كۇلاش احمەتتىڭ ولەڭدەرى
اقىننىڭ «شىلتەر»، «ءسىز وسى شىنىمەنەن بىلمەيسىز بە»، «كوكتەم، كوك تەرەكتەر»، «حالىق ءانى»، «ولەڭ»، «باقىت جايلى»، «باۋىر»، «ەر ادامدار»، «جاپىراق-جازدىڭ جۇرەگى»، «جازىلعان جىرلار» سەكىلدى ولەڭدەرى بەرىلدى.
شىلتەر
سەن كەتكەن سوڭ باستالعان-دى باسقاشا ءان،
جۇگىرەدى جىلدار شاشىپ شاڭعا شاڭ.
جىرلارىمدى كوپ ادامدار تىڭداعان،
انا، سەن عوي ەستىمەدىڭ ەشقاشان.
سەن توقىعان شىلتەر مىناۋ توزباعان،
ال مەن بولسام، توزبايتۇعىن ءسوز باعام.
ادامدى ساقتاۋ قيىن زات قۇرلى؟! -
دەيدى مەنىڭ بوتا كوڭىلىم بوزداعان.
وي توقىپ ەم، شىلتەر ەمەس، شىقتى ولەڭ،
توقي بەرەم، ۇقپاسام دا تۇك تە مەن.
ۋاقىتتان سىزات تۇسكەن ساندىقتا
شىلتەر جاتىر سوڭعى گۇلى بىتپەگەن.
شاشىراعان ساۋلەسى بار جۇلدىزدىڭ،
شاشىراتقى گۇلدەرى بار قىرعىزدىڭ.
ەسكى تورعا ءجيى-ءجيى قارايمىن،
ەڭ اقىرعى قۇرمەتىمىز بۇل ءبىزدىڭ.
شىلتەر جاتىر. ال توقىعان جان عايىپ،
تاعدىر - قاتال، ادامداردا بار ما ايىپ؟
ساۋساعىڭنىڭ ءىزى قالعان ەسكى تور
ساعىنىشتان كەتكەن سىندى سارعايىپ.
مازالايدى كىرپىگىمە شىق كەلىپ،
جان ىنىمنەن جارىماعان ءسۇت تە ەمىپ
قىسىلعانداي ىڭعايسىزداۋ قالىپتا
شىلتەر جاتىر ءبىر ۋىس بوپ بۇكتەلىپ.
شىلتەرىڭمەن كوز جاسىمدى سۇرتەرمىن،
سۇرتكەن سايىن جانارىمدى بۇركەر مۇڭ.
ول ءۇشىن سەن قانشا كوركەم گۇل تەردىڭ!..
وكىنىشتى! اپا، سەنىڭ عۇمىرىڭ
عۇمىرىنا جەتپەگەنى شىلتەردىڭ!
...شىلتەر جايلى مۇڭدى ولەڭدى سوزباي تىم،
بىتىرەيىن. ويدى وي عوي قوزعايتىن.
ءومىر شىعار - ءوزى كەتىپ ادامنىڭ،
ءبىر ەسكەرتكىش قالدىرۋى توزبايتىن.
ءسىز وسى شىنىمەنەن بىلمەيسىز بە
ءسىز وسى شىنىمەنەن بىلمەيسىز بە،
كەزىگىپ قالا بەرەم بىردەي سىزگە؟
ءسىز جۇرەتىن جەرلەردە، الدە مەنى،
اداسىپ، نە ەرىگىپ ءجۇر دەيسىز بە؟
قاعىلۋى - ماحاببات قاناتىنىڭ،
جانىڭىزعا جابىرقاپ باراتىنىم.
بايقالماي ما سىزگە وسى، قاراساڭىز،
قىپ-قىزىل بوپ، قيپاقتاپ قالاتىنىم.
ءسىزدى ويلاماي كوزىمدى ءالى ءىلدىرىپ
كورگەنىم جوق، كەرەك پە جالىندىرۋ؟
ورتەنەمىن جانىما جالىن كىرىپ،
ادەيى ءۇنسىز ءجۇرسىز بە، ءبارىن ءبىلىپ؟..
قارا كوزدەن قاشساڭىز، نەسىنە ەرسىز،
ءبىر ادەمى باقىتقا كەشىگەرسىز.
قاراپ قالسام، وتەسىز كورمەگەنسىپ،
وڭباعانسىز، نە دەگەن... كەشىرەرسىز..
