كامالا حارريس كاليفورنيا گۋبەرناتورى بولۋدان ءۇمىتتى
استانا. KAZINFORM - ا ق ش-تىڭ بۇرىنعى ۆيتسە-پرەزيدەنتى كامالا حارريس 2026 -جىلى كاليفورنيا گۋبەرناتورى سايلاۋىنا ءتۇسۋدى جوسپارلاپ وتىر. بۇل تۋرالى The New York Times اقپارات كوزدەرىنە سىلتەمە جاساپ حابارلادى، دەپ جازادى Report.
2026 -جىلى دەموكرات گەۆين نيۋسوم وتستاۆكاعا كەتكەندە گۋبەرناتوردىڭ ورنى بوس بولادى. مەملەكەتتىك سايلاۋ 3-قاراشاعا بەلگىلەنگەن.
باسىلىمنىڭ حابارلاۋىنشا، حارريس ءوزىنىڭ پارتيالاستارىنا كاليفورنيا گۋبەرناتورى رەتىندە ا ق ش پرەزيدەنتى دونالد ترامپ پەن ونىڭ ساياساتىنا قارسى تۇرا الاتىنىن، سونداي-اق دەموكراتتاردىڭ قۇندىلىقتارىن قورعاي الاتىنىن ايتقان.
حارريس سونىمەن قاتار 2028 -جىلى پرەزيدەنتتىك سايلاۋعا تۇسكىسى كەلمەيتىنىن مالىمدەدى.
دەرەككوزدەر دەموكراتيالىق پارتيا مۇشەلەرىنىڭ حارريستىڭ بولاشاق مانسابىنا قاتىستى كوزقاراستارى ءارتۇرلى ەكەنىن ايتادى. كەيبىر دەموكارتتار ونى 2028 -جىلعى پرەزيدەنتتىك سايلاۋعا قاتىسۋى كەرەك دەپ ساناسا، باسقالارى «كامالا ەندى وتكەن شاقتا قالعان تۇلعا رەتىندە قابىلدانادى» دەيدى.
