

el.kz