كاتالين رادۋ: ا ق ش-قا تىكەلەي رەيستەر ۇشۋى ءۇشىن اۋە كومپانيالارى ءوتىنىش جىبەرۋى كەرەك
الماتى. KAZINFORM - الماتىدا ءوتىپ جاتقان «Green Airports» ايماقتىق سەمينارى اياسىندا قازاقستاننىڭ اۆياتسيالىق اكىمشىلىگىنىڭ باس ديرەكتورى كاتالين رادۋ ا ق ش- قا تىكەلەي رەيستەردى اشۋ پروتسەسى قالاي جۇرەتىنىن ءتۇسىندىردى.
ونىڭ ايتۋىنشا، بۇل باعىتتا تىكەلەي رەيستەر اشىلۋى ءۇشىن قازاقستاندىق اۋە كومپانيالار FAA عا ءوتىنىش جىبەرۋى قاجەت.
— اۋە كومپانيا تاراپىنان ا ق ش- قا تىكەلەي رەيستەردى جۇرگىزۋ تۋرالى ءوتىنىش بەرىلگەننەن كەيىن عانا FAA (فەدەرالدىق اۆياتسيا باسقارماسى) قىزمەتكەرلەرى قازاقستانعا كەلىپ، حالىقارالىق تالاپتارعا سايكەستىكتى تەكسەرەدى. ودان سوڭ قازاقستاننىڭ اۆياتسيالىق اكىمشىلىگىنىڭ اۋديتىنەن وتكەننەن كەيىن تىكەلەي رەيستەردىڭ ۇشىرۋ پروتسەسى باستالادى، - دەدى ول.
سونىمەن قاتار، كاتالين رادۋ ا ق ش- قا رەيستەردىڭ اشىلۋى Boeing ۇشاقتارىنىڭ قازاقستانعا جەتكىزىلۋىنە بايلانىستى ەكەنىن اتاپ ءوتتى.
- اۋە كومپانيا تاراپىنان ءوتىنىش جىبەرىلۋى ءۇشىن، الدىمەن، Boeing Dreamliner ۇشاعى وندىرۋشىدەن جەتكىزىلۋى كەرەك. جوسپار بويىنشا بۇل اۋە كەمەسى 2025 -جىلدىڭ اياعىندا جەتكىزىلەدى. قازاقستاندا وتەتىن اۋديت تە جوسپارلى تۇردە اۋە كومپانيانىڭ وتىنىشىنەن كەيىن 2025 -جىلى وتەدى، - دەدى كاتالين رادۋ.
ەسكە سالايىق، بۇعان دەيىن Air Astana توبىنىڭ پرەزيدەنتى پيتەر فوستەردىڭ ا ق ش- قا تىكەلەي رەيستەردىڭ اشىلۋى تۋرالى پىكىرىن جازعانبىز.
