Kazinform ءتىلشىسى «وزبەكستاننىڭ التىن قالامى» سىيلىعىن جەڭىپ الدى
تاشكەنت. قازاقپارات - Kazinform اگەنتتىگىنىڭ ءتىلشىسى ماديبەك جانىبەكوۆ جۋرناليستيكا سالاسىنداعى وزبەكستاننىڭ ەڭ بەلدى «التىن قالام» سىيلىعىنىڭ باس جۇلدەسىن جەڭىپ الدى.
جۇلدەنى تابىس ەتۋ سالتاناتى تاشكەنت تورىندەگى «حالىقارالىق فورۋمدار سارايىندا» ءوتتى. وعان مينيسترلىكتەردىڭ وكىلدەرى، دەپۋتاتتار، حالىقارالىق جانە جەرگىلىكتى اقپارات قۇرالدارىنىڭ تىلشىلەرى، ارداگەر جۋرناليستەر مەن شەتەلدەن كەلگەن مارتەبەلى مەيماندار قاتىستى.
«التىن قالام» حالىقارالىق سىيلىعىن جەڭىپ العانداردىڭ قاتارىندا وزبەكستاندا ءۇش جىلدان استام Kazinform اگەنتتىگىنىڭ مەنشىكتى ءتىلشىسى قىزمەتىن اتقارعان ماديبەك جانىبەكوۆ بار. جۇلدەنى تابىستاۋ بارىسىندا وزبەك تاراپى ارىپتەسىمىزدىڭ باۋىرلاس ەكى ەل اراسىنداعى ىنتىماقتاستىقتى نىعايتۋعا قوسقان ايرىقشا ۇلەسىن اتاپ ءوتتى.
- قازاقستان مەن وزبەكستان قارىم-قاتىناسىنىڭ جاڭا دەڭگەيگە شىققانى ماديبەك جانىبەكوۆتىڭ ماقالالارىندا جارقىن كورىنىس تاپتى. ول اسىرەسە، مادەني بايلانىستاردىڭ دامۋىنا ەرەكشە ۇلەس قوستى. تيىسىنشە، «التىن قالام» سىيلىعى وسى قاجىرلى ەڭبەكتىڭ ەلەنگەنىن كورسەتەدى، - دەدى وزبەكستاندىق جۋرناليست دميتري پوۆاروۆ.
سالتاناتتى ءىس-شارادا ءسوز العان ماديبەك جانىبەكوۆ بۇل جەڭىستىڭ ارتىندا ءبۇتىن Kazinform ۇجىمىنىڭ ەڭبەگى جاتقانىن اتاپ ءوتتى.
- «التىن قالام» سىيلىعىن الۋ - مەن ءۇشىن ۇلكەن مارتەبە. بۇل - باۋىرلاس حالىقتار اراسىنداعى ءوزارا سەنىمگە نەگىزدەلگەن دوستىقتىڭ جاڭا دەڭگەيگە شىققانىن اڭعارتادى. اتالعان ماراپات تەك مەنىڭ جەتىستىگىم ەمەس، ول Kazinform اگەنتتىگى ۇجىمىنىڭ ەڭبەگى. وزبەكستان تاراپىنىڭ كورسەتكەن قۇرمەتىنە العىس بىلدىرەمىن. قوس ەل اراسىنداعى قارىم-قاتىناستىڭ نىعايا بەرۋىنە تىلەكتەسپىن. سونىمەن قاتار بارلىق ارىپتەستەرىمدى كاسىبي مەرەكە - بۇقارالىق اقپارات قۇرالدارى قىزمەتكەرلەرى كۇنىمەن قۇتتىقتايمىن! - دەدى ماديبەك جانىبەكوۆ.
ايتا كەتەيىك، «التىن قالام» حالىقارالىق سىيلىعى وزبەكستانداعى ب ا ق وكىلدەرىنە تابىستالاتىن ۇلتتىق جۇلدە سانالادى. ول 2006-جىلى كورشىلەس ەلدىڭ پرەزيدەنتىنىڭ باستاماسىمەن تاعايىندالعان.
JIBEK JOLY تەلەارناسى «تۇمار-2025» ۇلتتىق تەلەۆيزيالىق سىيلىعىنىڭ ەكى نوميناتسياسى بويىنشا جەڭىمپاز اتانعانىن جازعان بولاتىنبىز.
