كەلەسى جىلى الماتى كوشەلەرى 100 پايىز جارىقپەن قامتىلادى

الماتى. KAZINFORM - الماتىداعى سىرتقى جارىقتاندىرۋ ۇلەسى 2024-جىلى 85 پايىزعا جەتىپ، 2025-جىلى 100 پايىز جارىقپەن قامتىلادى. بۇل تۋرالى ەربولات دوسايەۆ بوستاندىق اۋدانى تۇرعىندارىمەن كەزدەسۋ بارىسىندا ايتتى.

«ءار اۋدان بويىنشا جارىقتاندىرىلماعان كوشە كەزدەسەدى. بىزدە سول كوشەلەردى جارىقتاندىرۋعا ارنالعان باعدارلاما بار. بوستاندىق اۋدانىندا مۇنداي 54 كوشە بار. بۇل ماسەلە «حالىق قاتىساتىن بيۋجەت» باعدارلاماسى نەمەسە تىكەلەي قارجىلاندىرۋ ارقىلى شەشىلەدى. سونىمەن قاتار «الماتى قالا جارىق» قىزمەتىنىڭ تيىمدىلىگىن ارتتىرۋ بويىنشا شارالار قابىلداندى. تۇرعىنداردىڭ ءوتىنىشى ەسكەرىلدى. كوشەلەر مەن اۋلالاردى جارىقتاندىرۋعا بولىنگەن قاراجات اۋداندارعا ءبولىندى. 2025-جىلى مەگاپوليس كوشەلەرى 100 پايىز جارىقپەن قامتىلادى»، - دەدى قالا اكىمى.

ەربولات دوسايەۆتىڭ ايتۋىنشا، سىرتقى جارىقتاندىرۋ ماسەلەسىمەن قوسا، ساياباقتاردى جارىقتاندىرۋ، عيماراتتار مەن قۇرىلىستاردى ساۋلەتتىك جارىقتاندىرۋ جايى دا شەشىلىپ كەلەدى.

بوستاندىق اۋدانىندا بيىل جىل باسىنان بەرى 1846 شام اۋىستىرىلعان. بيىل كۇزدە تاعى 267 تىرەك پەن شام اۋىستىرىلدى. وسى كۇزدە شامدارى بار تاعى 267 تىرەك ورناتىلادى. سونىمەن قاتار 2024-جىلدىڭ سوڭىنا دەيىن 9 ەسكەرتكىشكە تۇنگى جارىقتاندىرۋ ورناتۋ جوسپارلانعان.

وسىعان دەيىن شاھار باسشىسى الماتىدا «Damubala» باعدارلاماسىنا FaceID جۇيەسى ەنگىزىلگەنى تۋرالى ايتقان بولاتىن.