كەلەر ايدان باستاپ وزبەكستان مەن قىتاي اراسىندا 30 كۇندىك ۆيزاسىز رەجيم ورنايدى
تاشكەنت. KAZINFORM - وزبەكستان مەن قىتاي اراسىنداعى 30 كۇندىك ۆيزاسىز رەجيم تۋرالى كەلىسىم بيىل 1-ماۋسىمدا كۇشىنە ەنەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
وزبەكستان سىرتقى ىستەر مينيسترلىگىنىڭ مالىمەتىنشە، رەسمي تاشكەنت پەن بەيجىڭ اراسىنداعى ءوزارا ۆيزالىق تالاپتاردى الىپ تاستاۋ تۋرالى ۇكىمەتارالىق كەلىسىم اياسىندا جۇرگىزىلگەن ىشكى راسىمدەر اياقتالدى.
- كەلىسىم 2025 -جىلى 1-ماۋسىمدا كۇشىنە ەنەدى. مەملەكەتتەردىڭ اۋماعىندا بولۋ مەرزىمى 30 كۇننەن اسپاۋى ءتيىس. ەگەر 30 كۇننەن اسسا، وندا ازاماتتار الدىن الا ۆيزا رەسىمدەۋى قاجەت، - دەلىنگەن ۆەدومستۆو تاراتقان حابارلامادا.
مينيسترلىكتەن اتاپ وتكەندەي، اتالعان كەلىسىم قىتايدىڭ گونگكونگ(شياڭگاڭ) پەن ماكاو(اۋمىن) سياقتى ارنايى اكىمشىلىك اۋداندارىنىڭ اۋماعىنا بارۋ ءۇشىن قولدانىلمايدى.
ەسكە سالايىق، بىلتىر قاراشادا وزبەكستان مەن قىتاي ۆيزاسىز رەجيم ورناتۋعا مۇددەلى ەكەنىن حابارلاپ ەدىك. كوپ ۇزاماي، ياعني 1-جەلتوقساندا وزبەكستان مەن قىتايدىڭ سىرتقى ىستەر مينيسترلەرى ازاماتتارعا 30 كۇن ىشىندە ۆيزاسىز قوس ەلگە بارۋعا مۇمكىندىك بەرەتىن كەلىسىمگە قول قويدى.
بيىل قاڭتاردا ب ا ق وكىلدەرىنە سۇحبات بەرگەن Uzbekistan Airways كومپانياسى ءتوراعاسىنىڭ ورىنباسارى شۋحرات يادگاروۆ وزبەكستان مەن قىتاي اراسىندا ۆيزاسىز رەجيم ەنگىزۋگە باعىتتالعان كەلىسىم بيىل ناۋرىزدان كەيىن كۇشىنە ەنۋى مۇمكىن ەكەنىن ءمالىم ەتتى.
اۆتور
ءاليحان اسقار
