كاتونقاراعاي مەن زايسان اۋەجايلارى قاي جەردە سالىناتىنى بەلگىلى بولدى

استانا. KAZINFORM - كولىك ءمينيسترى مارات قارابايەۆتىڭ جۇمىس ساپارى شىعىس قازاقستان وبلىسىندا جالعاسۋدا، دەپ حابارلايدى ق ر كولىك مينيسترلىگىنىڭ باسپا ءسوز قىزمەتى.

ساپار بارىسىندا ۆەدومستۆو باسشىسى ەلىمىزدىڭ شىعىسىندا جاڭا اۋەجايلار ورنالاساتىن الاڭدارمەن تانىستى.

ماسەلەن، كاتونقاراعاي اۋدانىندا جاڭا اۋەجاي سولداتوۆو اۋىلىنىڭ قاسىندا سالىنادى. بۇل اۋىل كاتونقاراعاي جانە ۇلكەن نارىن اۋىلدارىنىڭ اراسىندا ورنالاسقان. كاتونقاراعاي اۋىلىنا دەيىنگى قاشىقتىق 38 شاقىرىمدى قۇرايدى.

ال زايساندا اۋەجاي ساتبايەۆ اتىنداعى بۇرىنعى اسكەري اۋەايلاقتىڭ اۋماعىندا ورنالاسادى. بۇل جەردەن زايسان قالاسىنا دەيىنگى قاشىقتىق 25 شاقىرىمدى قۇرايدى.

باستاپقى كەزەڭدە اۋەجايلاردا Q400 ،ATR 42/72 ،CRJ200 اۋە كەمەلەرى ءۇشىن ۇزىندىعى 2200 مەتر جاساندى ۇشۋ-قونۋ جولاعى سالىنادى. اۋە كەمەلەرىنىڭ بۇل تۇرلەرى استانا مەن الماتىدان وبلىستىڭ تۋريستىك ورىندارىنا دەيىن اۋە قاتىناسىن قامتاماسىز ەتۋگە مۇمكىندىك بەرەدى.

كەيىن بۇل جولاقتى كەڭەيتۋ جۇمىستارى جۇرگىزىلىپ، سىيىمدىلىعى كوبىرەك ۇلكەن ۇشاقتاردى (Airbus ا320، Boeing 737) قابىلداۋعا دا مۇمكىندىك بار.

«مەملەكەت باسشىسى كاتونقاراعاي، زايسان جانە كەندىرلى كۋرورتتىق ايماقتارىندا ساپالى جول ينفراقۇرىلىمى بار اەروۆوكزال كەشەندەرى مەن اۋەجايلاردى سالۋدى تاپسىردى. قويىلعان مىندەتتەردى ۋاقتىلى ورىنداۋ ءۇشىن ەل وڭىرلەرىنە جۇمىس ساپارىمەن شىعىپ، نىساندار سالىناتىن ۋچاسكەلەرمەن تانىسۋدامىز. الداعى ۋاقىتتا قولعا الىناتىن جۇمىستاردى پىسىقتادىق. ءۇش اۋەجايدىڭ دا قۇرىلىسى كەلەسى 2025-جىلى باستالادى»، - دەپ اتاپ ءوتتى مينيستر.

مينيستر جەرگىلىكتى اتقارۋشى ورگانداردىڭ وكىلدەرىمەن، قۇرىلىس جانە اۆياتسيا سالاسىنىڭ ساراپشىلارىمەن كەزدەسۋ وتكىزدى، وندا اۋەجايلار سالۋ جوسپارى تالقىلاندى.

اتالعان ۋچاسكەلەر تومەندەگىدەي فاكتورلارعا سايكەس تاڭدالدى. اۆياتسيا جانە قۇرىلىس سالاسىنىڭ ساراپشىلارى مەن جوبالاۋشىلار الدىن الا زەرتتەۋلەر جۇرگىزدى:

1. جەر بەدەرى مەن مەتەوجاعداي ەسكەرىلدى؛

2. اۋە كەمەلەرىنىڭ قونۋىنا كەدەرگى جوق؛

3. قونۋدىڭ ەكى كۋرسىنان دا اۋە كەمەلەرىن قابىلداۋ-شىعارۋ مۇمكىندىگى؛

4. اۋەجاي ينفراقۇرىلىمىن بولاشاقتا كەڭەيتۋ مۇمكىندىگى بار؛

5. ىڭعايلى لوكاتسيا (ۇلكەن نارىن، كاتونقاراعاي، زايسان، تارباعاتاي ماڭى)؛

6. ينجەنەرلىك ينفراقۇرىلىمنىڭ بولۋى جانە قولدانىستاعى جولدارعا جاقىن ورنالاسۋى.