كوكتەم، كوك تەرەكتەر
بۇل كوكتەمدى التى اي قىس كۇتىپ ەدىڭدەر،
وسىلاي باستالادى ەكەن بۇكىل ومىرلەر.
تال، تەرەكتەر، ءتۇن بويى تولعاق قىسىپ،
بەبەۋ قاعىپ، ىڭىرسىپ، ۋهىلەڭدەر.
ازابىڭدى ءتۇسىندىم مەن باسىڭداعى،
دوڭبەكشيدى قويۋ بۇلت - قورعاسىن داعى.
سەزىنگەندەي مايداندى ەندى وسىنداعى -
ءتۇنى بويى سىڭسىعان جەل باسىلمادى.
مۇنداي كەزدە قالايشا تىنشىماق قىرلار،
كۇندىز سەزگەن قۋاتىن كۇنشۋاقتىڭ قار.
قاس قارايا تولعاتقان انا - اعاشتار،
تاڭ اتا تالىقسىپ بارىپ، بۇرشىك اتتىڭدار!
كوكتەم عوي بۇل جىلىنار سۋىق قۇمدار دا.
كوك تەرەكتەر، ايتپاي-اق مۇنى ۇقتىڭدار ما؟
كۇن نۇرىمەن ماۋجىراپ قالعيسىڭدار،
ءتۇنى بويعى كۇرەستى ۇمىتتىڭدار ما؟
ومىرگە ءومىر قوسىپ، تىنىقتىڭدار ما؟
مەن بىلەمىن بۇل تاڭدى شىن كۇتكەنىڭدى،
ءتۇنى بويى سەزدىرىپ تىرلىككە مۇڭدى.
كۇن شىققاندا تۇرسىڭدار جاسىرا الماي
شۋاق كەسكەن كوك بۇرشىك - كىندىكتەرىڭدى.
جەر-انا دا بۇل ءساتتى كۇتىپتى اي، كۇننەن،
كۇرسىندى ول دا جاسىڭدى جۇتىپ قايعىڭمەن.
تۇنىمەنەن تولعاتقان كوك تەرەكتەر،
تاڭ اتا ءبۇر جارعاندارىڭمەن قۇتتىقتايمىن
حالىق ءانى
قازاقتىڭ حالىق ءانى!
قازىنامسىڭ!
ادامزات قازىناڭنان ازىق السىن.
ۇيرەتكەن
دانالىققا، ادالدىققا
سەن دەگەن -
جىگەرلى دە نازىك ءانسىڭ!
ۇشى جوق، قيىرى جوق بوز دالادان
ۇشقان ءان،
بوتا بولىپ بوزداعان ءان.
مۇڭدى قىز،
مۇزبالاق ەر، بوزبالادان
قالعان ءان،
قالىڭ شەردى قوزعاعان ءان!
دۇنيە-اي!
باس - ەرىكسىز،
كوڭىل - قىران.
ءان - ەركىن، ەركىن ءۇنىم - باعىم، مۇرام.
قازاقتىڭ كەڭ دالاسى كەرەمەت كۇي،
اسپانى - تۇنىپ تۇرعان كوگىلدىر ءان!
قازاقتىڭ حالىق ءانى!
قازىنامسىڭ!
ادامزات قازىناڭنان ازىق السىن.
اسىل ءسوز، اسقاق رۋح اۋەلەگەن،
سەن دەگەن -
جىگەرلى دە، نازىك ءانسىڭ!
بىلمەيمىن، ايانىشتى سەزىمنەن بە،
مەن كەيدە ۇيىقتاعاندا، كوز ىلگەندە،
تۇسىمدە كەزدەسەمىن
اششى سورعا
ءسۇتى اعىپ بارا جاتقان بوز ىنگەنگە.
سالادى بوز تايلاقتاي ۇلىم اسىر،
قوسادى قوسپاق تۇيە جىرىما سىر.
تۇيەنىڭ بۇيداسى مەن جۇگىن العان
بۇل عاسىر ءبىر جاعىنان ۇلى عاسىر.
كوزىڭدە، ارۋانا، مۇڭ بار، مىقتىم،
سەبەبىن سەن اسىقپاي تۇرعاندا ۇقتىم.
كەيىمە، ويسىلقارا، ءبىزدىڭ زامان
زامانى زىمىراعان جىلدامدىقتىڭ.
