كارينا يبراگيموۆانىڭ جەكپە-جەگى تىكەلەي ەفيردە ورتالىق الاڭدا كورستىلەدى

كوكشەتاۋ. KAZINFORM - بۇگىن 2-تامىزدا كوكشەتاۋ قالاسىندا پاريج وليمپياداسىنا قاتىساتىن اقمولالىق سپورتشىلاردى قولداۋعا OPEN AIR ءىس-شاراسى وتەدى.

تاۋەلسىزدىك الاڭىندا وتەتىن ءىس- شارا ۇلتتىق قۇراما ساپىندا پاريج وليمپياداسىنا قاتىسىپ وتىرعان اقمولالىق سپورتشىلار بوكسشى كارينا يبراگيموۆا مەن ۆەلوشاباندوز اندرەي چۋگايدى قولداۋعا ارنالعان.

«بۇل ءىس-شارا سپورت جانكۇيەرلەرىنىڭ باسىن بىرىكتىرىپ قانا قويمايدى، وتانداستىرىمىزدىڭ جەتىستىكتەرى ۇلتىمىزدىڭ ماقتانىشىنا اينالادى»، - دەيدى ۇيىمداستىرۋشىلار.

سونىمەن بىرگە، OPEN AIR باعدارلاماسى اياسىندا جارقىن شوۋلار مەن جاستاردىڭ ءبيى جوسپارلانعان. كەشتىڭ ەڭ تارتىمى تۇسى، ول «كوكشەتاۋ» مادەنيەت ءۇيىنىڭ سىرتىنداعى ۇلكەن ەكراننان كارينا يبراگيموۆانىڭ جەكپە-جەگىنىڭ تىكەلەي كورسەتىلىمى بولاتىنى ءسوزسىز.

ايتا كەتسەك، فرانسيانىڭ استاناسى - پاريج قالاسىندا ءوتىپ جاتقان جازعى وليمپيادا ويىندارىندا اقمولا وبلىسىنان بوكسشى كارينا يبراگيموۆا مەن ۆەلوشاباندوز اندرەي چۋگاي ەل نامىسىن قورعاپ جاتىر. بۇگىن، 2-تامىزدا استانا ۋاقىتى بويىنشا تۇنگى ساعات 23:32 شاماسىندا 57 كەلىگە دەيىنگى سالماق دارەجەسىندە 1/8 فينالدا وتانداسىمىز كارينا يبراگيموۆا پۋەرتو-ريكو ەلىنىڭ ءۇمىتى ەليون لوسادا موتتامەن قولعاپ تۇيىستىرەدى.

اۆتور
اسلان وسپانوۆ