كانۆون وليمپياداسى نەسىمەن ەستە قالدى
استانا. KAZINFORM - بۇگىن وڭتۇستىك كورەيانىڭ كانۆون قالاسىندا ءوتىپ جاتقان IV قىسقى جاس وسپىرىمدەر وليمپياداسى مارەسىنە جەتىپ، تاريح قويناۋىنا جول تارتتى.
بۇل وليمپيادا ويىندارى قازاق جانكۇيەرلەرى ءۇشىن تاريحي التىن مەدال جەڭىپ العان جارقىن ساتتەرىمەن ماڭگى ەستە قالماق. ولاي دەيتىنىمىز 2012-جىلى ينسبرۋكتە (اۋستريا) وتكەن ويىنداردا، 2012-جىلعى ينسبرۋك (اۋستريا) وليمپياداسىندا جانە 2020-جىلى لوزاننا (شۆەيتساريا) وليمپياداسىندا قازاق ەلىنىڭ سپورتشىلارى جەڭىس تۇعىرىنىڭ ەڭ بيىك ساتىسىنا كوتەرىلىپ، ءانۇرانىمىزدى اۋەلەتە الماعان ەدى. ءتىپتى، لوزاننادا بىردە-ءبىر جۇلدەگە قول جەتكىزە المادىق.
ەندى سوزىمىزگە دالەل بولۋ ءۇشىن ءار وليمپياداعا قىسقاشا جەكە-جەكە تاعى ءبىر توقتالا كەتەيىك.
2012-جىل: ينسبرۋك (اۋستريا) وليمپياداسى
بۇل قازاقستان قۇراماسىنىڭ قىسقى جاسوسپىرىمدەر وليمپياداسىنا العاش رەت قاتىسۋى بولاتىن. ناتيجەسىندە سپورتشىلارىمىز ينسبرۋكتە 1 كۇمىس جانە 2 قولا مەدالعا قول جەتكىزدى. جالپى كوماندالىق ەسەپتە 23-ورىنعا تابان تىرەگەن ەدى. وندا گالينا ۆيشنيەۆسكايا-شەپورەنكو سپرينتتە كۇمىس جۇلدە، سوسىن ءىز كەسۋ سايىسىندا قولا مەدالعا قول جەتكىزدى.
ال سەرگەي مالىشيەۆ كلاسسيكالىق جۇرىسپەن 10 شاقىرىم جارىستا مارە سىزىعىن ءۇشىنشى بولىپ كەسىپ، قولا جۇلدە الىپ قايتتى.
2016-جىل: ليللەحاممەر (نورۆەگيا) وليمپياداسى
2016-جىلى ليللەحاممەردە جەرلەستەرىمىز وليمپيادانى 2 قولا مەدالمەن اياقتادى. ناتيجەسىندە، جالپى كوماندالىق ەسەپتە 26-ورىنعا تابان تىرەدى.
نورۆەگيا تورىندە ءبىر قولا جۇلدەنى بياتلونشى ارينا پانتوۆا سپرينتتە جەڭىپ السا، ەكىنشى جۇلدەنى ەل قورجىنىنا ەليزابەت تۇرسىنبايەۆا مانەرلەپ سىرعاناۋ سپورتىنان سالدى.
2020-جىل: لوزاننا (شۆەيتساريا) وليمپياداسى
قازاق سپورتشىلارى ءۇشىنشى رەت وتكەن لوزاننا ويىندارى قازاق سپورتشىلارى ءۇشىن ەڭ ءساتسىز بولدى. ەل نامىسىن قورعاۋعا بارعان 26 اتلەتىمىزدىڭ بىردە-ءبىرى جەڭىس تۇعىرىنان كورىنە المادى.
2024-جىل: كانۆون (وڭتۇستىك كورەيا) وليمپياداسى
بۇگىن مارەسىنە جەتكەن كانۆون-2024 جاس وسپىرىمدەر اراسىنداعى IV قىسقى وليمپيادا ويىندارى بىزگە تاريحي جەتىستىگىمەن ماڭگى ەسىمىزدە قالىپ وتىر. اتالعان دودادا قازاقستان جاس وسپىرىمدەر قۇراماسى ساپىندا 41 سپورتشى 5 سپورت تۇرىنەن باق سىناپ، 55 جۇلدە جيىنتىعىن ساراپقا سالدى.
ناتيجەسىندە 1 التىن، 2 قولا مەدالمەن جالپى كوماندالىق ەسەپتە 20-ورىنعا قول جەتكىزدى.
تۇڭعىش التىن مەدالدى شاڭعىمەن تۇعىردان سەكىرۋدەن قازاقستان كومانداسىنىڭ مۇشەسى يليا ميزەرنىح جەڭىپ السا، قولا مەدالدىڭ ءبىرىن شورت-ترەكتەن 1000 مەتر قاشىقتىقتا سىنعا تۇسكەن سپورتشىلارىمىز پولينا ومەلچۋك قانجىعاسىنا بايلادى. ال ەكىنشى قولا جۇلدەنى قازاقستان قورجىنىنا حوككەيشىلەرىمىز سالدى.
اۆتور كۇنسۇلتان وتارباي