بال شۇبات اڭساتادى ءجيى مەنى،
سەندەگى قايسارلىققا سۇيىنەمىن.
يىمەي ەسترادا اۋەنىنە،
ەسكى قوبىز كۇيىنە يىگەنىڭ
ولەڭ
نەسىنە وسى ولەڭدى جازامىن مەن،
تارتتىم قوي جەتەرلىكتەي ازابىن مەن.
بىلمەيمىن قالاي ەرىپ كەتكەنىمدى
مۋزا كەپ سىبىرلاسا عاجاپ ۇنمەن.
ىنتىق بوپ نەم بار ەدى وسى ولەڭگە،
قالمايدى دەگبىر - ولەڭ دەسە، مەندە.
قالايشا كۇيمەي قالعام،
جاپ-جالاڭاش
قولىممەن قىزىل شوعىن كوسەگەندە؟
كىم مەنى جادىلادى، دۋالادى،
قولىم دا، جۇرەگىم دە سۇرانادى.
نەلىكتەن جانىم سودان جۇبانادى؟
سول عانا شاڭ-توزاڭدى جۋا الادى.
جاي سوزدەر... كەنەت ولەڭ قۇرالادى...
مەنىڭ ولەڭ ءومىرىم -
مەنىڭ ۇلكەن سىباعام -
ۇلى مايدان، ۇلى الاڭ.
بار ايەلدىڭ جەڭىسىمەن قۋانىپ،
بار ايەلدىڭ كوز جاسىمەن جىلاعام.
مەنىڭ ءولەڭ ءومىرىم -
مەنىڭ ۇلكەن سىباعام.
وكىنەمىن مىناعان:
تۇندە ويانىپ، وي جىبىنە ءسوز مارجان
تىزگەن كەزدە كومەك بەردى كىم وعان؟..
مەنىڭ ولەڭ ءومىرىم -
مەنىڭ ماڭگى ۇلەسىم.
بىرەسە مۇڭ، بىرەسە ءۇن...
قۋانىشىم، ماحابباتىم، قىزىعىم،
قىلداي ءۇمىت، قىمبات ءتىلىم، كۇرەسىم.
كەنەن جاسى - تاڭىردەن سۇراعانىم،
تىڭداۋ ءسويتىپ بۇلبۇل مەن بۇلاق ءانىن.
مەيلى، ءتىپتى، بولماسىن ۇناعانىم،
ەشتەڭە ەتپەس ءسۇرىنىپ، قۇلاعانىم.
ەلىم، دالام، بالام مەن ولەڭ بولسا،
قالعانىنىڭ تابارمىن ءبىر امالىن.
قايىرلى ءومىر تاڭىردەن تىلەگەنىم،
يماندى ىستەن ىزدەرمىن جۇرەك ەمىن.
سابىر كۇتىپ، داقپىرتقا بوي الدىرماي،
ءومىر ءسۇرۋ - ارمانىم، مىنە، مەنىڭ.
كوركەم عۇمىر - كورگەنىم - جاقسىلىق بوپ،
بيىكتەسە، بىرتىندەپ جىر-ەمەنىم،
سەن ريزا بولارسىڭ، بىلەم، ەلىم!
ءتۇزۋ تىرلىك تاڭىردەن تىلەگەنىم.
باقىت جايلى
- مازالايدى كوڭىلدى سۇراق تالاي.
ۇمىتىمدى كۇندەرىم ءجۇر اقتاماي.
باقىت قايسى،
ومىردە بارلىعى دا
بايانسىز وتە شىقسا تۇراقتاماي؟
- قىس وتەدى،
ەريدى ءسۇت - اق قار دا.
كوگەرەدى جاپىراق، بۇتاقتار دا.
ۋاقىتتىڭ قاناتتى سۋسىلىنان
جىرتىلادى جىر تولى كىتاپتار دا.
وزگەرەدى وسىلاي مۇنىڭ ءبارى:
تارتىلادى وزەندەر تۇبىندە ءالى.
اق اسپان دا كەيدە اشىق، كەيدە بۇلتتى،
كۇزگى كۇندەي دۇنيە قۇبىلمالى.
كەرىنبەيدى كەشەگى تانىس اعاي.
اعارادى كۇن اتسە ءالى ساماي.
تىرشىلىكتە بارىسى وزگەرەدى،
وزگەرەدى،
ويتكەنى زاڭى سولاي!
