كارىم ءماسىموۆتىڭ ەلورداداعى ءزاۋلىم سارايى كوممۋنالدىق مەنشىككە وتە مە - اكىمدىك جاۋابى
استانا. KAZINFORM - استانا اكىمدىگى ۇلتتىق قاۋىپسىزدىك كوميتەتىنىڭ بۇرىنعى ءتوراعاسى، سوتتالعان كارىم ءماسىموۆتىڭ ەلورداداعى ءزاۋلىم سارايىن كوممۋنالدىق مەنشىككە قابىلدامايدى.
- استانا قالاسىنىڭ اكتيۆتەر جانە مەملەكەتتىك ساتىپ الۋ باسقارماسىنىڭ جوعارىدا اتالعان عيماراتتى كوممۋنالدىق مەنشىككە قابىلداۋ جوسپارىندا جوق، - دەگەن حابار الدىق ەلوردا اكىمدىگىنىڭ باسپا ءسوز قىزمەتىنەن.
ايتا كەتسەك، جىل باسىندا كارىم ءماسىموۆتىڭ استاناداعى ءزاۋلىم سارايى 1,8 ميلليارد تەڭگەگە ساتىلىمعا شىعارىلعان ەدى.
كەيىن كارىم ءماسىموۆتىڭ اۋكسيونعا شىعارىلعان سارايىن ەشكىم ساتىپ الماعانى بەلگىلى بولدى.
اراعا ءبىر اي سالىپ كارىم ءماسىموۆتىڭ ءزاۋلىم سارايى قايتا ساتىلىمعا قويىلدى.
ال ساۋىردە كارىم ءماسىموۆتىڭ سارايى اۋكسيوننان شىعارىلدى.
ەسكە سالايىق، 2023 -جىلى مەملەكەت باسشىسى كارىم ماسىموۆكە راقىمشىلىق جاساۋدان باس تارتتى.