توقتاماسا
تىرشىلىك ءنارىن ءۇزىپ،
اۋىرماساڭ،
جۇيكەنى ءدارى بۇزىپ،
اششى-تۇششى،
شات-مۇڭدى،
بارلى-جوقتى
امان جۇرگەن كۇندەردىڭ ءبارى قىزىق.
جاۋ شاپپاسا،
وقىستان ىرگەڭدى الا،
جايقالادى القىزىل گۇلمەن دالا.
باقىتتى ما؟
باقىتتى - دەر كەزىندە
بار نارسەنىڭ قادىرىن بىلگەن عانا.
باۋىر
باياعىدا
ولەڭى ءۇشىن اقىلدى
كەسىرلەنىپ، كەسىم ايتىپ اقىرعى،
ويسىز اكىم اباقتىعا قاماپتى
قانجار ءتىلدى جاۋ جۇرەك جاس اقىندى.
قاتالدىقتىڭ كورسەتپەك بوپ كوكەسىن،
قاباتتاسىپ سوزدەرى دە كەكەسىن،
ءبىر تۇرمەدە بىرگە ۇستاپتى اقىننىڭ
ناعاشىسىن، شەشەسى مەن اكەسىن.
بوس كەزدە دە جۇرگەن ەدى بايىماي،
ءوزى كەدەي تورتەۋىنىڭ ويى باي.
قايسارلىقپەن ءان سالادى قوسىلىپ،
قاپ-قاراڭعى تۇرمەدە دە مويىماي.
اباقتى انمەن جىلىلىققا تولاتىن،
جىرىن جازىپ وتىرىپتى ال اقىن.
اكىم بۇعان شىدامايدى،
ايلا ىزدەپ،
ويلاپ-ويلاپ بىلاي دەپتى سول اكىم.
"ونەرلىسىڭ، وجەتسىڭ دە ءارقايسىڭ،
سەن ايت، ايەل،
الدىڭدا تۇر تاۋداي سىن.
سەنى جانە ءۇش ەركەكتىڭ بىرەۋىن
بوساتامىز، ايت، قايسىسىن تاڭدايسىڭ؟"
"تۇرعان زامان - قۇشاعىندا داۋىلدىڭ،
ادىل كۇشى جەڭىپ شىعار ءداۋىردىڭ.
اۋىردىم مەن بۇل ۇشەۋى ءۇشىن دە،
ءبىراق ورنى بولەك ەكەن باۋىردىڭ.
جارىم كەتسە، جار تابارمىن بىردە مەن،
جار تابىلسا، بولار تاعى ۇل دەگەن.
ولگەن انام قايتىپ كەلىپ ۇل تاپپاس،
باۋىرىمدى بوساتىڭدار تۇرمەدەن!
ءوز جاقسىڭدى ءوزىڭ قۇرتىپ،
قالاي ەل
بولارسىڭدار؟!
قۇربان بولدى-اۋ تالاي ەر...
رۋحى جوق - اقىنى جوق حالىقتىڭ،
ويلانىڭدار!" - دەگەن ەكەن دانا ايەل.
وجار اكىم ەشتەمە دە دەمەستەن،
شىعىپ كەتىپ، مىرزاسىمەن كەڭەسكەن.
"بوسات، - دەپتى، - تورتەۋىن دە!" - سەسكەنىپ،
شونجار باستىق ايدارىنان جەل ەسكەن.
اڭىزدىڭ ءبىز ەستىمەدىك قاندايىن،
اڭىز ايتقان اقىنداردى قورعايىن.
قايران باۋىر!
قايران ۇلى سەزىمدەر!
ءار جۇرەكتە جاساڭدارشى ءاردايىم!
ەر ادامدار
ەر ادامنىڭ دەمەۋ ءار ءسوزى بىزگە.
تۇسىنەدى تۇڭعيىق كەزىمىزدە.
ەر ادامنان كۇتەمىز ەرلىك قانا،
قۋلىق دەگەن جەتەدى وزىمىزدە.
ەرلەر جايلى جوق تاريح جازىپ بىتكەن.
قۇرىسىن سوعىس ەرلەردى ازىپ كۇتكەن.
وجەتتىكپەن، ەرلىكپەن ەمەس، قىزدار،
جىگىتتەردى سىيلايىق نازىكتىكپەن.
ەرلەر جوقتا ءمانى جوق ءتىپتى ءۇمىتتىڭ.
ەرلەر جوقتا ءسانى جوق تۇك قىلىقتىڭ.
جۇك اۋىرىن كوتەرسە ازاماتتار،
كەرەگى نە ايەلگە مىقتىلىقتىڭ؟!
وسى ولەڭمەن دەمەيمىن ءماز ەتەمىن.
مويىندادىق قىس كەتىپ، جاز وتەرىن.
مويىنداۋدان قاشامىز نەگە ءبىراق،
ايەلدىڭ كوپ، ەرلەردىڭ از ەكەنىن.
ءار ءتۇرلى ىستەن جادىڭدا قالادى ءار كۇن،
كوزى جەتەر ويمەنەن قاراعاننىڭ.
تەڭدىك العان ايەلدەن الدەقايدا
بيىك ءالى ورىنى ەر ادامنىڭ.
و، ارۋلار، ساندەپ شاش تاراعاندار،
جىگىتتەرگە بيىكتەن قاراماڭدار.
ءومىر ۇلى كوش بولسا، باياعىدان
العا تارتىپ كەلەدى ەر ادامدار.
توزبەيتۇعىن نارسەلەرگە توزەمىن،
كورگىم كەلمەس كىسىمدى دە كورەمىن،
بارعىم كەلمەي تۇرعان جەرگە بارامىن.
وسى شىعار مۇمكىن ءومىر دەگەنىڭ.
بۇعان قاراپ دەمە، دوسىم، مەنى ارسىز،
ارتىق ايتساڭ، جۇرەگىمدە قالار سىز.
قۇستان ۇشقىر قيالىمدى توردا ۇستاپ،
جاعدايلارعا كونەم كەيدە امالسىز.
بۇل مىنەزگە ۇيرەنگەنمىن قالاي مەن،
بۇل ادەتكە تابۋ كەرەك قالاي دا ەم.
ايتقىم كەلمەي تۇرعان ءسوزدى بىرەۋدىڭ
كوڭىلى ءۇشىن ايتتىم دا عوي تالاي مەن.
ءوز ويىمدى ءولتىردىم-اۋ سوندا مەن.
سەزىمدەرىم كونبەيگىنگە كوندى ارەڭ.
سىر بەرمەدىم كەزىمدە دە شولدەگەن،
ءبارىن دۇرىس تۇسىنە مە ەل دەگەن؟!
...الدەنەدەن اۋىرادى جان دەنەم.
ءبارى جاقسى بولسا دەپپىن مەن باستا،
جانىمدى اشىپ جالباقتاپپىن جولداسقا.
ءبارى جاقسى بولسا دەۋمەن شارشاپپىن،
بالكىم، ەندى ءبارى جاقسى بولماس تا.
جۇرتقا ۇنادىم،
ءوز كوڭىلىم ءپاس بۇگىن.
تاسقا بارىپ سوعىلعانداي تاسقىنىم.
باۋىرلاردى،
جاقىندى ويلاپ،
جاسىپپىن،
جارق-جۇرق ەتىپ جايناماپتى جاستىعىم.
تەبىرەنسەم، تەجەپپىن دە سەزىمدى،
ايتپاپپىن-اۋ ايتقىم كەلگەن سەزىمدى.
وتقا، سۋعا ءتۇسىپپىن دە جاعدايمەن،
ويلاماپپىن دەنساۋلىقتى، ءوزىمدى.
جان سىزداسا، جۇرتتان بولعان جوق كومەك،
كولەڭكەسىن جايدى جالعىز كوك تەرەك.
دوس وكپەلەپ قالماسىن دەپ تىلەپپىن،
ءبىر كورمەپپىن ءوزىم جانعا وكپەلەپ.
بالاعا دا سويلەپپىن-اۋ ابايلاپ،
كەشىككەنگە قالىپپىن-اۋ قارايلاپ.
دەمالىسسىز جۇگىرىپپىن تۋىسقا،
ەشكىم ءبىراق جۇگىرمەپتى مەنى ويلاپ.
ەردىڭ جاقسى دەگەن ءسوزى نەگە سەن،
ەرتەرەك تىم تارتىپپىن-اۋ ەرەسەك.
كەتكەن كۇندەر جالىنىمدى كەمىتتى،
كىم بىلەدى نە بەرەرىن كەلەشەك.
كورمەي ءجيى باۋىر سەزىم، دوس راي،
مەن بوزارسام، بوزارىپتى قوسىلا اي.
بارلىعىن دا ۇيلەستىرەم دەپپىن مەن،
ءبىزدىڭ جاعداي وسىلاي دا وسىلاي...
جاپىراق - جازدىڭ جۇرەگى
جاپىراقتار،
ءار ءتۇرلى ءان قۇرارسىڭدار،
الدارىڭدا ءار ءتۇرلى تۇرار سىندار.
نازىكتەرىم،
سەندەرمەن سىرلاسايىن،
مەنىڭ نازىك جانىمدى ۇعارسىڭدار.
ۇعارسىڭدار،
ۇعۋ دا، تانۋ دا ارمان،
جاسارىڭدار،
جاسقانباي جاۋىن، قاردان.
دايىن تۇرۋ قاجەت-اق بارلىق سىنعا،
قورىقپاڭدار سالقىننان، داۋىلداردان.
قورىقپاڭدار شولدەن دە، اپتاپتان دا،
ءار وزەنى ءومىردىڭ قاتتى اققاندا،
قۇلارسىڭدار بيىكتەن، وعان دەيىن
قول سوعىڭدار ءار كۇنگى اپپاق تاڭعا.
تىرشىلىكتە بوران دا،
قۇيىن دا بار،
قايدان سەنىڭ ءتۇسىنسىن كۇيىڭدى ولار؟
ىلعي جاقسى بولۋدى تىلەگەنمەن،
ىلعي جاقسى بوپ قالۋ قيىن بولار...
سولاي،
الدا ءار ءتۇرلى تۇرار سىندار،
تۇرارسىڭدار،
ءار ءتۇرلى ءان قۇرارسىڭدار.
نازىكتورىم،
سەندەرمەن سىرلاسايىن،
مەنىڭ نازىك جانىمدى ۇعارسىڭدار.
تىڭداڭىزشى!
جاس شىنار ءان سالىپ تۇر!
بىلەسىز بە؟
قىمبات شاق قانشالىق بۇل؟!
ءان سالىپ تۇر ماڭگى ىڭكار جاپىراقتار
كوزدەرىنە كوك جاسىل تامشى الىپ ءبىر.
ءانسىز ولار جەتكىزسىن قايدان بارىن؟
ايتىپ جاتىر:
جاس وركەن جايعاندارىن،
كوكتەم مەن قىس، جاز بەن كۇز اراسىندا
كۇرەس بارىن، بىتپەيتىن مايدان بارىن.
تىڭداڭىزشى!
تىم جاقسى اندەتەدى،
ايتادى ولار:
دۇنيە ءساندى ەكەنىن،
ءبىر جامانى -
بۇل عۇمىر قىسقا ەكەنىن،
ءبىر جاقسىسى -
ماحاببات ماڭگى ەكەنىن.
قانداي شىنار!
سۇلۋ دا، بيىك تە تىك!
ءبىر-بىرىنە قىلىعىن سۇيىكتى ەتىپ،
قاراڭىزشى، دىرىلدەپ قۋانادى
جاپىراققا جاپىراق ءتيىپ كەتىپ.
باساتىنىن بىلە مە اقىرى اق قار،
جازدىڭ جىرىن تىڭدايدى اتىراپ بار.
ساباعىنان سارعايىپ ۇزىلگەنشە
ولەڭ ايتىپ وتەدى جاپىراقتار.
جاپىراقتار،
تاڭ اتا جىلاماڭدار،
جىلاپ تازارمايسىڭدار كۇنادان بار.
ءار تاڭ، راس عۇمىردى قىسقارتادى،
باياعىدا-اق تۇسىنگەن مۇنى ادامدار.
سەرپىلىڭدەر،
سويلەڭدەر جىر تىلىندە،
كۇندە ەستىلسىن
قۋاتتى، كۇلكىلى ۇندەر،
كوز جاسىنان اۋمايتىن تاڭعى شىقتار
بۋعا اينالسىن،
بيلەڭدەر،
سىلكىنىڭدەر.
شىرقاتىڭدار،
سەندەردە سىرشىل ءان بار،
تىڭدار ونى اسپان، سۋ،
شىڭ، شىنارلار.
تىرەسىڭدەر تىرلىكتىڭ ۇدەسى ءۇشىن،
كۇرەسىڭدەر،
شۋلاڭدار،
تىنشىماڭدار.
تاعى ءۇزىلىپ ءتۇستى ءبىر جاپىراعىڭ،
بالكىم، گۇلدەۋ ءداۋىرىڭ وتكەن شىعار.
مەزگىل - وزەگى، جۇلقيدى باتىل اعىن،
مۇڭايما، گۇل،
قايتادان كوكتەم شىعار.
الدىڭ - اقپان.
ول سەنى اياماس-تى.
ساباعىڭدى ساپ-سالقىن قار باسادى.
ءبىراق ءوزىڭ قالساڭ دا اياق استى،
ۇرپاعىڭا عۇمىرىڭ جالعاسادى.
دىرىلدەيسىڭ
ۇرەي بار جۇرەگىڭدە،
نامىس كانە؟
ءان سالعان داۋىس كانە؟
اعىن سۋداي اسىققان بۇل ومىردە
عۇمىر دەگەن وسىنداي اۋىسپالى!
قىسقالىقتى ادامدار قاس قاعىم دەر،
ناركەس كوزىڭ مولدىرەپ
جىلاما، گۇل.
كوكتەم كەلەر، جايقالار باسقا گۇلدەر،
باسقا گۇلدەر ءۇشىن دە قۋانا ءبىل!
جازىلعان جىرلار
جازىلعان جىرلار! جانىمنىڭ قۇيتتاي قۇستارى،
جايلاپ جۇرسىڭدەر تىرلىكتىڭ قايسى تۇستارىن؟
سەندەردى كورىپ ءسۇيسىنىپ ءجۇر مە دوستارىم،
تاڭىرقاپ ءجۇر مە، تابالاپ ءجۇر مە دۇشپانىم؟
ۇشىرىپ ەم عوي، شارتاراپتارعا بارسىن دەپ،
سەندەردەن بىرەۋ كەرەگىن تاۋىپ السىن دەپ.
عيماراتتاردىڭ باسىنا ەمەس، ومىرگە
عاشىق جانداردىڭ كەۋدەلەرىنە ۇيا سالسىن دەپ.
قۇيتتاي قۇستارىم، جانىممەن ءجىپسىز جالعاسقان،
ساۋ جۇرسىڭدەر مە اق قاناتتارىڭ تالماستان؟
قالعان جوقسىڭدار ما قالتارىستاردا ەلەۋسىز
عاجاپ سازداردى تىڭداعان كەزدە تاڭعى اسپان؟
قونا الدىڭدار ما ماحابباتاردىڭ باعىنا،
توگە الدىڭدار ما ساعىنىش تولى لاعىل ءان؟
جانىمنىڭ داۋسى سەندەرگە ەدى امانات،
جەتكىزە الماساڭدار نە قىلام؟
سونى ويلاپ ءجيى قامىعام.
قۇيتتاي قۇستارىم! كومەيلەرىڭدە جىر-ءان بار،
جولدارىڭ اۋىر، ارىماي، تالماي شىداڭدار.
قۇيتتاي قۇستارىم، قۇلاساڭدار دا، وتىنەم،
ادامداردىڭ تەك جۇرەگىنە جەتىپ قۇلاڭدار!
ءومىر-تاعدىر، نە دەگەن تارتىس ەدى!
كوندىرەدى زاڭى مەن سالتى سەنى.
قىزىق كۇندەر ورنىنا قيىندىق كەپ،
قىزىل گۋلدەر ورنىنا قار تۇسەدى.
بالالىق شاق دەگەنىڭ ەرتەگى ەكەن،
ەندىگىسىن قالايشا كوركەم ەتەم؟
جاقىندارىم ايتپاعان سوزدەردى ايتىپ،
ءوزىمدى-ءوزىم انام بوپ ەركەلەتەم.
ءبارىن ءتاڭىر بەرە مە سۇراعانعا،
ارمان بولماي تۇرا ما بۇل ادامدا؟
وزىمە-ءوزىم قينالسام قايرات بەرىپ،
ءوزىمدى-ءوزىم جۇباتتىم جىلاعاندا.
ارتىق ەمەس مەن ءۇشىن التىن اردان،
ءومىر - قىمبات، شىقپايسىڭ بار قۇماردان.
باقىتىم جوق مەنىڭ دە باسقالاردان
تارتىپ العان نەمەسە ارتىق العان.
وزىمە-ءوزىم سۇيەنەم، و، راسىندا،
وزىمە-ءوزىم جول سالدىم بوراسىندا.
وزىمە-ءوزىم جەتە الماي وتىرامىن
دىبستار مەن دىبىستار اراسىندا.
